စစ်ကော်မရှင်ကျင်းပခဲ့သည့် ရွေးကောက်ပွဲတွင် အနိုင်ရရှိခဲ့သော ကိုယ်စားလှယ်များကို ခေါ်ယူကျင်းပနေသည့် အမျိုးသားလွှတ်တော်တွင် ဥက္ကဋ္ဌအဖြစ် ဦးအောင်လင်းဒွေး ကို ရွေးချယ်တင်မြှောက်ခဲ့ကြောင်း သတင်းသိရသည်။

ယနေ့ (မတ်လ ၁၈ ရက်) တွင် နေပြည်တော်၌ အမျိုးသားလွှတ်တော် အစည်းအဝေးကို စစ်ကော်မရှင် ရွေးကောက်ပွဲတွင် အနိုင်ရရှိခဲ့သော ကိုယ်စားလှယ်များဖြင့် စတင်ခေါ်ယူ ကျင်းပခဲ့ပြီး ယခင် စစ်ကောင်စီ အတွင်းရေးမှူး၊ အမျိုးသားကာကွယ်ရေးနှင့် လုံခြုံရေးကောင်စီတွင် ရာထူးအသစ် ဖန်တီးခဲ့သည့် အမှုဆောင်ချုပ် တာဝန်ယူခဲ့သူ ဦးအောင်လင်းဒွေး ကို အမျိုးသားလွှတ်တော်ဥက္ကဋ္ဌအဖြစ် ရွေးချယ်တင်မြှောက်ခဲ့သည်။

အလားတူ စစ်ကော်မရှင်တွင် တိုင်းရင်းသားလူမျိုးများရေးရာ ဝန်ကြီးဌာန၊ အားကစားနှင့် လူငယ်ရေးရာဝန်ကြီးဌာန၊ ဟိုတယ်နှင့် ခရီးသွားလာရေးဝန်ကြီးဌာန တို့တွင် ပြည်ထောင်စုဝန်ကြီးအဖြစ် တာဝန်ယူခဲ့သူ၊ ကချင်ပြည်နယ် အမျိုးသားလွှတ်တော် မဲဆန္ဒနယ် အမှတ်(၂) မှ ဦး Jeng Phang နော်တောင် ကို အမျိုးသားလွှတ်တော် ဒုတိယဥက္ကဋ္ဌ အဖြစ် ရွေးချယ်တင်မြှောက်ခဲ့ကြောင်း သိရသည်။

တတိယအကြိမ် အမျိုးသားလွှတ်တော်၏ ပထမပုံမှန် အစည်းအဝေးကို စစ်ကော်မရှင် ရွေးကောက်ပွဲတွင် အနိုင်ရရှိခဲ့သော ပြည်နယ်/တိုင်း ကိုယ်စားပြု ကိုယ်စားလှယ်များနှင့် တပ်မတော်သား ကိုယ်စားလှယ်များ စုစုပေါင်း ၂၁၃ ဦး တက်ရောက်ခဲ့ကြောင်း သိရသည်။

ပုံမှန်အားဖြင့် အမျိုးသားလွှတ်တော်ကို ပြည်နယ်နှင့်တိုင်းများမှ ကိုယ်စားလှယ် ၁၂ ဦးကျစီ ရွေးချယ်တင်မြှောက်သော်လည်း ပြီးခဲ့သည့် စစ်ကော်မရှင် ရွေးကောက်ပွဲတွင် သျှမ်းပြည်အတွင်းရှိ ပလောင်နှင့် ကိုးကန့် ကိုယ်ပိုင်အုပ်ချုပ်ခွင့်ရဒေသ မဲဆန္ဒနယ် (၂) ခုတွင် အမျိုးသားလွှတ်တော်အတွက် ရွေးကောက်ပွဲ မကျင်းပခဲ့ခြင်းကြောင့် လက်ရှိတွင် သျှမ်းပြည်မှ စုစုပေါင်း (၁၀) ဦးသာ ကိုယ်စားပြု တက်ရောက်နေသည်။

ထိုထဲတွင် ရှမ်းနှင့်တိုင်းရင်းသားများ ဒီမိုကရက်တစ်ပါတီ (SNDP ကျားဖြူပါတီ) တစ်ဦး၊ ပအိုဝ်းအမျိုးသားများအဖွဲ့ချုပ်ပါတီ PNO (၂) ဦး၊ ဓနုတိုင်းရင်းသားလူမျိုးများ ဒီမိုကရေစီပါတီ DNDP (၁) ဦး၊ ‘ဝ’အမျိုးသားပါတီ WNP တစ်ဦးနှင့် ကျန် ၅ ဦးမှာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ USDP မှ ကိုယ်စားလှယ်များ ဖြစ်သည်။

၂၀၂၀ ရွေးကောက်ပွဲတွင် မဲမသမာမှုရှိကြောင်း စွပ်စွဲချက်ဖြင့် ၂၀၂၁ ဖေဖော်ဝါရီလ ၁ ရက်တွင် လွှတ်တော်အစည်းအဝေးများ စတင်ကျင်းပရန် ပြင်ဆင်နေစဉ် စစ်တပ်မှ အရပ်သားအစိုးရထံ အာဏာသိမ်းယူခဲ့သည်။

ယမန်နှစ် ၂၀၂၅ ဒီဇင်ဘာလ ၂၈ ရက်မှ ၂၀၂၆ ဇန်နဝါရီလ ၂၅ ရက်အထိ အပိုင်း(၃) ပိုင်းခွဲ၍ စစ်ကော်မရှင်ဘက်မှ ရွေးကောက်ပွဲ ကျင်းပခဲ့ပြီးနောက် မတ်လ တတိယပတ် အတွင်း ပြည်သူ့လွှတ်တော်၊ အမျိုးသားလွှတ်တော်နှင့် ပြည်နယ်/တိုင်း လွှတ်တော်အသီးသီးကို ခေါ်ယူကျင်းပနေသည်။

မတ်လ (၁၆) ရက်တွင် ခေါ်ယူကျင်းပခဲ့သည့် ပြည်သူ့လွှတ်တော် အစည်းအဝေးတွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ USDP ပါတီဥက္ကဋ္ဌဖြစ်သူ ဦးခင်ရီ ကို ပြည်သူ့လွှတ်တော် ဥက္ကဋ္ဌနှင့် စစ်ကော်မရှင် ပြန်ကြားရေးဝန်ကြီးဖြစ်သူ ဦးမောင်မောင်အုန်း ကို ဒုတိယဥက္ကဋ္ဌအဖြစ် ရွေးချယ်တင်မြှောက်ခဲ့သည်။