သျှမ်းပြည်ဝန်ကြီးချုပ်အဖြစ် စစ်ခေါင်းဆောင် အဆိုပြုလာသည့် ရပ်စောက်မြို့နယ်မှ အချိုးကျကိုယ်စားပြု PR စနစ်ဖြင့် လွှတ်တော်အမတ်ဖြစ်လာသူ ဦးစိုင်းထိန်စိုးကို ကန့်ကွက်သူမရှိဘဲ လွှတ်တော်မှ အတည်ပြုခဲ့ကြောင်း စုံစမ်းသိရသည်။

ယမန်နေ့ (ဧပြီလ ၆ ရက်) နံနက်ပိုင်းတွင် တောင်ကြီးမြို့၌ ကျင်းပသည့် သျှမ်းပြည်လွှတ်တော် အစည်းအဝေးတွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ USDP မှ အချိုးကျကိုယ်စားပြု PR စနစ်ဖြင့် အနိုင်ရရှိခဲ့သည့် ရပ်စောက်မြို့နယ် လွှတ်တော်ကိုယ်စားလှယ် အမှတ် (၂) ဦးစိုင်းထိန်စိုး ကို သျှမ်းပြည်ဝန်ကြီးချုပ်အဖြစ် အတည်ပြုခဲ့ကြောင်း သိရသည်။

“ကျနော်တို့ဘက်က မေတ္တာရပ်ခံထားတာကတော့ ဝန်ကြီးနေရာ တစ်ယောက်ဖြစ်ဖြစ် နှစ်ယောက်ဖြစ်ဖြစ် ပေးပါလို့ ပြောထားတာ ရှိတယ်။ ပြည်ထောင်စုအဆင့်မှာ မရလိုက်ပေမယ့် ပြည်နယ်အဆင့်မှာ လူမှုရေးဝန်ကြီး တစ်နေရာကတော့ ဒီနေ့ တွေ့တဲ့အတိုင်း နာမည်ပါလာတယ်” ဟု အမည်မဖော်လိုသည့် ရှမ်းနှင့် တိုင်းရင်းသားများ ဒီမိုကရက်တစ်ပါတီ SNDP ပါတီမှ လွှတ်တော်ကိုယ်စားလှယ် တစ်ဦးက သျှမ်းသံတော်ဆင့်ကို ပြောသည်။

သျှမ်းပြည်ဝန်ကြီးချုပ်အဖြစ် ဦးစိုင်းထိန်စိုးအား ခန့်အပ်ရန် နိုင်ငံတော်သမ္မတအဖြစ် တင်မြှောက်ခံထားရသည့် စစ်ခေါင်းဆောင် မင်းအောင်လှိုင်က အဆိုပြုလာခြင်း ဖြစ်ပြီး ကန့်ကွက်သူ မရှိဘဲ သျှမ်းပြည်လွှတ်တော်မှ အတည်ပြုခဲ့ကြောင်း သိရသည်။

ယနေ့ (ဧပြီလ ၇ ရက်) တွင် ဆက်လက်ကျင်းပခဲ့သည့် သျှမ်းပြည်လွှတ်တော် အစည်းအဝေးတွင် သျှမ်းပြည်အစိုးရအဖွဲ့ထဲ ပါဝင်ဖွဲ့စည်းမည့် ဝန်ကြီးဌာန အရေအတွက်၊ ပြည်နယ်ဝန်ကြီး ဦးရေများနှင့် ပတ်သက်၍ စစ်ခေါင်းဆောင် အတည်ပြုထားသည့်အတိုင်း သျှမ်းပြည်ဝန်ကြီးချုပ်အဖြစ် ရွေးချယ်တင်မြှောက်ခံထားရသူ ဦးစိုင်းထိန်စိုးက လွှတ်တော်သို့ တင်ပြခဲ့သည်။

