ထိုင်းနိုင်ငံ စွမ်းအင်ဆိုင်ရာ ထိန်းညှိကွပ်ကဲရေး‌ ကော်မရှင် (ERC) မှ လာမည့် မေလအတွင်း လျှပ်စစ်မီတာခနှုန်းထားအသစ်များကို ထုတ်ပြန်ကြေညာရန်ပြင်ဆင်နေပြီး လက်ရှိတွင် ပြည်သူလူထု၏ သဘောထားမှတ်ချက်များကို စုဆောင်းနေကြောင်း ထိုင်းသတင်းဌာန ဘန်ကောက်ပို့စ်တွင် ဖော်ပြသည်။

မတ်လ ၂၅ ရက်မှ ၃၁ ရက်အတွင်း ERC ၏ ဝက်ဘ်ဆိုက်တွင် အိမ်ထောင်စုများနှင့် စီးပွားရေးလုပ်ငန်းများကို လျှပ်စစ်မီတာခနှုန်းထား ရွေးချယ်စရာ ၃ မျိုးဖြစ်ဖော်ပြထားပြီး တစ်ယူနစ်လျှင် ၃.၉၅ ဘတ်၊ ၄.၀၈ ဘတ် သို့မဟုတ် ၄.၅၉ ဘတ် ထဲမှ တစ်ခုကို ရွေးချယ်ရန် တောင်းဆိုထားသည်။

အဆိုပါ ရွေးချယ်ရမည့် မီတာခ နှုန်းထားများသည် လက်ရှိအချိန်မှ ဧပြီလကုန်အထိ ကျင့်သုံးနေသည့် ၃.၈၈ ဘတ်ထက် ပိုမိုမြင့်မားနေပြီး ဆိုးရွားဆုံးအခြေအနေတွင် မေလမှ သြဂုတ်လအတွင်း မီတာခနှုန်းထားမှာ ၁၈ ရာခိုင်နှုန်းအထိ မြင့်တက်သွားနိုင်သည်။

မီတာခနှုန်းထားအသစ်ကို ဧပြီလ ၁ ရက်နေ့တွင် ကြေညာမည်ဖြစ်ကြောင်း ERC ၏ အထွေထွေအတွင်းရေးမှူးချုပ် Mr. Poonpat Leesombatpiboon က ပြောကြားခဲ့သည်။

ဟော်မုဇ်ရေလက်ကြား (Strait of Hormuz) တွင် ရေနံနှင့် သဘာဝဓာတ်ငွေ့ သယ်ယူပို့ဆောင်ရေး အခက်အခဲများကြောင့် သဘာဝဓာတ်ငွေ့ရည် (LNG) ဈေးနှုန်းများ အဆမတန် မြင့်တက်လာခြင်းသည် လျှပ်စစ်မီတာခများ တိုးမြှင့်ရခြင်း၏ အဓိကအချက်ဖြစ်သည်။ ထိုင်းနိုင်ငံတွင် လျှပ်စစ်ထုတ်လုပ်ရန် အသုံးပြုသည့် လောင်စာဆီ၏ ၆၀ ရာခိုင်နှုန်းခန့်မှာ LNG အပါအဝင် သဘာဝဓာတ်ငွေ့များမှ ဖြစ်သည်။

မေလမှ သြဂုတ်လအတွင်း ပူပြင်းသော ရာသီဥတုကြောင့် ထိုင်းနိုင်ငံ၏ လျှပ်စစ်လိုအပ်ချက်သည် ၇.၂ ရာခိုင်နှုန်းအထိ မြင့်တက်လာနိုင်သဖြင့် စနစ်တကျ စီမံခန့်ခွဲရန် လိုအပ်ကြောင်း Mr. Poonpat က သတိပေးပြောကြားခဲ့သည်။