သျှမ်းပြည်တောင်ပိုင်း၊ တောင်ကြီးမြို့တွင် စက်သုံးဆီပြတ်လပ်မှုကြောင့် ကုန်စျေးနှုန်းများတရိပ်ရိပ်တက်လာပြီး၊ အချို့သော ဆိုင်ကယ်ပြင်ဆိုင်များနှင့် စားသောက်ဆိုင် အချို့ ပိတ်လိုက်ရသည့် အဆင့်ဖြစ်လာကြောင်း စုံစမ်းသိရသည်။

အရှေ့အလယ်ပိုင်းဒေသ အီရန်စစ်ပွဲကြောင့် ကမ္ဘာတဝှမ်း လောင်စာဆီဂယက် ဖြစ်လာကာ ထိုထဲတွင် သျှမ်းတောင် အပါအဝင် မြန်မာနိုင်ငံသည်လည်း လောင်စာဆီ ပြဿနာကြုံနေရသည်၊၊

မြန်မာနိုင်ငံသည် စစ်အာဏသိမ်းပြီးနောက်ပိုင်း နိုင်ငံရေးမတည်ငြိမ်မှုကြောင့် ကုန်စျေးနှုန်း တရိပ်ရိပ်တက်လာချိန် လက်ရှိ အရှေ့အလယ်ပိုင်း စစ်ရေးကြောင့် ကုန်စျေးနှုန်းများသည့် အဆမတန် မြင့်တက်မှုလာကြောင့် တောင်ကြီးဒေသခံ များ စိုးရိမ်ထိတ်လန့်မှု ဖြစ်နေကြသည်။

“ခုဆို စားသောက်ဆိုင် တချို့ ပိတ်ထားရတယ်၊ လူတွေက ဆီမရှိတော့ သွားလာဖို့ကလည်း ခက်နေတယ်။ ၊ အရေးကြီးတာလောက်ပဲ သွားကြတော့တာ၊ တစ်နေ့ တစ်နေ့ ဆီတန်းစီမယ် ကုန်ဈေးနှုန်းတက်တော့ အပိုကုန်မဲ့ဟာ မစားတော့ဘူး ပိုက်ဆံပဲ စုပြီး ဆီတွေဝယ်ထားကြတာ၊ကျမလည်း အသုပ်ထဆိုင်ဖွင့်ထားတာ ပိတ်ထားလိုက်ရတယ်။” ဟု တောင်ကြီးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ထို့အပြင် လက်ရှိ တောင်ကြီးမြို့တွင် ကြက်ဥတစ်လုံးလျှင် ငွေကျပ် (၆၅၀)၊ ပေါ်ဆန်းမွှေး ဆန်တစ်ပြည် ငွေကျပ်(၅၆၀၀) ၊ စားသုံးဆီနှစ်ဆယ်သား တစ်ဗူးလျှင် ငွေကျပ် (၈၀၀၀)နှင့် ကန်စွန်းရွက် တစ်စည်းလျှင် ငွေကျပ် (၁၀၀၀)အထိ ရှိနေပြီဖြစ်ကြောင်း သျှမ်းသံတော်ဆင့်ကောက်ယူထားသည့် စာရင်းဖြစ်သည်။

အလားတူ ဆိုင်ကယ်ပြင်ဆိုင်အချို့လည်း စက်ပစ္စည်း ပြတ်လပ်မှုနှင့် စက်ပြင်သူများ မရှိသောကြောင့် ဆိုင်ပိတ်ထားရသည့် အဆင်ဖြစ်နေကြောင်း ဆိုင်ကယ်ပြင်ဆိုင်ဖွင့်ထားသည့် အမျိုးသားတစ်ဉီး သျှမ်းသံတော်ဆင့်ကိုပြောသည်။