ထိုထဲတွင် ကြံ့ခိုင်ရေးပါတီ USDP မှ တာချီလိတ်မြို့နယ် PR ကိုယ်စားလှယ် စိုင်းဝမ်းလှိုင်းတစ်ပ် ကို သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ လားရှိုးမြို့နယ် FPTP ကိုယ်စားလှယ် ဒေါက်တာ လဆိုင်း ကို စီမံကိန်းနှင့် ဘဏ္ဍာရေးဝန်ကြီးဌာန၊ နမ့်စန်မြို့နယ် FPTP ကိုယ်စားလှယ် ဦးလင်းအောင်ဆွေ ကို စိုက်ပျိုးရေး မွေးမြူရေးနှင့် ဆည်မြောင်းဝန်ကြီးဌာန တို့တွင် ပြည်နယ်ဝန်ကြီးများအဖြစ် အတည်ပြုခဲ့သည်။

အလားတူ သျှမ်းပြည်နယ် လူမှုရေးဝန်ကြီး အဖြစ် ကျားဖြူပါတီ SNDP မှ မိုးနဲမြို့နယ် PR ကိုယ်စားလှယ် နန်းခမ်းလူ၊ လျှပ်စစ် စွမ်းအင် စက်မှုနှင့် လမ်းပန်းဆက်သွယ်ရေးဝန်ကြီးအဖြစ် ပအိုဝ်းအမျိုးသားအဖွဲ့ချုပ်ပါတီ PNO မှ ဆီဆိုင်မြို့နယ် FPTP ကိုယ်စားလှယ် ခွန်သန်းထူး၊ လုံခြုံရေးနှင့် နယ်စပ်ရေးရာ ဝန်ကြီးအဖြစ် ဗိုလ်မှူးကြီး စိန်ဝင်း တို့ဖြစ်ကြောင်း သိရသည်။

မတ်လဆန်းပိုင်းတွင် စစ်ခေါင်းဆောင် ပြင်ဆင်ခဲ့သည့် ပြည်နယ်/တိုင်းအစိုးရအဖွဲ့ ဥပဒေအရ သက်ဆိုင်ရာ ပြည်နယ်/တိုင်း မြို့တော်များတွင် မြို့တော်ဝန်အဖြစ် ခန့်အပ်တာဝန်ပေးနိုင်မည့် စည်ပင်သာယာရေးဝန်ကြီး နေရာကို USDP ပါတီမှ ကလောမြို့နယ် FPTP ကိုယ်စားလှယ် ခွန်ထွန်းဖြူကို ခန့်အပ်ခဲ့ခြင်းကြောင့် သျှမ်းပြည်မြို့တော် တောင်ကြီးမြို့တော်ဝန် အဖြစ်လည်း မြင်တွေ့လာနိုင်သည်။

ထို့အပြင် သျှမ်းပြည်ဥပဒေချုပ်အဖြစ် ဦးစိုင်းကျော်ဇံနှင့် ပြည်နယ်တရားသူကြီးချုပ်အဖြစ် ဦးသန်းဦးလွင် တို့ကို ဆက်လက်ခန့်ထားပြီး၊ ပြည်နယ်စာရင်းစစ်ချုပ်အဖြစ် ဒေါ်ခင်ထွေးရီ ကို အတည်ပြုခဲ့ကြောင်း သိရသည်။

စစ်ကော်မရှင်ခန့်ထားသည့် လက်ရှိ သျှမ်းပြည်နယ်ဝန်ကြီးချုပ် ဦးအောင်အောင်သည် ပြီးခဲ့သည့် အတုအယောင် ရွေးကောက်ပွဲ ပထမပိုင်းတွင် တောင်ကြီးမြို့နယ် ပြည်သူ့လွှတ်တော် မဲဆန္ဒနယ်တွင် ဝင်ရောက်ယှဉ်ပြိုင်ခဲ့သော်လည်း ပအိုဝ်းအမျိုးသားအဖွဲ့ချုပ် (PNO) ကိုယ်စားလှယ်ကို ရှုံးနိမ့်ခဲ့သည်။