သျှမ်းပြည် ‘ဝ’တပ်ဖွဲ့ UWSA ထိန်းချုပ်နယ်မြေရှိ ပညာရေးကဏ္ဍတွင် မြန်မာစာနှင့် ‘ဝ’စာပေကို အထူးသင်ယူရန် ညွှန်ကြားထားကြောင်း သတင်းသိရသည်။

မတ်လ (၃) ရက်တွင် ‘ဝ’ပြည်သွေးစည်းညီညွတ်ရေးတပ်မတော် UWSA ထိန်းချုပ်ထားသည့် ဟိုပန်မြို့နယ်တွင် လုပ်ငန်းနှစ်ချုပ်အစည်းအဝေး ကျင်းပခဲ့စဉ် “နိုင်ငံတော်မှ လုံးဝ ခွဲထွက်မည်မဟုတ်” ဆိုသည့်အတိုင်း ပညာရေးကဏ္ဍတွင် မြန်မာစာနှင့် ‘ဝ’စာပေကို အထူးသင်ယူရန် ညွှန်ကြားခဲ့ကြောင်း Wa News Land မီဒီယာမှ ဖော်ပြလာသည်။

အဆိုပါ အစည်းအဝေးတွင် အဓိက အချက် (၄) ချက် ပြောဆိုဆွေးနွေးခဲ့ပြီး ပြည်သူအပေါ် ဖိနှိပ်ခြင်း၊ အာဏာအလွှဲသုံးစားလုပ်ခြင်း၊ ကျားဖြန့်နှင့် မူးယစ်ဆေးဝါး လုပ်ငန်းများတွင် ပါဝင်ပတ်သက်ခြင်း မပြုလုပ်ရန်၊ ‘ဝ’တပ်ဖွဲ့၏ မူလ ရပ်တည်ချက်အတိုင်း နိုင်ငံတော်မှ ခွဲထွက်မည် မဟုတ်ခြင်းကြောင့် မြန်မာစာကို ပထမ ဦးစားပေးနှင့် ‘ဝ’စာပေကို ဒုတိယ ဦးစားပေး သင်ယူရန် ညွှန်ကြားထားကြောင်း ‘ဝ’တပ်ဖွဲ့ တာဝန်ရှိသူတစ်ဦးကို ကိုးကား၍ Wa News Land မီဒီယာတွင် ရေးသားထားသည်။

‘ဝ’တပ်ဖွဲ့ UWSA ဌာနချုပ် ပန်ဆန်းမြို့တွင် ဖေဖော်ဝါရီလ (၈) ရက်မှ စတင်ပြီး ငါးရက်ကြာ ကျင်းပခဲ့သည့် ဗဟိုလုပ်ငန်းနှစ်ချုပ်အစည်းအဝေး ညွှန်ကြားချက်များကို အောက်ခြေအထိ ထိရောက်စွာ အကောင်အထည်ဖော်ရန် ထိုအစည်းအဝေးတွင် UWSA တာဝန်ရှိသူများက တိုက်တွန်းခဲ့ကြောင်း သိရသည်။

ယမန်နှစ် ၂၀၂၅ မေလအတွင်း စစ်ခေါင်းဆောင် မင်းအောင်လှိုင်၏ သျှမ်းပြည်အရှေ့ပိုင်း ခရီးစဉ်တွင် မိုင်းလားတပ်ဖွဲ့ NDAA ခေါင်းဆောင်များနှင့် တွေ့ဆုံခဲ့စဉ် မြန်မာနိုင်ငံသည် ပြည်ထောင်စုနိုင်ငံ ဖြစ်သဖြင့် နိုင်ငံတော်မှ ပြဋ္ဌာန်းထားသည့် ရုံးသုံးဘာသာစကားနှင့် စာပေကို တစ်နိုင်ငံလုံး အတိုင်းအတာဖြင့် တတ်မြောက်ထားရန် လိုအပ်ကြောင်း ပြောဆိုခဲ့သည်။

မြန်မာ-တရုတ်နယ်စပ်ရှိ ‘ဝ’တပ်ဖွဲ့ UWSA ၊ မိုင်းလားတပ်ဖွဲ့ NDAA နှင့် ကိုးကန့်တပ်ဖွဲ့ MNDAA ထိန်းချုပ်နယ်မြေများတွင် မြန်မာစကားနှင့် မြန်မာကျပ်ငွေထက် တရုတ်ဘာသာစကားနှင့် တရုတ်ယွမ်ငွေကြေးကို အဓိကထား အသုံးပြုလျက်ရှိကြောင်း နယ်စပ်ဒေသခံများက ပြောသည်။