သျှမ်းပြည်တောင်ပိုင်း၊ ညောင်ရွှေမြို့နယ် စံကားဒေသသို့ နေရပ်ပြန် စစ်ဘေးရှောင်များသည် ပအိုဝ်းပြည်သူ့စစ် (PNO)ကို တစ်အိမ်လျှင် တစ်လလျှင် ငွေကျပ်ငါးသိန်းကို ပေးဆောင်နေရကြောင်း သတင်းရရှိသည်။

ပြီးခဲ့သည့် ၂၀၂၅ခုနှစ် ဖေဖော်ဝါရီလပထမ ပတ်တွင် ညောင်‌ရွှေမြို့နယ် အတွင်းရှိ ကျေးရွာများကို စစ်ကော်မရှင်တပ်က လက်နက်ကြိးဖြင့် နေ့စဉ်ပစ်ခတ်တိုက်ခိုက်မှုများကြောင့် ရွာလုံးကျွတ်ထွက်ပြေးတိမ်းရှောင်နေခဲ့ရသည်။

ထိုသို့ လက်နက်ကြီးဖြင့် ပစ်ခတ်သောကြောင့် ကျေးရွာ (၆)ရွာမှ ဒေသခံ (၂၀၀၀)ကျော် စစ်ဘေးတိမ်းရှောင်ခဲ့ရပြီး ၂၀၂၅ ခုနှစ် ဩဂုတ်လတွင် စစ်ရှောင်အချို့သည် ၎င်းတို့နေရပ် စံကားဒေသသို့ ပြန်သွားကြသည်။

ထိုနောက် PNOတပ်ဖွဲ့ကို တစ်အိမ်ထောင်စုလျှင် တစ်လလျှင် ငွေကျပ် ငါးသိန်း ပေးဆောင်နေရကြောင်း စံကားဒေသခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။

“ ပြန်သာ ပြန်လာရတာ အဆင်မပြေဘူး၊ လတိုင်း ငွေငါးသိန်းထည့်နေရတာ အခုဆို (၈)လတောင် ရှိပြီ၊ ကိုယ့်ဆီမရှိလည်း သူများဆီချေးထည့်ရတော့ အကြွေးတင်တာပေါ့၊ အလုပ်ကလည်း နေ့စားဆိုတော့ ပိုဆိုး၊ ကုန်ဈေးနူန်းနဲ့ အခုဆို စားဖို့တောင်မကျန်ဘူး။ဟု စံကားဒေသခံ အမျိုးသားတစ်ဦးက ပြောသည်။

ထိုသို့ တစ်လလျှင် ငွေကျပ် ငါးသိန်းလစဉ်မပေးဆောင်ပါက စစ်မှုထမ်းခေါ်၍ ရှေ့တန်းပို့မည်ဟု PNOက ခြိမ်းခြောက်ထားကြောင်း ၎င်းအမျိုးသားကပြောသည်။

အလားတူ ပင်လောင်းမြို့နယ် နန်းတုတ်ကျေးရွာတွင်လည်း နေရပ်ပြန်စစ်ရှောင်များကို PNOက တစ်လလျှင် ငွေကျပ် (၅)သိန်းတောင်းခံနေပြီး မပေးလျှင် နေအိမ်ချိတ်ပိတ်ခြင်း၊ စစ်မှုထမ်းခေါ်ခြင်းများလုပ်ဆောင်မည်ဟု ခြိမ်းခြောက်ထားကြောင်း သိရသည်။

“နေရပ်ပြန်လည်း ပိုက်ဆံရှိတဲ့ သူပဲ ပြန်ကြတာ ၊ဘာလို့ဆို PNOကို လတိုင်း ငါးသိန်း ပေးရမှာလေ၊ နေရပ်မပြန်လာတဲ့ စစ်ရှောင်အိမ်တွေဆို ချိတ်ပိတ်မယ် လို့ခြိမ်းခြောက်တယ်၊ တစ်နှစ်ကျော် ပေးလာရတော့ ပြည်သူတွေလည်း အဆင်မပြေတော့ဘူး။”ဟု ဒေသခံ အမျိုးသားတစ်ဦးက ပြောသည်။

ထို့ကြောင့် နန်းတုတ်ကျေးရွာတွင် နေရပ်မပြန်လာဘဲ ပင်လောင်းမြို့နယ် နှင့် အင်းလေးဒေသဘက်တွင် အိမ်ငှားရမ်းကာ အခြေချနေထိုင်သူများလည်း ရှိကြောင်း သိရသည်။

ပြီးခဲ့သည့် ၂၀၂၄ ခုနှစ် မေလတွင် နန်းတုတ်ကျေးရွာ၌ စစ်ကော်မရှင်တပ်၊PNOတပ်နှင့် တော်လှန်ရေးတပ်များ တိုက်ပွဲဖြစ်ပွားခဲ့ကြပြီး စစ်ကော်မရှင်တပ်က လက်နက်ကြီးဖြင့် ရမ်းသန်းပစ်ခတ်ခြင်း ဒရုန်းဖြင့် ဗုံးကြဲခြင်းအပြင် နေအိမ်မီးရှို့ခြင်းများ လုပ်ဆောင်သောကြောင့် စစ်ဘေးရှောင် ၂ထောင်ဝန်းကျင် ထွက်ပြေးတိမ်းရှောင်ခဲ့ကြရသည်။