“ဆိုင်ကယ်ပြင်ဆိုင် ဖွင့်ထားတာ အခုပိတ်ထားရတယ် ၊ပစ္စည်းကလည်း ဈေးကြီး ပြင်မဲ့သူတွေကလည်း မရှိတော့ ပိတ်ထားရတယ်။ ဆိုင်ပိတ်ပြီး ဆီတန်းထွက်လိုက်တော့တယ် ရတဲ့ ပိုက်ဆံကို စားချင်တာ မစားရက်တော့ဘူး၊ဆီပဲ ဝယ်စုရမလိုလို ဆန်ပဲ ဝယ်စုရမလိုလိုနဲ့ အဆင်မပြေပါဘူး၊ မိသားစု စားဝတ်နေရေးက ဒီဆိုင်ကနေပဲ ရတာဆိုတော့ အခုဝင်ငွေမရှိတော့ဘူး။” ဟု ၎င်းဆိုင်ကယ်ပြင်ဆိုင်ရှင်က ဆိုသည်။

ထို့အပြင် ဆိုင်ကယ်ဆီပြတ်လပ်မှုနှင့် စစ်ကော်မရှင်တပ်၏ စုံ၊မ ရက်ခွဲခြား ယာဉ်မောင်းနှင်ခိုင်းမှုကြောင့် နွေရာသီ ဘာသာစကား သင်တန်းတက်မည့် ကျောင်းသား၊ကျောင်းသူများ သင်တန်းမပို့ရတော့ကြောင်း အဆိုပါ အမျိုးသားတစ်ဦးက ပြောသည်။

ယခုလက်ရှိ သျှမ်းတောင်မှ မြို့နယ်အများစုတွင် စက်သုံးဆီပြတ်လပ်မှုကြောင့် စိုက်ပျိုးရေးသမားများ အခက်ကြုံနေရပြီး ထွန်ယက်သည့် စက်အစားထိုး နွားများကို ပြန်လည် အသုံးပြုလာသူ များလာသောကြောင့် နွားပေါက်စ တစ်ကောင်ဈေးနှုန်းငွေကျပ် သိန်း(၃၀) ဝန်းကျင်အထိ ပေါက်ဈေးရှိကြောင်း သိရသည်။

ယခင်က ပေါင်မုန့်တစ်လုံးလျှင် ငွေကျပ် (၅၀၀)သာ ရှိခဲ့သော်လည်း ယခု အစစအရာရာ စျေးနှုန်း မြင့်တက် လာမှုကြောင့် ပေါင်မုန့်တစ်လုံး၏ စျေးနှုန်းသည် ငွေကျပ် သုံးထောင် ထိ ရှိကာ ခေါက်ဆွဲတစ်ပွဲလျှင် ငွေကျပ် ၆ထောင်ထိရှိသည်။

“ ကုန်စျေးနှုန်းက နေတိုင်းမြင့်တက်နေတော့ ဘာမှ တောင် မဝယ်စားရဲဘူး။ အလုပ်တွေကလည်း ရှားပါးလာတယ်။ ရှေ့ဆက်ပိုကြပ်တည်လာနိုင်တယ်။ ဝယ်စုဆောင်းရဖို့လည်း ပိုက်ဆံအပိုမရှိဘူးလေ” ဟု တောင်ကြီးမြို့ အိမ်ရှင်မ တစ်ဉီး က သျှမ်းသံတော်ဆင့်ကိုပြောသည်။

ထို့ကြောင့် လက်ရှိ အရှေ့အလယ်ပိုင်း စစ်ရေးပဋိပက္ခကြောင့် မြန်မာနိုင်ငံအတွင်း စက်သုံးဆီပြတ်လပ်မှုသာမက လူသုံးကုန်ပစ္စည်း၊ စားသောက်ကုန်ပစ္စည်း၊ ဆေးဝါးပစ္စည်း တို့ လည်း ပြတ်လပ်လာပြီး ကုန်စျေးနှုန်းများလည်း မြင့်တက်လာသည့်အတွက် လခစား ဝန်ထမ်းများအတွက်လည်း အလုပ်လက်မဲ့ဖြစ်လာနိုင်ကြောင်း တောင်ကြီးဒေသခံများကပြောသည်။