သျှမ်း – ကရင်နီ နယ်စပ် မိုးဗြဲမြို့အနောက်ဘက်ခြမ်းရှိ ကျေးရွာများကို စစ်ကောင်စီတပ် နှင့် ၎င်းလက်အောက်ခံ ပအိုဝ်းပြည်သူ့စစ် (PNO) တို့ အင်အားအလုံးအရင်းဖြင့် စစ်ကြောင်းထိုးနေကြောင်း မိုးဗြဲပြည်သူ့ကာကွယ်ရေးတပ်က ယမန်နေ့ ( ဖေဖော်ဝါရီလ ၂၅ ရက်)တွင် ထုတ်ပြန်ထားသည်။
ဖယ်ခုံမြို့နယ် မိုးဗြဲမြို့ အနောက်ဘက်ခြမ်းရှိ လွယ်ယင်းမင်္ဂလာကျေးရွာ နှင့် လာမောက်ရွာဖက်ကို စစ်ကောင်စီတပ်နှင့် PNO စစ်ကြောင်းထိုးမှုများရှိနေကြောင်းကို စစ်ရေးသတင်းအရင်းမြစ်တစ်ဦးက သျှမ်းသံတော်ဆင့်ကို ပြောသည်။
“မိုးဗြဲအနောက်ဘက်ခြမ်းကို အသိထဲက အဖွဲ့တွေသွားတယ်။စစ်ကောင်စီနဲ့ ပြည်သူ့စစ်တွေ စစ်ကြောင်းထိုးလာတယ် ဆိုတာဟုတ်တယ်။အသေးစိတ်တော့ မပြောတက်ဘူး။ထိတွေ့မှုကတော့ ပုံမှန်အနည်းငယ်ရှိတယ်။ သူတို့ဘက် ကလည်း လက်နက်ကြီတွေနဲ့ အမြဲတမ်း ရမ်းပစ်နေတာမျိုး ရှိတယ်လေ”ဟု စစ်ရေးသတင်းအရင်းမြစ်တစ်ဦးက ပြောသည်။
အဆိုပါ စစ်ကောင်စီတပ်နှင့်ပအိုဝ်းပြည်သူ့စစ်တို့ ထိုးစစ်ဆင်လာသည့်အပြင် ဒရုန်း ၊ လက်နက်ကြီးများ အသုံးပြုပြီး စစ်ရှောင်ပြည်သူများကို ပစ်မှတ်ထား ရမ်းသမ်းပစ်ခတ်နေခြင်းကြောင့် သတိရှိစွာ နေထိုင်ကြရန် မိုးဗြဲပြည်သူ့ကာကွယ်ရေးတပ်မှ အသိပေးထားသည်။
ထို့အပြင် စစ်ကောင်စီတပ်ဖွဲ့တို့နှင့် ကရင်နီတော်လှန်ရေးတပ်ပေါင်းစုတို့ ကြား အချိန်မရွေး တိုက်ပွဲများ ဖြစ်ပွားလာနိုင်ခြင်းကြောင့် ပြည်သူများအနေဖြင့် ကန့်သတ်ထားသည့် နယ်မြေများအတွင်း ဖြတ်သန်း သွားလာခြင်း လုံးဝ (လုံးဝ) မပြုရန် ထုတ်ပြန်ချက်တွင်ဖော်ပြထားသည်။
ပြီးခဲ့သည့် (ဖေဖော်ဝါရီလ ၂၂ ရက်) မိုးဗြဲမြို့အတွင်းတွင် စစ်ကောင်စီတပ် နှင့်လက်အောက်ခံ ပအိုဝ်းပြည်သူစစ်တို့ ထိုးစစ်ဆင်လာခြင်းကြောင့် ကရင်နီတော်လှန်ရေး တပ်ပေါင်းစုတို့နှင့် ထိတွေ့တိုက်ပွဲများ ဖြစ်ပွားခဲ့ကြောင်း သိရသည်။
အလားတူ ယခု ဖေဖော်ဝါရီလ နောက်ဆုံးပတ်အတွင်း ဖယ်ခုံမြို့နယ် အနောက်ဘက်ခြမ်းတွင် စစ်ကောင်စီတပ် နှင့်လက်အောက်ခံ ပအိုဝ်းပြည်သူစစ်တို့ လက်နက်ကြီးများဖြင့် ရမ်းသမ်း ပစ်ခတ်နေပြီး၊ ထိုးစစ်ဆင်မှုများလည်း ရှိခဲ့ကြောင်း စစ်ရေးသတင်းအရင်းမြစ်တစ်ဦးက ပြောသည်။
Leave a Comments