သျှမ်းပြည် လားရှိုးမြို့ “တွမ်ကျားကုန်စုံဆိုင်”ရှိ အမျိုးသမီးတစ်ဦးကို အမည်မသိ လက်နက်ကိုင် လူတစ်စုက ပြန်ပေးဆွဲ ဖမ်းဆီးသွားကြောင်း စုံစမ်းသိရသည်။
ယမန်နေ့ (ဖေဖော်ဝါရီလ ၂၄ ရက်) ညနေ ၄ နာရီခွဲကျော်တွင် လားရှိုးမြို့ ရပ်ကွက် (၅) ရှိ “တွမ်ကျားကုန်စုံဆိုင်” အတွင်း ထိုင်နေသည့် အမျိုးသမီးတစ်ဦးကို အမည်မသိ လက်နက်ကိုင် အမျိုးသား (၃) ဦးက ဝင်ရောက်ဖမ်းဆီးကာ ပြန်ပေးဆွဲ ခေါ်ဆောင်သွားကြောင်း လားရှိုးမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဈေးနားလေးက တွမ်းကျား ကုန်စုံဆိုင်ရဲ့ ပိုင်ရှင်ကို လူ ၃ ယောက်၊ ၄ ယောက်လောက်က ဝင်ပြီး ဖမ်းခေါ်သွားတာ။ အရပ်အမောင်းနဲ့ လှုပ်ရှားတဲ့ ပုံစံကို ကြည့်ရင်တော့ လက်နက်ကိုင် အဖွဲ့တွေထဲက ဖြစ်နိုင်တယ်”ဟု လားရှိုးမြို့ဒေသခံ အမျိုးသားတစ်ဦးက ပြောသည်။
ထိုပြန်ပေးဆွဲခံရသည့် အမျိုးသမီးသည် အသက် ၂၃ နှစ် ဝန်းကျင်ရှိ မယဉ်ယဉ်ထွန်း ဖြစ်ကြောင်း သိရသည်။
ပြီးခဲ့သည့် ဖေဖော်ဝါရီလ ၁ ရက်တွင်လည်း လားရှိုးမြို့ပေါ် ရပ်ကွက် (၄) ရှိ “ကျော်သရဖူ ရွှေဆိုင်”၏ ရွှေပန်းတိမ် လုပ်ငန်းရှိရာ နေအိမ်သို့ အမည်မသိ လက်နက်ကိုင် လူတစ်စုမှ ဓားပြတိုက် လုယက်ခဲ့ခြင်းကြောင့် ရွှေသား (၅) ပိဿာခန့်နှင့် ကျပ်ငွေ သိန်းတစ်ထောင်ကျော် ဆုံးရှုံးသွားခဲ့ကြောင်း သိရသည်။
လားရှိုးမြို့တွင် စစ်ကော်မရှင်တပ်ဖွဲ့ဝင်များ မြို့တွင်းလုံခြုံရေး ယူထားသည့်ကြားမှ လူသတ်မှု၊ ဓားပြတိုက် လုယက်မှုတို့ ဆက်တိုက် ဖြစ်ပွားနေခြင်းကြောင့် မြို့နေပြည်သူများအကြား တရားဥပဒေ စိုးမိုးရေးနှင့် လုံခြုံရေး အခြေအနေအပေါ် မေးခွန်းထုတ်မှုများ မြင့်တက်လျက် ရှိသည်။
လားရှိုးမြို့အတွင်းရှိ ရပ်ကွက် (၁၂) ခုကို စစ်ကော်မရှင်တပ်က ထိန်းချုပ်ထားပြီး မြို့အပြင်ရှိ ကျေးရွာအုပ်စု အများစုကို ကိုးကန့်တပ်ဖွဲ့ MNDAA က ထိန်းချုပ်ထားသည်။
Leave a Comments