သျှမ်းပြည်တောင်ပိုင်း ဟိုပုံးမြို့တွင် စစ်ကော်မရှင်တပ်က လူငယ်(၈)ဦးထက်မနည်း ပေါ်တာဆွဲ ဖမ်းဆီးသွားခဲ့ကြောင်း သတင်းရရှိသည်။
ဖေဖော်ဝါရီလ နောက်ဆုံးပတ်မှ စတင်ပြီး ဟိုပုံးမြို့ပေါ်တွင် ညနေပိုင်း ဆိုင်ကယ်ဖြင့် အလုပ်မှ ပြန်လာသည့် လူငယ်များကို ဦးတည်ကာ စစ်ကော်မရှင်တပ်မှ ပေါ်တာဆွဲ ဖမ်းဆီးနေသောကြောင့် လူငယ်(၈)ဦး ထက်မနည်း ပေါ်တာဆွဲခံရပြီး အချို့သော လူငယ်များကို ငွေကျပ်သိန်း ဆယ်ချီပေးကာ ပြန်ရွေးထုတ်ရကြောင်း ဟိုပုံးဒေသခံများက ပြောသည်။
“ညနေဘက်ဆို အလုပ်ကပြန်ရင် မိုးချုပ်လို့ဆိုပြီး စစ်တပ်က စစ်ဆေးပြီး ဖမ်းတာ၊ ပိုက်ဆံများများ ပေးနိုင်မှ လွှတ်ပေးတာ။ တချို့ဆို ပိုက်ဆံဘယ်လောက်ပေးပေး မလွှတ်ပေးဘူး၊ စစ်သင်တန်းတွေ တန်းပို့တာ။ သွားလာရ အရင်လို မကောင်းတော့ဘူး”ဟု ဟိုပုံးမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုသို့ စစ်ကော်မရှင်တပ်က ပေါ်တာဆွဲ ဖမ်းဆီးသည့်နေရာသည် ပအိုဝ်းပြည်သူ့စစ် (PNO) ထိန်းချုပ်ထားသည့် နေရာဖြစ်ကြောင်း၊ PNO သည်လည်း စစ်ကော်မရှင် လက်အောက်ခံ ပြည်သူ့စစ်တပ်ဖွဲ့ဖြစ်ကာ ပြည်သူများထံ စစ်မှုထမ်းကြေး တစ်လလျှင် ငွေကျပ် ၅သောင်းမှ ကျပ်တစ်သိန်းအထိ ကောက်ခံနေကြောင်း သိရသည်။
“လိုင်းပေါ်မှာ ပေါ်တာဆွဲနေတယ်ဆိုတဲ့ သတင်းတွေက အမှန်ပါ၊ ကိုယ်တိုင်ကြုံမှ သိပါလိမ့်မယ်။ ကျနော်တို့ ဒေသခံအနေနဲ့က အေးအေးချမ်းချမ်းပဲ နေချင်တယ်၊ စစ်ထဲလည်း ဝင်မပါချင်ဘူး။ ကိုယ်တိုင်က လူငယ်ဖြစ်တော့ လွတ်လွတ်လပ်လပ် သွားလာချင်တယ်၊ ပေါ်တာဆွဲနေတော့ အပြင်မသွားရဲဘူး စိုးရိမ်ရတယ်”ဟု ဟိုပုံးဒေသခံ အသက် (၃၀)ဝန်းကျင် အမျိုးသားတစ်ဦးက ပြောသည်။
လက်ရှိ ဟိုပုံးမြို့နယ်တွင် စစ်ကော်မရှင်တပ်နှင့် PNO တပ်ဖွဲ့တို့သည် ဒေသခံများထံ စစ်မှုထမ်း အတွက် ငွေကြေးကောက်ခံခြင်း၊ စစ်သားစုဆောင်းခြင်းတို့ ဆက်တိုက်လုပ်ဆောင်နေသဖြင့် ဒေသခံများက စိုးရိမ်ထိတ်လန့်နေရကြောင်း သိရသည်။
အလားတူ ညောင်ရွှေမြို့နယ် အင်းလေးဒေသတွင်လည်း စစ်ကော်မရှင်တပ်က ဒေသခံများကို ပေါ်တာဆွဲ ဖမ်းဆီးနေသောကြောင့် နေ့စားအလုပ်သမားများ အလုပ်သွားလာရန် ခက်ခဲပြီး စားဝတ်နေရေးအတွက် အဆင်မပြေတော့ကြောင်း အင်းလေးဒေသခံ အမျိုးသမီးတစ်ဦးက ပြောသည်။
“အင်းလေးမှာ စစ်မှုထမ်းခေါ်တော့ ဘယ်သူမှ မသွားချင်ကြဘူး၊ အဲတော့ ပေါ်တာဆွဲနေတာ။ စစ်မှုထမ်းကြေးလည်း လတိုင်းထည့်ရတယ်၊ ကိုယ်က နေ့စားသမားဆိုတော့ အလုပ်လည်း ရှားတယ်။ အပြင်ထွက် အလုပ်လုပ်မယ်ဆိုလည်း ပေါ်တာဆွဲခံရမှာ ကြောက်ရတယ်။ တစ်နေ့မှ (၈၀၀၀) ပဲရတယ်၊ ဒါတောင် အလုပ်မသွားရတဲ့နေ့ဆို မရဘူး။ စားသောက်ဖို့ ပိုခက်ခဲတာပေါ့လေ”ဟု အင်းလေးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
အင်းလေးဒေသ၌ အမျိုးသားတစ်ဦးလျှင် တစ်နေ့လုပ်အားခ ငွေကျပ် (၁၀၀၀၀) ရရှိပြီး အမျိုးသမီးတစ်ဦးလျှင် ငွေကျပ် (၆၀၀၀) မှ (၈၀၀၀) အထိသာ ရရှိကြောင်း အဆိုပါ အမျိုးသမီးတစ်ဦးက ဆက်ပြောသည်။
ထို့အပြင် အင်းလေးဒေသသည် ငလျင်ဒဏ်နှင့် ရေကြီးမှုဒဏ်ကဲ့သို့ သဘာဝဘေးဒဏ်တို့ကို အများဆုံး ကြုံတွေ့နေရသည့် ဒေသတစ်ခုဖြစ်ပြီး ကုန်ဈေးနှုန်းမြင့်တက်လာသည်နှင့်အတူ ဒေသတွင်း ပညာရေး၊ ကျန်းမာရေးနှင့် စီးပွားရေး နလန်မထူနိုင်သေးသည့် ဒေသဖြစ်သည်။
ပြီးခဲ့သည့် ၂၀၂၄ခုနှစ် ဖေဖော်ဝါရီလ ပထမပတ်တွင် စစ်ကော်မရှင်တပ်က စစ်မှုထမ်းဥပဒေကို အသက်သွင်းလိုက်ပြီးနောက် သျှမ်းပြည်တောင်ပိုင်း အပါအဝင် မြန်မာတစ်နိုင်ငံလုံးတွင် စစ်ကော်မရှင်တပ်က ခရီးသွားလူငယ်များကို ပေါ်တာဆွဲခြင်း၊ နေအိမ်အတွင်း ဧည့်စာရင်းစစ်ကာ ဖမ်းဆီးခြင်း၊ စစ်မှုထမ်းရန် မဲနှိုက်ရွေးချယ်ခြင်း စသည့် အကြောင်းအမျိုးမျိုးပြကာ ပေါ်တာဆွဲဖမ်းဆီးခြင်းများ ရှိနေသည်။
Leave a Comments