အရှေ့အလယ်ပိုင်း စစ်ရေးပဋိပက္ခကြောင့် လောင်စာဆီ ပြဿနာအရေး မြင့်တက်လာပြီး စစ်ကော်မရှင်က စုံ၊မ ရက် မောင်းနှင်ရန် သတ်မှတ်လိုက်ပြီး မောင်းနှင်ရန်နှင့် စက်သုံးဆီဝယ်ယူရန် QR ကုဒ် Scan စနစ်ပါ သတ်မှတ်လိုက်သည်။

ယာဉ်လိုင်စင်ရှိထားသည့် မော်တော်ယာဉ်များအားလုံး သက်ဆိုင်ရာ ကုန်လမ်းပို့ဆောင်ရေး ညွှန်ကြားရေးမှူး ဉီးစီးဌာနသို့ သွားရောက်ပြီး QR ကုဒ်စနစ် ထည့်ရန် မတ် ၁၀ရက်တွင် ထုတ်ပြန်ခဲ့သည်။

ထို့အပြင် ယာဉ်လိုင်စင်မရှိသည့် မော်တော်ယာဉ်များကို စက်သုံးဆီ ထည့်ပေးမည်မဟုတ်ကြောင်းလည်း ထုတ်ပြန်လာပြီးနောက် လက်ရှိမှာ ယာဉ်လိုင်စင် အတုပွားခြင်းဖြစ်လာပြီး QRကုဒ်ကိုပါ အတုပြုလုပ်လာကြောင်း တောင်ကြီးမြို့ ကိုယ်တိုင်ကြုံရသည့် အမျိုးသားတစ်ဉီးက သျှမ်းသံတော်ဆင့်ကိုပြောသည်။

“ အခုက QR ကုဒ်မရှိရင် ဆီထည့်လို့မရဘူး။ QRကုဒ်ကလည်း လိုင်စင်ရှိယာဉ်တွေပဲရတာ။ ဒါကို အခု လိုင်စင်အတုပွားပြီး QR တွေပါလုပ်နေတာ။ ကျနော် လိုင်စင်က တောင်ကြီး၊ ဒါပေမယ့် ပွားတဲ့သူက ရန်ကုန်ဘက်က ကျနော် ဆီထည့်ဖို့ ကျနော်ရဲ့ QRကို Scan ဖတ်တော့ပေါ်လာတာပဲ” ဟု ၎င်းအမျိုးသားက ပြောသည်။

ထို့ကြောင့် QRကုဒ် အတုပွားထားသည့် ကိစ္စနှင့်ပတ်သက်ပြီး တိုင်းကြားရန်ခက်ခဲနေသည့်အပြင် လက်ရှိတွင် စက်သုံးဆီရရှိရန်အတွက် အလွန်ပင်ခက်ခဲနေကြောင်းလည်း ၎င်းကပြောသည်။

“ ကျနော် ဆိုရင် ဆီရဖို့ အချိန် နေ့ဝက်လောက်ပေးရတယ်။ကိုယ်အလှည့်ကျတော့ ဆီက ရန်ကုန်မှာ ဖြည့်ထားပြီးပြီဆိုပြီး ပြန်လှည့်ရတယ်။ အဲ့လိုပွားတာတော့ အဆင်မပြေဘူး။ ဘယ်သူ့ကို တိုင်ကြားရမှန်းလည်း မသိတော့ဘူး” ဟု အထက်ပါ အမျိုးသားက ထပ်လောင်းပြောသည်။

ထိုမော်တော်ယာဉ်လိုင်စင်အတုပွားခြင်းသည် သျှမ်းသံတော်ဆင့် ဆက်သွယ်စုံစမ်းရာတွင် အနည်းဆုံး ၂၀ နီးပါး ရှိကြောင်း၊ အများစုသည် ရန်ကုန်မြို့နှင့် မန္တလေးမြို့ဘက်မှ မော်တော်ယာဉ်များဖြစ်ကြောင်း သိရသည်။

