သျှမ်းပြည် နမ့်ခမ်းမြို့အနီးထိ ကိုးကန့်တပ်ဖွဲ့ MNDAA ပစ်ခတ်သည့် ဒရုန်းဗုံးများ ကျရောက်နေခြင်းကြောင့် မြို့ပေါ်ရှိ အရပ်ဖက်လူမှုအဖွဲ့အစည်း ဝန်ထမ်းများကို TNLA ဘက်မှ တိမ်းရှောင်ခိုင်းနေကြောင်း စုံစမ်းသိရသည်။

ယနေ့ (မတ်လ ၁၆ ရက်) နံနက် ၆ နာရီခွဲကျော်မှ စတင်ပြီး တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နမ့်ခမ်းမြို့အနီးထိ ကိုးကန့်တပ်ဖွဲ့ MNDAA ဘက်မှ ဒရုန်းဖြင့် ဗုံးကြဲတိုက်ခိုက်နေပြီး နမ့်ဖတ်ကာ-နမ့်ခမ်းလမ်းပိုင်းမှတဆင့် မြေပြင်ထိုးစစ် ချီတက်သွားခဲ့ရာ ဖာလင်၊ မန်အောင်၊ ဆာလုကျေးရွာဘက်ထိ ရောက်ရှိနေကြောင်း နမ့်ခမ်းဒေသခံများက ပြောသည်။

“ဒရုန်း Drop Bomb တွေက သာယာကုန်းဘက် နီးလာပြီ၊ နမ့်ခမ်းဘက်မှာလည်း ရှင်လောင်းပွဲရှိနေတော့ ဗုံးသံကြား အလှူလှည့်ဖို့ လုပ်နေတယ်။ နမ့်ဖတ်ကာ လမ်းကြောင်းကနေ အခု ကိုးကန့်တပ်က ဆာလု အထိ တက်လာပြီ။ ဖာလင်၊ မန်အောင်၊ ဆာလုရောက်ရင် နမ့်ခမ်းရောက်တော့မယ်” ဟု နမ့်ခမ်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အလားတူ နမ့်ခမ်းမြို့အနီးထိ MNDAA ဘက်မှ ထိုးစစ်ဆင် တိုက်ခိုက်နေခြင်းကြောင့် TNLA ထိန်းချုပ်ထားသည့် နမ့်ခမ်းမြို့ပေါ်ရှိ အရပ်ဖက် လူမှုအဖွဲ့အစည်းများ CSO နှင့် NGO အဖွဲ့များကို မြို့ပြင်ဘက် ရှောင်တိမ်းထားရန် TNLA ဘက်မှ ပြောဆိုထားကြောင်း စစ်ရေးသတင်းရင်းမြစ်တစ်ဦးက ပြောသည်။

“ဒီမနက် ၆ နာရီခွဲလောက်မှာ ၁၂ မိုင်ကုန်းဘက် ပေါက်ကွဲသံ ၃ လုံး စကြားတယ်။ တိုက်ပွဲက နမ့်ခမ်းနဲ့ နီးလာပြီး မြို့ပေါ်အထိ ရောက်လာနိုင်လို့ နမ့်ခမ်းမြို့ထဲမှာလည်း TNLA က တချို့ရုံးတွေမှာ သူတို့ပစ္စည်းတွေ မီးရှို့ခဲ့တယ်။ ပြည်သူတွေကို သတိပေးတာတော့ မရှိသေးဘူး၊ NGO ဝန်ထမ်းတွေကိုတော့ မြို့ပြင်ဘက် ရှောင်ခိုင်းထားတယ်” ဟု သျှမ်းပြည်မြောက်ပိုင်းမှ အဆိုပါ စစ်ရေးသတင်းရင်းမြစ်က သျှမ်းသံတော်ဆင့်ကို ပြောသည်။

ယမန်နေ့ (မတ်လ ၁၄ ရက်) တွင် ကွတ်ခိုင်နှင့် နမ့်ခမ်းကြား TNLA ထိန်းချုပ်ထားသည့် မိုင်းယုလေးနှင့် ၁၂ မိုင်ဂိတ်ဘက်တွင်လည်း နှစ်ဘက်တပ်ဖွဲ့ကြား ထိတွေ့တိုက်ပွဲ ဖြစ်ပွားခဲ့ပြီး မိုင်းယုလေးဒေသကို MNDAA ဘက်မှ ထိန်းချုပ်ခဲ့ကြောင်း သိရသည်။

ကွတ်ခိုင်နှင့် သိန္နီမြို့နယ်တွင် TNLA နှင့် MNDAA ကြား တစ်လကျော်ကြာ ဖြစ်ပွားနေသည့် နယ်မြေအငြင်းပွားမှု ပြဿနာများမှာ ပြေလည်မှု မရရှိဘဲ မြေပြင်စစ်ရေးတင်းမာမှု ဖြစ်ပွားခဲ့ရာမှ ညီနောင်မဟာမိတ် တပ်အချင်းချင်း တိုက်ခိုက်သည်အထိ စစ်ရေးပဋိပက္ခ ကြီးထွားလာသည်။

TNLA အနေဖြင့် MNDAA အား ပြန်လည်ပစ်ခတ်ခဲ့ခြင်း မရှိဘဲ မိမိကိုယ်ကို ခုခံကာကွယ်ခြင်းသာ ဆောင်ရွက်ခဲ့ပြီး ညီနောင်မဟာမိတ်အချင်းချင်းကြား ဖြစ်ပေါ်နေသည့် ပြဿနာများကို တွေ့ဆုံဆွေးနွေး ညှိနှိုင်းခြင်းဖြင့် ကြိုးစား အဖြေရှာသွားမည်ဖြစ်ကြောင်း မတ်လ (၁၄) ရက်တွင် ထုတ်ပြန်ထားသည်။