သျှမ်းပြည်တောင်ပိုင်း ညောင်ရွှေမြို့နယ် အင်းလေးဒေသတွင် နိုင်ငံရေးနှင့် စီးပွားရေး မတည်ငြိမ်မှုများကို အခွင့်ကောင်းယူကာ ဒေသခံအချို့က တရားမဝင် ငွေတိုးချေးစေသည့် လုပ်ငန်းများကို လုပ်ဆောင်နေပြီး ငွေကြေးချေးယူသူများအပေါ် အနိုင်အထက် ပြုကျင့်မှုများ ဖြစ်ပေါ်နေကြောင်း ဒေသခံများထံမှ သိရသည်။

အင်းလေးဒေသ ဟဲယာရွာမကျေးရွာအုပ်စုအတွင်းရှိ ရှေ့ရပ်ကြီးရပ်ကွက်တွင် နေထိုင်သည့် မိသားစုနှစ်စုသည် တရားဝင်လိုင်စင်ရ အပေါင်ဆိုင်များ မဟုတ်ဘဲ အခြေခံလူတန်းစားများ၏ အခက်အခဲကို အခွင့်ကောင်းယူကာ အတိုးနှုန်းကို စိတ်ကြိုက်သတ်မှတ်၍ တောင်းခံနေခြင်း ဖြစ်ကြောင်း ဒေသခံများက ပြောသည်။

ဒေသခံများ၏ ပြောပြချက်အရ ချေးယူထားသော အရင်းငွေထက် နှစ်ဆမကသော အတိုးနှုန်းများကို တစ်လအတွင်း ပေးဆောင်နေရပြီး အရင်းဆပ်ပြီးသော်လည်း ကျန်ရှိနေသည့် အတိုးအပေါ် ထပ်ဆင့်တိုး ကောက်ခံနေကြောင်း အမည်မဖော်လိုသည့် ဟဲယာရွာမဒေသခံတစ်ဦးက ပြောသည်။

“အခြေအနေက တော်တော်ဆိုးပါတယ်။ အရင်း ၁ သိန်းချေးရင် ၁ လကို အတိုးတင် ၂ သိန်းပေးနေရတယ်။ အရင်းပြန်ဆပ်နိုင်ရင်တောင် အတိုးပေါ်မှာ အတိုးထပ်ဆင့်ပြီး ဇွတ်တောင်းနေတာ” ဟု ၎င်းက ပြောသည်။

ထို့အပြင် လက်ရှိဖြစ်ပေါ်နေသော ကုန်ဈေးနှုန်းနှင့် ရွှေဈေးနှုန်း မတည်ငြိမ်မှုကို အခွင့်ကောင်းယူကာ ယခင်က ချေးယူထားသော ငွေကြေးများကို ယခုလက်ရှိ ပေါက်ဈေးရှိသော ရွှေဈေးနှုန်းများနှင့် တွက်ချက်ကာ မတရားသဖြင့် ငွေညစ်တောင်းခံမှုများလည်း ရှိနေကြောင်း ဆိုသည်။

အကြွေးဆပ်ရန် ခက်ခဲနေသည့် မိသားစုများထံမှ လှေများ၊ ရွှေထည်များနှင့် လက်ကိုင်ဖုန်းများကိုလည်း အတင်းအဓမ္မ သိမ်းယူမှုများ ပြုလုပ်နေကြောင်းလည်း သိရသည်။

အဆိုပါ ငွေတိုးချေးစားသူ မိသားစုဝင်အချို့မှာ မူးယစ်ဆေးဝါး သုံးစွဲသူများဖြစ်ပြီး ၎င်းတို့၏ ရမ်းကားမှုကို ဒေသခံများက ကြောက်ရွံ့နေကြရကြောင်း ဒေသခံများက ပြောသည်။

“သူတို့အမျိုးသားတွေက မူးယစ်ဆေးဝါးရဲ့ သားကောင်တွေ ဖြစ်နေတော့ ရွာသားတွေက ပြဿနာမဖြစ်ချင်လို့ ကြောက်နေကြတာကို သူတို့က အခွင့်ကောင်းယူပြီး အာဏာပြ အကျပ်ကိုင်တာတွေ လုပ်လာတယ်” ဟု ၎င်းက ထပ်လောင်းပြောသည်။

လက်ရှိ အင်းလေးဒေသတွင် တရားဥပဒေစိုးမိုးရေး အားနည်းနေသည့်အပေါ် အာဏာပိုင်များက အဆိုပါတရားမဝင် ငွေးချေးလုပ်ငန်းများကို မျက်ကွယ်ပြုထားခြင်းက ပြဿနာကို ပိုမိုဆိုးရွားစေကြောင်း ဒေသခံများက ဝေဖန်နေသည်။

အကြွေးနွံနစ်နေသည့် မိသားစုများအကြားတွင် စိတ်ဓာတ်ကျဆင်းမှုနှင့် လူမှုရေးအကျပ်အတည်းများ ပြင်းထန်စွာ ခံစားနေရပြီး အချို့မှာ ကိုယ့်ကိုယ်ကိုယ် အဆုံးစီရင်မည့် အခြေအနေထိ ဖိအားပေးခံနေရကြောင်း သိရသည်။

ယခုကဲ့သို့ တရားမဝင် အတိုးချေးစားခြင်းနှင့် အနိုင်အထက်ပြုကျင့်ခြင်းများအပေါ် သက်ဆိုင်ရာ တာဝန်ရှိသူများအနေဖြင့် ထိရောက်စွာ အရေးယူခြင်းမရှိပါက ဒေသခံများ၏ ဘဝမှာ နာလန်ထူနိုင်တော့မည် မဟုတ်ကြောင်း ဒေသခံများက ပြောသည်။