သျှမ်းပြည်တောင်ပိုင်း မိုင်းရှူးမြို့နယ်တွင် မိုးသည်းထန်စွာ ရွာသွန်းပြီး မိုးသီး ကြွေကျခဲ့ခြင်းကြောင့် ဖရဲစိုက်ခင်း ဧကများစွာ ပျက်စီးဆုံးရှုံးခဲ့ကြောင်း စုံစမ်းသိရသည်။

မိုင်းရှူးမြို့နယ်ရှိ နားစံကျေးရွာနှင့် ပန်စွဲကျေးရွာဘက်တွင် နှစ်စဉ်ပုံမှန် ဆောင်းသီးနှံ ရာသီစာဖြစ်သည့် ဖရဲသီးများကို စိုက်ပျိုးလေ့ရှိကြပြီး၊ ဒေသခံအချို့သည် ခြံစိုက်ခင်းများကို ငှားရမ်းကာ ဖရဲသီးများကို စိုက်ပျိုးကြကြောင်း ဒေသခံများထံမှ သိရသည်။

မတ်လ ဒုတိယပတ်အတွင်း မိုင်းရှူးမြို့နယ်တွင် အချိန်အခါမဟုတ် မိုးသည်းထန်စွာ ရွာသွန်းပြီး မိုးသီးကြွေကျခဲ့ခြင်းကြောင့် ဖရဲစိုက်ခင်း ဧကများစွာ ပျက်စီးဆုံးရှုံးခဲ့ရကြောင်း မိုင်းရှူးမြို့နယ် ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ဧကနဲ့ဆို ဘယ်လောက် ရှိမလဲတော့ မသိဘူး။ ဒီချိန်မှာ ဖရဲသီးထွက်တဲ့ အချိန်ဆိုတော့လေ မိုင်းရှူးမြို့ အထွက်က ဖရဲခြံတွေ မိုးသီးကြောင့် ထိခိုက်ပျက်စီးတာတွေ များတယ်။ အဲ့ဒီ မြို့အထွက်ဘက်က ဖရဲသီးစိုက်နေတဲ့ ပိုင်ရှင် လေးငါးယောက်ထပ် မနည်းကတော့ ဆုံးရှုံးမှု များတယ် သိရတယ်။ ကောင်းတဲ့ အလုံး မရှိလောက်အောင် ပျက်စီးသွားတာ”ဟု မိုင်းရှူးမြို့နယ်မှ အဆိုပါ ဒေသခံအမျိုးသမီးက ပြောသည်။

မိုင်းရှူးမြို့နယ်တွင် ဖရဲသီး စိုက်ပျိုးထားသည့် ဒေသခံများသည် ယခုနှစ်တွင် မိုးသီးကြွေကျခြင်းကြောင့် ဖရဲခင်းများ ပျက်စီးဆုံးရှုံးခဲ့ပြီးနောက် လာမည့်နှစ်အတွက် အရင်းစိုက်ထုတ် လုပ်ကိုင်စိုက်ပျိုးရန် ခက်ခဲနိုင်ကြောင်း မိုင်းရှူးမြို့နယ်ဒေသခံ အမျိုးသမီးတစ်ဦးက ထပ်လောင်းပြောသည်။

“တချို့လည်း စိုက်ခင်းတွေ ငှားပြီး လုပ်ထားကြတော့ ဒီနှစ် ဒီလိုကြုံရရင် နောက်နှစ် ပြန်ရင်းနှီးပြီး လုပ်ဖို့ ခက်ခဲနိုင်တယ်။ ဖရဲသီးတွေက ခူးပြီးရောင်းရမယ့်အချိန် ငွေရ ရမယ့် အချိန်လေ၊ မခူးလိုက်ရတဲ့ လူတွေကြတော့ ဆုံးရှုံးမှု တော်တော်များမယ်။ သဘာဝတရား ဆိုတော့ တကယ် ဘာမှကို မတတ်နိုင်ကြဘူးလေ” ဟု မိုင်းရှူးမြို့နယ်ဒေသခံ အမျိုးသမီးက ဆက်ပြောသည်။

မိုင်းရှူးမြို့နယ် နားစံကျေးရွာ၊ ဝမ်ဆော့ကျေးရွာနှင့် မိုင်းအပ်ကျေးရွာတို့တွင် အချိန်အခါမဟုတ် မိုးရွာသွန်းပြီး မိုးသီးကြွေကျခြင်းကြောင့် နေအိမ်များစွာနှင့် စိုက်ခင်းအချို့ ပျက်စီးမှုများ ရှိခဲ့ကြောင်း ဒေသခံများက ပြောသည်။

အလားတူ မိုးနဲမြို့နယ်ရှိ ကျိုင်းတောင်းမြို့ပေါ်နှင့် အနီးအနား ကျေးရွာများတွင်လည်း အချိန်အခါ မဟုတ် မိုးရွာသွန်းခဲ့ပြီး မိုးသီးများပါ ကြွေကျခြင်းကြောင့် နေအိမ်များနှင့် စိုက်ခင်းအနည်းငယ် ပျက်စီးခဲ့ကြောင်း ကျိုင်းတောင်းမြို့ ဒေသခံများထံမှ သိရသည်။

ထို့အပြင် တောင်ကြီးမြို့နယ်နှင့် ဟိုပုံးမြို့နယ်ဘက်တွင်လည်း အရွယ်အစား ကြီးမားသည့် မိုးသီးများ ကြွေကျခဲ့ခြင်းကြောင့် ကြက်သွန်ခင်း၊ စတော်ဘယ်ရီခြံနှင့် ဟင်းသီးဟင်းရွက် စိုက်ခင်းများ အပါအဝင် စိုက်ခင်း ဧက ထောင်နှင့်ချီ ပျက်စီး ဆုံးရှုံးခဲ့ကြောင်း ကုန်သည်များထံမှ သိရသည်။