သျှမ်းပြည်အရှေ့ပိုင်း တာချီလိတ်မြို့တွင် အမျိုးသမီးငယ်တစ်ဦး ရက်အတော်ကြာ ပျောက်ဆုံးခဲ့ပြီးနောက် မိသားစုမှ ရဲစခန်းသို့ အမှုဖွင့်ရန် သွားရောက်တိုင်ကြားချိန်မှ ၎င်းအမျိုးသမီးအလောင်း မီးသင်္ဂြိုလ်ပြီးဖြစ်နေကြောင်း စုံစမ်းသိရသည်။

ဖြစ်စဉ်မှာ အသက် ၂၁ နှစ် အရွယ်ရှိ အမျိုးသမီးငယ်တစ်ဦးသည် ပြီးခဲ့သည့် (ဖေဖော်ဝါရီ ၁၃ ရက်) တွင် တာချီလိတ်မြို့ (Sky Club 1688 KTV) မှ အပြန်တွင် ပျောက်ဆုံးသွားခဲ့ကြောင်း သေဆုံးသူနှင့် နီးစပ်သည့် ဆွေမျိုးတစ်ဉီးက သျှမ်းသံတော်ဆင့်ကို ပြောသည်။

“1688 KTV မှာ သွားလည်ပြီး ပျောက်သွားတာ။ လူများတွေ နောက်ဆုံးတွေ့တာတော့ ဗိုလ်ကြီးတစ်ယောက်နဲ့ ထွက်သွားတယ် ပြောတယ်။ သေချာလားဆိုတာတော့ မပြောတတ်ဘူး”ဟု ဆွေမျိုးနီးစပ်သူ အမျိုးသမီးတစ်ဦးက ပြောသည်။

အဆိုပါအမျိုးသမီး ပျောက်ဆုံးသွားပြီးနောက် ၃ ရက်အကြာ (ဖေဖော်ဝါရီလ ၁၆ ရက်) တွင် စောင်ဖြင့် ပတ်ထားသည့် ရုပ်အလောင်းကို တာချီလိတ်မြို့ အရှေ့မြို့ပတ်လမ်း တစ်နေရာတွင် တွေ့ရှိခဲ့ကြောင်း သိရသည်။

အသက် ၂၁ နှစ်အရွယ်ရှိ ထိုအမျိုးသမီးငယ် ပျောက်ဆုံးသည့်အကြောင်းကို ၎င်း၏ အစ်မဖြစ်သူက တာချီလိတ်မြို့ ဟောင်လိတ်ရဲစခန်းသို့ အမှုဖွင့် တိုင်ကြားရန် သွားရောက်ချိန်တွင် စစ်တပ်လက်အောက်ခံ ရဲတပ်ဖွဲ့မှ မီးသင်္ဂြိုဟ်ပြီးဖြစ်ကြောင်း၊ မိသားစုဝင်များကို အကြောင်းမကြားဘဲ မီးသင်္ဂြိုဟ်ခဲ့ကြောင်း သိရသည်။

“သူ့ရဲ့ အစ်မက လူပျောက်တယ်ဆိုပြီး တင်ထားတာ ၃ ရက်ရှိပြီ။ အိမ်ပြန်မလာသေးဘူး ဆိုပြီး ရဲစခန်းသွားမေးမှ မီးသင်္ဂြိုဟ်လိုက်ပြီ ပြောတာ။ သူ့ကို ပြန်တွေ့တော့ မြို့ပတ်လမ်းမှာ စောင်နဲ့ လာပစ်ထားသွားတယ်တဲ့။ အလောင်းကို မိသားစုဝင်တွေ တစ်ယောက်မှ မတွေ့လိုက်ရဘူး၊ သူ့ရဲ့ နောက်ဆုံးခရီးကိုတောင် မိသားစုဝင်တွေက ဘာမှ မသိလိုက်ရဘူး”ဟု ၎င်းအမျိုးသမီးက ဆက်ပြောသည်။

လက်ရှိတွင် အဆိုပါ အမှုအခင်းနှင့် ပတ်သက်ပြီး သေဆုံးသူ၏ မိသားစုကို ဆက်သွယ်သိရှိသည်အထိ မစောင့်ဘဲ ရဲတပ်ဖွဲ့မှ အလောင်းဖျောက် မီးသင်္ဂြိုဟ်လိုက်သည့် ကိစ္စအပေါ် မြို့ခံများမှ အကြီးအကျယ် ဝေဖန်မှုများ ရှိနေကြောင်း သေဆုံးသူ၏ သူငယ်ချင်းတစ်ဦးက သျှမ်းသံတော်ဆင့်ကို ပြောသည်။

“လူမှုကူညီရေးအဖွဲ့က ဆေးရုံတင်ပြီး ထားတော့ အနံ့ထွက်တယ်ဆိုပြီး မီးသင်္ဂြိုဟ်ပစ်လိုက်တာ လို့ ပြောတယ်။ အခု ဒီကိစ္စက တမင်ဖုံးထားသလို ဖြစ်နေတယ်။ အရင်က လမ်းဘေးမှာ ပိုင်ရှင်မဲ့ အလောင်း သေနေရင်တောင် တင်တာကို”ဟု ၎င်းသူငယ်ချင်းဖြစ်သူက ပြောဆိုသည်။

စစ်အာဏာသိမ်းပြီးနောက်ပိုင်း ထိုင်း-မြန်မာနယ်စပ်ရှိ တာချီလိတ်မြို့တွင် တရားဥပဒေစိုးမိုးမှု ကင်းမဲ့လာသည့်အပြင် အပြစ်မဲ့ ပြည်သူများ ပျောက်ဆုံးခြင်း၊ ပြန်ပေးဆွဲခံရခြင်း စသည့် ပြစ်မှုကျူးလွန်ခြင်း အမျိုးမျိုးကို ခံနေရသည့် အပြင် သက်ဆိုင်ရာ တာဝန်ရှိသူများမှ ထိရောက်စွာ အရေးယူပေးနိုင်ခြင်း မရှိ‌ကြောင်း ဒေသခံများက ပြောသည်။