ထိုင်း-မြန်မာနယ်စပ် တာချီလိတ်မြို့အနီးတွင် ခန့်မှန်းတန်ဖိုး မြန်မာကျပ်ငွေ ၂၀ ဒသမ ၂ ဘီလီယံ ခန့်ရှိသော မူးယစ်ဆေးဝါးများနှင့် အကြီးစား ထုတ်လုပ်ရေးစခန်းတစ်ခုကို သိမ်းဆည်းရမိကြောင်း စစ်ကော်မရှင် လက်အောက်ခံ မူးယစ်နှင့် ရဲတပ်ဖွဲ့က ယနေ့ (မတ်လ ၂၅ ရက်) တွင် သတင်းထုတ်ပြန်သည်။

တာချီလိတ်မြို့ မြောက်ဘက် ၂၈ ကီလိုမီတာခန့်အကွာရှိ မိုင်းဟဲကျေးရွာအုပ်စုအတွင်း လုံခြုံရေးတပ်ဖွဲ့ဝင်များက ယမန်နေ့ (မတ်လ ၂၄ ရက်) ညနေ ၃ နာရီက ဝင်ရောက်စီးနင်းခဲ့ရာမှ သိမ်းဆည်းရမိခြင်း ဖြစ်သည်။

အဆိုပါစီးနင်းမှုတွင် မူးယစ်ဆေးဝါးချက်လုပ်သည့် စခန်းအတွင်းမှ SpaceX ကုမ္ပဏီထုတ် Starlink (Gen 3) ဂြိုဟ်တုအင်တာနက်စက်တစ်လုံးကို သိမ်းဆည်းရမိခြင်းကြောင်း သိရသည်။

သိမ်းဆည်းရမိသည့် စခန်းအတွင်း၌ ပေ ၁၀၀ အရှည်ရှိသော ထုတ်လုပ်ရေးတဲကြီး ၂ လုံး အပါအဝင် ချက်လုပ်မှုနှင့် လူနေထိုင်မှုအတွက် အသုံးပြုသော တဲပေါင်း ၁၀ လုံးကျော်ကို တွေ့ရှိခဲ့ကြောင်း၊ ၎င်းသည် ရိုးရိုးလက်လုပ်စခန်း မဟုတ်ဘဲ စက်မှုလက်မှုအဆင့် ထုတ်လုပ်နိုင်သည့် စက်ရုံစုတစ်ခုဖြစ်ကြောင်း မူးယစ်နှင့် ရဲတပ်ဖွဲ့၏ ထုတ်ပြန်ချက်အရ သိရသည်။

စီးနင်းမှုအတွင်း WY စိတ်ကြွဆေးပြား ၆၉ သိန်းကျော်၊ အိုက်စ် ၄၉ ကီလိုဂရမ်နှင့် ကဖင်းဓာတ်ပစ္စည်း ၂ တန်ကျော် (၂၀၉၀ ကီလို) အပါအဝင် မူးယစ်ဆေးဝါးချက်လုပ်ရာတွင် အသုံးပြုသည့် ဓာတုကုန်ကြမ်းများနှင့် စက်ကိရိယာအစုံအလင်ကို ဖမ်းဆီးရမိခဲ့သည်။

ထို့အပြင် ဆေးပြားရိုက်မှို ၄၀၇ ချောင်း၊ မွှေစက်၊ မီးစက်၊ ဂတ်စ်အိုးများနှင့် ထုပ်ပိုးမှုပစ္စည်းများသာမက ဆက်သွယ်ရေးအတွက် အသုံးပြုသည့် Starlink (Gen 3) စက်တစ်လုံးကိုပါ တွေ့ရှိသိမ်းဆည်းရမိခဲ့ကြောင်း သိရသည်။

လက်ရှိတွင် အာဏာပိုင်များသည် သိမ်းဆည်းရမိသည့် ပစ္စည်းများကို စနစ်တကျ ဖျက်ဆီးရန် ပြင်ဆင်နေပြီး၊ အဆိုပါ နယ်မြေတစ်ဝိုက်တွင် ကျန်ရှိနေနိုင်သော မူးယစ်ဆေးဝါး ကွန်ရက်များကို ဆက်လက် ရှာဖွေဖော်ထုတ်လျက်ရှိကြောင်း သိရသည်။