သျှမ်းပြည်တောင်ပိုင်း၊ တောင်ကြီးမြို့ ၊ အရှေ့မြို့ပတ်လမ်းရှိ ဗိုလ်ချုပ်အောင်ဆန်း အားကစားကွင်း ဘေးပတ်ပတ်လည်တွင် ဆောက်လုပ်ထားသည့် ပင်စင်စားအများစုနေထိုင်သော တိုက်ခန်းများနှင့် ဈေးဆိုင်ခန်းများကို အင်အားသုံးကာ စတင်ဖြိုနေပြီဖြစ်ကြောင်း သတင်းရရှိသည်။

ပြီးခဲ့သည့် မတ်လ (၁၅)ရက်မှစ၍ တောင်ကြီးမြို့ ပြည်နယ်အားကစားကွင်း ပတ်လည်ရှိ တိုက်ခန်းများနှင့် ဈေးဆိုင်ခန်းများကို အင်အားသုံးဖြို့ဖျက်နေသောကြောင့် မဖြစ်မနေပြောင်းရွှေ့နေရပြီး သက်ဆိုင်ရာမှ ချမှတ်ပေးထားသည့် နေရာများမှ ဆောက်လုပ်ဆဲ ဖြစ်သောကြောင့် ဈေးဆိုင်ခန်းသမား နေစရာမရှိဘဲ လမ်းဘေးအိပ်ရသူများလည်း ရှိကြောင်း ကိုယ်တိုင်ကြုံတွေ့ရသည့် အမျိုးသားတစ်ဉီးက သျှမ်းသံတော်ဆင့်ကိုပြောသည်။​

“အဆင်မပြေဘူး။ အခုလို လာဖြိုတော့ စိတ်လည်းမကောင်းဖြစ်မိတယ်၊ အထုတ်အပိုးဆွဲပြီး အသိအိမ်နား ခနကပ်နေရတယ်၊ ဒီဆိုင်လေးကို အားပြုပြီး လုပ်စားနေရတာဆိုတော့ အလုပ်လက်မဲ့လည်းဖြစ် နေစရာလည်း ပျောက်ဖြစ်ကုန်ပြီ၊ သူတို့ချပေးတဲ့ အိမ်ခန်းတွေက ခုမဆောက်နေတုန်း ဘယ်ချိန်မှ ပြီးမလဲမသိဘူး။”ဟု ၎င်း အမျိုးသားက ဆိုသည်။​

ထိုသို့ ဈေးဆိုင်ခန်းများကို အင်အားသုံးဖယ်ရှားနေသောကြောင့် အိမ်ခန်းနှင့် လုံးချင်းအိမ်ငှားရမ်းရန် မတတ်နိုင်သူအချို့သည် လမ်းပေါ်၌ နေထိုင်နေရသူများလည်း ရှိသည်။

အဆိုပါ လူနေတိုက်ခန်းများသည် လွန်ခဲ့သည့် နှစ်ပေါင်း (၂၀) ကတည်းက ဆောက်လုပ် နေထိုင်ခဲ့သော နေရာဖြစ်ပြီး တိုက်ခန်းပေါင်း ၁၆၀ ကျော်နှင့် ဆိုင်ခန်းပေါင်း ၁၀၇ ခန်းရှိသည်။

ထို့အပြင် တိုက်ခန်းတွင် နေထိုင်သည့် သက်ကြီးရွယ်အိုများနှင့် ပင်စင်စားသမားများအတွက် အဆင်မပြေမှုများ ကြုံတွေ့နေရပြီး သက်ဆိုင်ရာမှ ချမှတ်ပေးထားသော အေးသာယာမြို့ရှိ မင်းကျန်စစ်အိမ်ယာသည်လည်း လူသူမနေသည့်အတွက် ပြောင်းရွှေ့ရာတွင် အခက်ခဲများရှိကြောင်း အမျိုးသမီးတစ်ဦးက ပြောသည်။

“ဥပဒေနဲ့အညီဖြေရှင်းဖို့ စောင့်နေတာ အခုတော့ ဥပဒေလည်း မကယ်နိုင်ဘူး၊ အကုန်အထုတ်ဆွဲ ဆင်းရပြီ၊ သူတို့စီးပွားရေးအတွက်ပဲကြည့်ပြီး ပြည်သူတွေရဲ့ဒုက္ခကို မျက်ကွယ်ပြုထားကြတယ်၊ ပင်စင်စား အဖွားတွေ၊ အဖိုးတွေဆို သားသမီးမရှိ အထုတ်အပိုးနဲ့ အဲတိုက်အောက်ကို ဆင်းနေတာ ရင်ထဲမကောင်းဘူး၊ ဘာမဟုတ်တဲ့ အေးသယာက လူသူမနီးတဲ့ အိမ်ယာထဲ ပြောင်းခိုင်းတာ ဘာတရားမျှတမှုမှ မရှိဘူး။”ဟု တိုက်ခန်းနေထိုင်သူ ဝန်ထမ်းအမျိုးသမီးတစ်ဦးက ပြောသည်။

အဆိုပါ တိုက်ခန်းများနှင့် ဆိုင်ခန်းများကို ယခု မတ်လ (၂၀)ရက်အတွင်းအပြီး ဖယ်ရှားသွားမည် ဖြစ်သောကြောင့် နေရာမဖယ်ပေးဘဲ ကျန်ရှိနေသူများကို ၁၉၉၅ ခုနှစ် အစိုးရအိမ်ဥပဒေအရ ဖယ်ရှားသွားမည်ဟု ဆိုင်ခန်းပိုင်ရှင်များကို ကြိုတင်အကြောင်းကြားစာ ပို့ထားကြောင်း သိရသည်။

“ကျမတို့လို အဖြစ်ဆိုးမျိုးနဲ့ မကြုံပါစေနဲ့ ဆုတောင်းပေးလိုက်ပါတယ်၊ နေ့ချင်းညချင်း အိမ်ပိုင်ဘဝကနေ အိမ်ငှားဘဝရောက်ကြရတယ်၊ အိမ်ငှားခတွေ ဘယ်လောက်ဈေးကြီးလိုက်လဲ ကုန်ဈေးနှုန်းတွေကလည်း ကြီးနဲ့ ဘာတွေ လုပ်စားရမလဲ၊ ဘဝတွေ ပျက်ကုန်ပြီ။”ဟု ၎င်း အမျိုးသမီးက ပြောသည်။

ယခုလက်ရှိတောင်ကြီးမြို့တွင် တစ်ထပ်တိုက်တစ်လုံးလျှင် ငွေကျပ် ငါးသိန်းမှ ၈သိန်းအထိရှိနေပြီး ပြည်သူများ၏ နေ့စဉ်လုပ်အားခမှာ တစ်နေ့လျှင် ငွေကျပ် တစ်သောင်းနှစ်ထောင်သာရှိသောကြောင့် အဆင်မပြေမှုများကြုံတွေ့နေကြရသည်။

ဈေးဆိုင်ခန်း၊ တိုက်ခန်းများနေရာတွင် နိုင်ငံတကာ အဆင့်မီအားကစား ကွင်း၊ အားကစားရုံနှင့် ရေကူးကန်၊ လူငယ်ရေးရာ စင်တာ များ တည်ဆောက်သွားမည်ဟု အကြောင်းပြပြီး ဈေးဆိုင်ခန်းများကို အတင်းအဓမ္မ ဖယ်ရှားခိုင်းခဲ့သည်။