သျှမ်းပြည် ‘ဝ’တပ်ဖွဲ့ UWSA ထိန်းချုပ်နယ်မြေအတွင်း အွန်လိုင်းငွေလိမ် ကျားဖြန့်လုပ်ငန်းများကို လက်ခံကာကွယ်ပေးခဲ့သည့် ဒုတပ်ရင်းမှူးနှင့် တပ်ခွဲမှူးအဆင့် ‘ဝ’အရာရှိနှစ်ဦး ထောင်ဒဏ်ချမှတ်ခံရကြောင်း စုံစမ်းသိရသည်။

‘ဝ’ပြည်သွေးစည်းညီညွတ်ရေးတပ်မတော် UWSA ၏ တပ်မဟာ တစ်ခုတွင် ဒုတပ်ရင်မှူး တာဝန်ထမ်းဆောင်နေသူ အသက် (၃၀) နှစ်အရွယ် ကျိုးရှီးကုန်း (Zhou Xigong) ဆိုသူကို ကျားဖြန့်သမားများကို လက်ခံထားပြီး အကာအကွယ်ပေးခြင်းနှင့် နေရာရွှေ့ပြောင်းရာတွင် ကူညီပေးခြင်းတို့ကြောင့် ရာထူးမှ ရပ်စဲကာ ထောင်ဒဏ် (၃) နှစ် ချမှတ်လိုက်ကြောင်း UWSA ဘက်မှ ယမန်နေ့ (ဖေဖော်ဝါရီလ ၁၅ ရက်) တွင် ထုတ်ပြန်ခဲ့သည်။

အလားတူ ‘ဝ’တပ်ဖွဲ့တွင် တပ်ခွဲအဆင့် နိုင်ငံရေးမှူး တာဝန်ထမ်းဆောင်နေသူ အသက် (၃၉) နှစ်အရွယ် လော်ယွန်းကိုင် (Luo Yungai) ဆိုသူကို ကျားဖြန့်သမားများ နေရာရွှေ့ပြောင်းရာတွင် ကူညီပေးခဲ့ခြင်းကြောင့် တာဝန်မှ ထုတ်ပယ်ကာ ထောင်ဒဏ် (၁) နှစ် ချမှတ်လိုက်ကြောင်း UWSA လက်အောက်ခံ တရားစီရင်ရေးကော်မတီ ထုတ်ပြန်ချက်အရ သိရသည်။

ပြီးခဲ့သည့် ဖေဖော်ဝါရီလ (၃) ရက်တွင် မိုင်းရယ်မြို့နယ်ရှိ ဟိုက်ပုကျေးရွာအနီး ကျားဖြန့်လုပ်ငန်းတစ်ခုကို စစ်ကော်မရှင်တပ်နှင့်အတူ ‘ဝ’တပ်ဖွဲ့ UWSA တပ်သားများလည်း ပူးပေါင်းပါဝင်ခဲ့ကြောင်း ‘ဝ’ပြင်ပဆက်ဆံရေးတာဝန်ခံ ဦးညီရမ်းက Wa News Land မီဒီယာတွင် အတည်ပြု ဖြေကြားထားသည်။

အခြားတစ်ဘက်တွင် ‘ဝ’တပ်ဖွဲ့ UWSA အရာရှိဟောင်း ကျားဖြန့်ဂိုဏ်းခေါင်းဆောင် ၂ ဦးကို တရုတ်နိုင်ငံမှ ၂၀၂၃ အောက်တိုဘာလ ၁၂ ရက်ကတည်းက ဖမ်းဝရမ်းထုတ်ခဲ့ပြီး ဖမ်းမိပါက တရုတ်ယွမ် တစ်သိန်းမှ ငါးသိန်းအထိ ဆုကြေးပေးမည်ဟုလည်း ကြေညာထားသော်လည်း လက်ရှိအချိန်ထိ ဖမ်းဆီးရမိကြောင်း ထုတ်ဖော်ပြောဆိုခြင်း မရှိသေးပေ။

တရုတ်အလိုရှိနေသည့် ‘ဝ’တပ်ဖွဲ့ UWSA ၏ ဆောက်လုပ်ရေးဌာနမှ ပေါက်အိုက်ပန်း (Chen Yanban) နှင့် မိုင်းလင်းခရိုင်မှူး အိုက်ဟော့ (Sheng Yankui) တို့ကို ပြီးခဲ့သည့် ၂၀၂၄ ခုနှစ်အတွင်း မိုင်းရှူးနှင့် တန့်ယန်းမြို့နယ်ဘက်အထိ တရုတ်ရဲဝတ်စုံ ဝတ်ဆင်ထားသည့် လက်နက်ကိုင်တပ်ဖွဲ့မှ လာရောက်ရှာဖွေခဲ့ကြောင်း စစ်ရေးသတင်းရင်းမြစ်ထံမှ သိရသည်။

‘ဝ’တပ်ဖွဲ့ UWSA ကလည်း တရုတ်နိုင်ငံ ဖမ်းဝရမ်း ထုတ်ထားသည့် ၎င်းတို့အရာရှိ ၂ ဦးကို ၂၀၂၃ အောက်တိုဘာလ ၁၆ ရက်တွင် ရာထူးက ထုတ်ပယ်ခဲ့ပြီး စစ်ကော်မရှင်ဘက်ကလည်း ၂၀၂၃ အောက်တိုဘာလ ၁၈ ရက်တွင် ဖမ်းဝရမ်း ထပ်မံထုတ်ထားခဲ့သည်။