သျှမ်းပြည်မြို့တော် တောင်ကြီးမြို့ပေါ်တွင် စုံ-မ စနစ်ဖြင့် ယာဉ်များကို စစ်ဆေးနေပြီး လိုင်စင်မဲ့ ကားနှင့်ဆိုင်ကယ်များကိုပါ ဖမ်းဆီးနေသည်ဟု သတင်းရရှိသည်။

ယမန်နေ့ (မတ်လ ၁၈) ရက်တွင် တောင်ကြီးမြို့ အရှေ့မြို့ပတ်လမ်း၊ အနောက်မြို့ပတ်လမ်း အပါအဝင် ဝါးပြားလမ်းဆုံနှင့် ဧရာဝတီလမ်းခွဲဘက်တွင် စစ်ကော်မရှင်လက်အောင်ခံ ယာဉ်ထိန်းရဲနှင့် ရဲတပ်ဖွဲ့ဝင်များက အုပ်စုလိုက်စောင့်ဆိုင်းကာ စုံ-မ ရက်အလိုက် စုံ-မ ဂဏန်းဖြင့် ယာဉ်အသွားအလာ စစ်ဆေးကာ လိုင်စင်မဲ့ ကားနှင့်ဆိုင်ကယ်များကိုပါ ဖမ်းဆီး၍ သိမ်းဆည်းသွားကြောင်း တောင်ကြီးဒေသခံများက ပြောသည်။

“ဆိုင်ကယ်ကတော့ သူတို့သတ်မှတ်ထားတဲ့ စုံ-မ က မှန်တယ်၊ လိုင်စင်မရှိလို့ဆိုပြီး ဖမ်းထားတာ ပိုက်ဆံငါးသောင်း ပေးခဲ့ရတယ်။ ဒီစနစ်က ဘာတွေမှန်းလည်း မသိဘူး၊ စိတ်ရှုပ်တယ်။ ဒီဆိုင်ကယ်တစ်စီးနဲ့ နေ့တိုင်း ဈေးရောင်းပြီး မိသားစုကို လုပ်ကျွေးနေရတာ”ဟု တောင်ကြီးမြို့တွင် ဈေးလှည့်ရောင်းချသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် မတ်လ ၁၇ ရက်နှင့် ၁၈ ရက်အထိ နှစ်ရက်အတွင်း လိုင်စင်မဲ့ ဆိုင်ကယ်နှင့် ကား အစီးရေ (၅၀) ထက်မနည်း ဖမ်းဆီးခံလိုက်ရကြောင်း ၎င်းအမျိုးသားက ဆက်ပြောသည်။

ထို့အပြင် ဘီအိုစီ စက်သုံးဆီဆိုင်တွင်လည်း ဆီလာဖြည့်သည့် ယာဉ်များကို စုံ၊မ သေချာစစ်ဆေးပြီးမှ ဆီထည့်ပေးသည့်အပြင် ယာဉ်ထိန်းရဲများလည်း လာရောက်ကာ လိုင်စင်မပါသည့် ယာဉ်များကို လိုက်လံဖမ်းဆီး သိမ်းဆည်းနေကြောင်း ဒေသခံများထံမှ သိရသည်။

“ရဲတွေက ဟိုဘက်ဒီဘက် ကာပြီး စစ်နေတာ။ မနက်က ဆီသွားတန်းတာ မ ရက် ဖြစ်နေတော့ ကားက စုံဖြစ်နေတာလို့ ပြောတယ်၊ ဘယ်ဂဏန်းကို ယူတာလဲတော့ မသိဘူး။ အဲဒါနဲ့ ရုံးမှာ ဖြေရှင်းရမယ်ဆိုပြီး စာပေးသွားတယ်၊ ပိုက်ဆံတွေ ထပ်ကုန်ဦးမယ်”ဟု တောင်ကြီးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထိုသို့ စုံ-မ ရက်သတ်မှတ်ချက်ကြောင့် စက်သုံးဆီဆိုင်တွင် တန်းစီနေသော လိုင်စင်မဲ့ယာဉ်များကို ယာဉ်ထိန်းရဲများက ရှောင်တခင် ဝင်ရောက်စစ်ဆေးပြီး ဖမ်းဆီးမှုများ ဆက်တိုက် ပြုလုပ်နေကြောင်း သိရသည်။

ပြီးခဲ့သည့် မတ်လ ၁၂ ရက်တွင်လည်း လိုင်စင်မဲ့ယာဉ်များကို စက်သုံးဆီ ရောင်းချပေးမည် မဟုတ်ဘဲ စက်သုံးဆီဆိုင်တွင် လိုင်စင်မဲ့ယာဉ်များ တန်းစီဝယ်ယူခြင်း တွေ့ရှိလျှင် ဥပဒေနှင့်အညီ အရေးယူ ဆောင်ရွက်သွားမည်ဖြစ်ကြောင်း စစ်ကော်မရှင်က အသိပေးထုတ်ပြန်ထားသည်။

ထို့ကြောင့် စစ်ကော်မရှင်တပ်၏ စုံ-မ ရက်သတ်မှတ်ခြင်းကြောင့် တောင်ကြီးမြို့တွင်သာမက မြန်မာနိုင်ငံ တဝှမ်းလုံးရှိ ပြည်သူများအတွက် စီးပွားရေးနှောင့်နှေးမှု ဖြစ်စေသည့်အပြင် အခြေခံလူတန်းစားများအတွက် စားဝတ်နေရေး အခက်အခဲများ ရင်ဆိုင်နေရကြောင်း သိရသည်။