သျှမ်းပြည်-မန္တလေးတိုင်းနယ်စပ်ရှိ မိုးကုတ်မြို့နှင့် မိုးမိတ်မြို့ကြားတွင် စစ်ကော်မရှင်တပ်မှ ကုန်တင်ယာဉ်နှင့် ခရီးသည်တင်ယာဉ်များထံမှ လမ်းကြေးအဆမတန် တောင်းခံနေကြောင်း စုံစမ်းသိရသည်။

စစ်ကော်မရှင် ပြန်လည်ထိန်းချုပ်ထားသည့် မိုးမိတ်မြို့သို့ ရောက်ရှိနိုင်သည့် သပိတ်ကျင်း-တွင်းငယ်-မိုးမိတ်လမ်းပိုင်းနှင့် မိုးကုတ်-မိုးမိတ်လမ်းပိုင်းရှိ စစ်ကော်မရှင်ဂိတ်များမှ ကုန်တင်ယာဉ်နှင့် ခရီးသည်တင်ယာဉ်များထံ ဇန်နဝါရီလ နောက်ဆုံးပတ်မှ စတင်ပြီး လမ်းကြေး အဆမတန် တောင်းခံနေကြောင်း ဒေသခံများက ပြောသည်။

“မိုးမိတ်ကို ရောက်တဲ့ လမ်းတွေကတော့ နေ့တိုင်း သွားလာလို့ မရတော့ဘူး။ မြို့အောက်ဘက်က စစ်ရေးဖြစ်နေတဲ့ နေရာတွေ အထူးသဖြင့် ကြိမ်တောရွာဘက်မှာ ဖြစ်တယ်။ အဲ့ဘက်က စစ်တပ်ဂိတ်တွေမှာ အခွန်အကောက် တောင်းတာ များတယ်၊ အစစ်အဆေးကတော့ အဲ့လောက်ကြီး မကြမ်းပေမယ့် လမ်းကြေးတောင်းတာ အရမ်းများတယ်”ဟု မိုးကုတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

စစ်ကော်မရှင်တပ်မှ သပိတ်ကျင်း-တွင်းငယ်-မိုးမိတ် လမ်းပိုင်းကို အလုံးစုံ ထိန်းချုပ်နိုင်ရန် ကချင်လွတ်လပ်ရေးတပ် KIA ၊ PDF ပူးပေါင်းတပ်များနှင့် နေ့စဉ်နီးပါး တိုက်ပွဲဖြစ်ပွားနေပြီး လက်ရှိတွင် အောက်မန်ကျည်းပင်ရွာမှတဆင့် ပသင်၊ ကြိမ်တောရွာဘက်မှ ကွေ့ပတ်၍ ရေတံခွန်ရွာ၊ မိုးဟောက်ရွာဘက် ခရီးဆက်ရကြောင်း ဒေသခံများထံမှ သိရသည်။

အလားတူ အဆိုပါလမ်းကြောင်းတစ်လျှောက်တွင် တော်လှန်ရေးအင်အားစု PDF တပ်များလည်း အစစ်အဆေး တင်းကြပ်ထားပြီး ခရီးသည်များထံ မှတ်ပုံတင်စစ်ဆေးခြင်း၊ ယာဉ်အတွင်း မူးယစ်ဆေးဝါးနှင့် လက်နက်ခဲယမ်း စစ်ဆေးခြင်းများ ပြုလုပ်နေကြောင်း ယာဉ်လိုင်းပြေးဆွဲနေသည့် ကားသမားတစ်ဦးက ပြောသည်။

“PDF ဘက်က လက်နက်ကြီး မဟုတ်ရင်လည်း ဒရုန်းနဲ့ ဗုံးချနေတာတော့ ရှိတယ်။ နောက်ပြီးတော့ လမ်းပိုင်းတွေမှာ ခရီးသည်တွေကို မှတ်ပုံတင် တောင်းစစ်တယ်။ ဒီဘက်က လက်နက်ကိုင် အဖွဲ့လည်း များတော့ တချို့ဂိတ်ဆို ဘုန်းကြီးလည်း မချန်ဘူး စစ်တာကြမ်းတယ်။ ကားထဲလည်း လက်နက်ပါလား၊ မူးယစ်ဆေးပါလား ဆိုပြီးတော့ ကြည့်တယ်” ဟု မိုးမိတ်မြို့မှ အဆိုပါ ယာဉ်မောင်းအမျိုးသားက သျှမ်းသံတော်ဆင့်ကို ဆက်ပြောသည်။

မိုးမိတ်မြို့မှ တအာင်း(ပလောင်) အမျိုးသားလွတ်မြောက်ရေးတပ်မတော် TNLA တပ်ဆုတ်ခဲ့ပြီးနောက် စစ်ကော်မရှင်တပ် ပြန်လည်ဝင်ရောက် တပ်စွဲထားသည်မှာ နှစ်လကျော် ရှိလာသော်လည်း မြို့အနီးတဝိုက်ရှိ PDF တပ်ဖွဲ့များနှင့် နေ့စဉ်နီးပါး တိုက်ပွဲဖြစ်ပွားနေပြီး အုပ်ချုပ်ရေးယန္တရား မလည်ပတ်နိုင်သေးကြောင်း ဒေသခံများက ပြောသည်။

ပြီးခဲ့သည့် ဖေဖော်ဝါရီလ ၆ ရက် ညဦးပိုင်းတွင် မိုးမိတ်မြို့ ရွှေဇာလီကျေးရွာရှိ စစ်ကော်မရှင်တပ်၏ လက်နက်ခဲယမ်းများ သိုလှောင်ထားသည့် နေအိမ်တစ်ခုတွင် ဆေးလိပ်မီးမှတဆင့် ဓာတ်ဆီပုံးသို့ ကူးစက်ပြီး လက်နက်ခဲယမ်းများပါ မီးလောင်ပေါက်ကွဲမှု ဖြစ်ပွားခဲ့ကြောင်း မိုးမိတ်ဒေသခံများထံမှ သိရသည်။

ထို့အပြင် မန္တလေး-သပိတ်ကျင်း-မိုးကုတ်လမ်းပိုင်းတွင်လည်း ခရီးသည်တင်ယာဉ်နှင့် ကုန်တင်ယာဉ်များကို စစ်ကော်မရှင်ဘက်မှ အချိန်အကန့်အသတ်ဖြင့် ဖြတ်သန်းခွင့်ပြုထားသော်လည်း ယာဉ်စီးခမြင့်မားနေခြင်းကြောင့် စစ်ဘေးရှောင်များမှာ နေရပ်ပြန်ရန် အခက်အခဲ ကြုံတွေ့နေရကြောင်း သိရသည်။