ထိုင်းနိုင်ငံ ချင်းရိုင်ခရိုင် မယ်ဖာ့လုံ (Mae Fha Laung) မြို့နယ် အတွင်း မူးယစ်ဆေးဝါး မှောင်ခိုသယ်ဆောင်သူများအား လိုက်လံဖမ်းဆီးရာမှ စိတ်ကြွဆေးပြား ၅ သန်းခန့် သိမ်းဆည်းရမိခဲ့ကြောင်း ထိုင်းသတင်းဌာန ဘန်ကောက်ပိုစ့်တွင် ဖော်ပြထားသည်။

ပြီးခဲ့သည့် မတ် ၂၄ရက် ညပိုင်းတွင် မူးယစ်ဆေးဝါးဂိုဏ်းတစ်ခုသည် ချင်းရိုင်ခရိုင်၊ မယ်ဖာ့လောင် ဒေသကို ဖြတ်သန်းပြီး မူးယစ်ဆေးဝါးများ သယ်ဆောင်လာမည်ဖြစ်ကြောင်း ဖားမောင်းစစ်ကြောင်း (Pha Muang Task Force) ဟု အမည်ပေးထားသည့် အထူးစစ်ဆင်ရေးအဖွဲ့က ကြိုတင်သတင်းရရှိခဲ့သဖြင့် နယ်ခြားစောင့်ရဲတပ်ဖွဲ့နှင့် တာဝန်ရှိသူများပူးပေါင်းကာ ဖာဘျူး (Pha Bue) တိုက်နယ်သို့ သွားရောက် စောင့်ဆိုင်းခဲ့ကြသည်။

တာဝန်ရှိသူများမ စစ်ဆေးရေးဂိတ်တစ်ခု ဖွင့်လှစ်စစ်ဆေးခဲ့ပြီး မတ် ၂၄ရက် ည ၁၀ နာရီခွဲခန့်တွင် သံသယဖြစ်ဖွယ် ပစ်ကပ်ကားတစ်စီးကို တွေ့ရှိရာ စစ်ဆေးရန် ရပ်တန့်ခိုင်းသော်လည်း ရပ်တန့်ခြင်းမရှိဘဲ အရှိန်ပြင်းစွာ မောင်းနှင်ထွက်ပြေးခဲ့သည့်အပြင် အရာရှိများကို သေနတ်ဖြင့်ပြန်လည် ပစ်ခတ်ခဲ့သည်။

ထိုနောက် ရဲတပ်ဖွဲ့မှ လိုက်လံဖမ်းဆီးစဉ် စစ်ဆေးရေးဂိတ်မှ ၁ ကီလိုမီတာအကွာတွင် အရှိန်မထိန်းနိုင်ဘဲ လမ်းဘေးသို့ ထိုးကျရပ်တန့်သွားခဲ့သည်။

တာဝန်ရှိသူများက အခင်းဖြစ်ပွားရာနေရာကို ဝိုင်းဝန်းပိတ်ဆို့ပြီးရှာဖွေပြီး ချင်းရိုင်လိုင်စင်နံပါတ်တပ်ထားသော ၎င်းပစ်ကပ်ကားမှ ပြုပြင်မွမ်းမံထားသော ဆာလာအိတ် ၂၅ အိတ်ကို တွေ့ရှိခဲ့သည်။ အိတ်တစ်အိတ်စီတွင် စိတ်ကြွဆေးပြား ၂ သိန်းခန့် ပါရှိပြီး စုစုပေါင်း စိတ်ကြွဆေးပြား ၅ သန်း ဖမ်းဆီးရမိခဲ့သည်။

သိမ်းဆည်းရမိသော မူးယစ်ဆေးဝါးများကို သက်သေခံပစ္စည်းအဖြစ် သိမ်းဆည်းထားကြောင်း ချင်းရိုင်ခရိုင် ဒုတိယအုပ်ချုပ်ရေးမှူး ပရာဆတ် ဂျစ်ပရီချိ (Prasert Jitpreecheep) က မတ် ၂၅ရက်တွင် သတင်းစာရှင်းလင်းပွဲတွင် ပြောကြားခဲ့သည်။

မကြာမီကျရောက်တော့မည့် သင်္ကြန်ပွဲတော်ကာလအတွင်း နယ်စပ်ဒေသများတွင် မူးယစ်ဆေးဝါးနှိမ်နင်းရေး လုပ်ငန်းများကို ပိုမိုတိုးမြှင့်ဆောင်ရွက်ရန် ပြည်နယ်အာဏာပိုင်များက သက်ဆိုင်ရာဌာနအားလုံးကို ညွှန်ကြားထားကြောင်းလည်း မစ္စတာ ပရာဆတ်က ဖြည့်စွက်ပြောကြားခဲ့သည်။

အလားတူ ပြီးခဲ့သည့် မတ်လ ၁၇ ရက်တွင်လည်း ချင်းမိုင်ခရိုင် မယ်တဲင်‌ဒေသ (Mae Taeng) အတွင်း ထိုင်းနိုင်ငံအတွင်းပိုင်းသို့ မှောင်ခိုတင်သွင်းမည့် မူးယစ်ဆေးဝါး ကူးသန်းမှုတစ်ခုကို ကြားဖြတ်ဖမ်းဆီးနိုင်ခဲ့ပြီး စိတ်ကြွဆေးပြား ၅ သိန်းနီးပါး ဖမ်းဆီးရမိခဲ့သေးသည်။