စစ်ကော်မရှင်၏ ထုတ်ပြန်ချက်အရ စက်သုံးဆီချွေတာရေး ယာဉ်များ စုံ၊မ နေ့အလိုက် မောင်းနှင်းရပြီး၊ စက်သုံးဆီ တန်းစီရာတွင်လည်း စုံ၊မ ရက်အလိုက် သွားရောက်တန်းစီရသဖြင့် ယာဉ်လိုင်စင် အတုပွားခံရလျှင် အချိန်အလကား ကုန်ဆုံးသည့်အပြင် စက်သုံးဆီလည်း မရရှိကြောင်း တောင်ကြီးမြို့ အနီး ကျေးရွာမှ ဒေသခံ အမျိုးသမီးတစ်ဉီးက ပြောသည်။

“ ဆိုင်ကယ်ဆီဖြည့်ဖို့အတွက် ကိုယ့်အလှည့် ဆီမထည့်ရသေးဘူး။ scan ဖတ်တော့ ဆီက ဖြည့်ပြီးသားတဲ့ အချိန်တွေကုန် လူပင်ပန်းပြီး တန်းစီထားတာ အဲဒီလို့ ပွားစီးခံရတော့ ဒုက္ခရောက်တာပေါ့၊ ဘယ်သူဘယ်ဝါမှန်းမသိတော့ အရေးယူဖို့ကလည်း ခက်မယ်ထင်တယ်၊ ဖြစ်နိုင်ရင် ဥပဒေအရ ထိထိရောက် ရောက် အရေးယူပေးစေချင်တယ်။”ဟု ၎င်းက ဆိုသည်။

ထို့အပြင် စစ်ကော်မရှင်သတ်မှတ်ထားသည့် QRကုဒ်ဖြင့် scan ဖတ်၍ ဆီဖြည့်ရသည့်ထဲတွင် လိုင်စင်မဲ့ယာဉ်များ မပါဝင်ဘဲ လိုင်စင်မဲ့ယာဉ်များသည် ရပ်ကွက်ဆိုင်များတွင် တစ်လီတာ ငွေကျပ် တစ်သောင်းပေး၍ ဆီဖြည့်နေကြရသည်ဟု သိရသည်။

“တန်းစီလို့မှ မရတာ ရတဲ့ ဈေးနဲ့ ဝယ်ထည့်ရတာပေါ့၊ လိုင်းပေါ်မှာ ဈေးတင်ရောင်းတဲ့ ဆီတွေ မဝယ်ထည့်မိစေနဲ့ ရေနဲ့ ရောထားတာ၊ခေတ်ပျက်စီးပွားရေး လုပ်စားတာပေါ့၊ သူတို့က ဒုက္ခရောက်သူ အချင်းချင်း နင်းကြတာပဲ၊ ဒီခေတ်ကာလနဲ့ အသက်ရှင်နေသေးတာပဲ ကျေးဇူးတင်ရမလိုလိုနဲ့။”ဟု တောင်ကြီးမြို့က ဈေးသည် အမျိုးသမီးတစ်ဦးက ပြောသည်။

ယခုလက်ရှိတောင်ကြီးမြို့တွင် ယာဉ်ထိန်းရဲ နှင့် ရဲများက ယာဉ်များကို စုံ၊မ စစ်ဆေးကာ အရေးယူနေသည့်အပြင် လိုင်စင်မဲ့ယာဉ်များကိုလည်း ဖမ်းဆီးမှုများ ပြုလုပ်နေကြောင်း သိရသည်။

ပြီးခဲ့သည့် မတ်လ ၁၈ ရက်တွင် တောင်ကြီးမြို့ အရှေ့မြို့ပတ်လမ်း၊ အနောက်မြို့ပတ်လမ်း အပါအဝင် ဝါးပြားလမ်းဆုံနှင့် ဧရာဝတီလမ်းခွဲဘက်တွင် စစ်ကော်မရှင်လက်အောက်ခံ ယာဉ်ထိန်းရဲနှင့် ရဲတပ်ဖွဲ့ဝင်များက အုပ်စုလိုက် စောင့်ဆိုင်းကာ စုံ-မ ရက်အလိုက် စုံ-မ ဂဏန်းဖြင့် ယာဉ်အသွားအလာ စစ်ဆေးကာ လိုင်စင်မဲ့ ကားနှင့်ဆိုင်ကယ်များကိုပါ ဖမ်းဆီး သိမ်းဆည်းသွားကြောင်း သိရသည်။