သျှမ်းပြည်တောင်ပိုင်း၊ တောင်ကြီးမြို့ ရွှေတောင်ရပ်ကွက် ပုပ္ပါးလမ်းဆင်းရှိ ဖုန်းဆိုင်တစ်ဆိုင် မီးလောင်မှုဖြစ်ပွားခဲ့ပြီး သံသယရှိသူကို ရဲတပ်ဖွဲ့မှ ဖမ်းဆီးထိန်းသိမ်းထားကြောင်း သတင်းရရှိသည်။
ယမနနေ့ ဧပြီလ (၈)ရက်နေ့ညတွင် ကုန်သည်လမ်းရှိ “My Dream” မိုဘိုင်းဖုန်းဆိုင် ပိုင်ရှင်မှ ဆိုင်သိမ်း၍ နေအိမ်သို့ ပြန်ခဲ့ပြီး အဆိုပါ ဖုန်းဆိုင်ဘေးတွင် အဆောင်ငှားနေထိုင်သူ အသက် (၃၀)ကျော်အရွယ် ဝေယံစိုး အခန်းက မီးစလောင်၍ ဖုန်းဆိုင်မီးလောင်ပျက်စီးသွားခဲ့ကြောင်း သိရသည်။
အဆိုပါ ဝေယံစိုးကို မီးရှို့စရှို့သည်ဟု သံသယရှိမှုကြောင့် ရဲတပ်ဖွဲ့က ဖမ်းဆီးထိန်းသိမ်းထားပြီး ယနေ့အထိ ပျက်စီးမှုများ၏ တန်ဖိုးကို မသိရှိရသေးကြောင်း သိရသည်။
“အဆောင်ငှားထားတဲ့ တစ်ယောက်ရှိသေးတယ် သူ့အခန်းက စလောင်တာ၊ ကျနော်ဆိုင်သိမ်းပြီး မပြန်ခင်မှာတောင် သူအော်ဆဲနေတာ ဘယ်သူ့ကို ဆဲနေလည်း မသိဘူး၊ ရဲတွေ လာစစ်ဆေးတော့ သူက ဖြစ်နိုင်ခြေများတယ်ဆိုပြီး လာဖမ်းသွားတယ်၊ ဖုန်းက ပျက်စီးကုန်ပြီ ဘယ်လောက်ဖိုး ပျက်စီးတယ်ဆိုတာ တိကျမသိရသေးဘူး။”ဟု ဖုန်းဆိုင်ပိုင်ရှင် အမျိုးသားတစ်ဦးက ပြောသည်။
ထိခိုက်ဒဏ်ရာရရှိသူများ (၃)ဦးထက်မနည်းရှိကြောင်းနှင့် လက်ရှိတွင် နီးစပ်ရာ ဆေးရုံ၌ ဆေးကုသမှုခံယူနေကြောင်း သိရသည်။
အဆိုပါ ဖုန်းဆိုင်နေအိမ်သည် ယခင် (၂၀၂၀)ခုနှစ်တွင်လည်း လျှပ်စစ်ဟင်းအိုးမှ တစ်ဆင့် မီးလောင်မှု တစ်ကြိမ်ဖြစ်ပွားခဲ့ဖူးကြောင်းနှင့် ယခု ၂၀၂၆ ခုနှစ်တွင်လည်း ထပ်မံမီးဘေးနှင့် ကြုံတွေ့ခဲ့ရကြောင်း ဒေသခံများက ပြောသည်။
“အရင်ကလည်း အဲနေရာ မီးလောင်ဖူးတယ်၊ အခုလည်း ထပ်လောင်ပြန်ပြီ၊ ကိုယ့်အိမ်ဘေး မီးကူးမှာစိုးလို့ ထွက်ကြည့်တာ လူတွေအပြည့်ပဲ အဲလူတွေက ဘာလာလုပ်တာလဲမသိဘူး သူတို့ကြောင့် မီးသတ်ကားတောင် တော်တော်နဲ့ ဝင်လို့မရဘူး၊ ဖုန်းဆိုင်က မီးလောင်တာ နဲနဲ အခွင့်ကောင်းယူပြီး ဖုန်းတွေ ယူသွားတာများများ ဖြစ်မှာ။”ဟု ရပ်ကွက်နေ ဒေသ ခံ အမျိုးသမီးတစ်ဦးက ပြောသည်။
အလားတူ ပြီးခဲ့သည့် ဧပြီလ ပထမပတ်တွင် ညောင်ရွှေမြို့နယ် အင်းလေးဒေသတွင်လည်း မီးလောင်မှုကြောင့် နေအိမ်သုံးလုံး ပျက်စီးသွားခဲ့ပြီး ခြောက်သွေ့ရာသီ ဖြစ်သောကြောင့် မီးဘေးများ အထူးဂရုစိုက်သင့်ကြောင်း အဆိုပါ အမျိုးသမီးက ပြောသည်။
ထို့အပြင် ယခုရာသီသည် ခြောက်သွေ့ရာသီဖြစ်ကာ စက်သုံးဆီများကို အများအပြား သိုလှောင်ခြင်းကို သတိပြုရန်လိုအပ်ကြောင်းလည်း ၎င်းကဆိုသည်။
ပြီးခဲ့သည့် ဧပြီလ (၂)ရက်တွင်လည်း တောင်ကြီးမြို့ ဂနိုင်ရွေးရွာတွင် တောင်ပေါ်၌ နေအိမ်တစ်လုံး မီးလောင်မှုဖြစ်ပွားခဲ့ကြောင်း သိရသည်။
Leave a Comments