သျှမ်းပြည် ဟိုပုံးမြို့နယ် လုံခုတ်ကျေးရွာအုပ်စုရှိ မြေဧရိယာ (၅၆၁.၇၅) ဧကကို နိုင်ငံတော်ပိုင် ဟုဆိုကာ လာမည့် ဖေဖော်ဝါရီလ (၂၇)ရက်နေ့တွင် အပြီးဖျက်သိမ်းပေးရန် စစ်ကော်မရှင်လက်အောက်ခံ ဒေသဦးစီးအဖွဲ့က ထုတ်ပြန်လာသည်။
ပြီးခဲ့သည့် ၂၀၂၅ ခုနှစ် အောက်တိုဘာလတွင် မြေလွတ်မြေလပ်နှင့် မြေရိုင်းများ စီမံခန့်ခွဲရေး ဗဟိုကော်မတီမှ ခွင့်ပြုမိန့် ရရှိပြီးဖြစ်၍ ဟိုပုံးမြို့နယ် လုံခုတ်ကျေးရွာအုပ်စုရှိ အဆိုပါ မြေပေါ်တွင် စိုက်ပျိုးလုပ်ကိုင်သူများနှင့် အဆောက်အဦ ဆောက်လုပ်နေထိုင်သူများကို ပြန်လည် နေရာချထားရန် တာဝန်ရှိသူများက ပြည်သူများထံ အသိပေးထားပြီး မဖျက်သိမ်းလျှင် အင်အားသုံး ဖယ်ရှားမည်ဟု အဆိုပါ ထုတ်ပြန်ချက်တွင် ထည့်သွင်းဖော်ပြထားသည်။
စစ်ကော်မရှင်လက်အောက်ခံ ဒေသဦးစီးအဖွဲ့မှ အတင်းအဓမ္မ ဖယ်ရှားခိုင်းသည့် အဆိုပါ မြေနေရာများသည် ၁၉၉၂ ခုနစ်ကတည်းက ဘိုးဘွားစဉ်ဆက် လုပ်ကိုင်လာခဲ့သည့် မြေများဖြစ်ကြောင်း ဒေသခံများက ပြောသည်။
“ဒီမြေက ဘိုးဘွားစဉ်ဆက် လုပ်ကိုင်ခဲ့တဲ့ မြေဖြစ်တယ်၊ အခုမှ မြေလွတ်မြေလပ် ဆိုပြီး ခေါင်းစဉ်နဲ့ နေရာဖယ်ခိုင်းတာ။ အစိုးရပိုင်မြေ ပြည်သူတွေက ကျူးကျော်တဲ့သူ ဆိုပြီး အဲ့လိုအမည်တပ်ပြီး မောင်းထုတ်နေတာ”ဟု ဟိုပုံးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့ကြောင့် ၎င်းမြေနေရာတွင် နေထိုင်သူများကို ပြန်လည်နေရာချထားနိုင်ရန်အတွက် မြေကွက်ဖော်ခြင်း၊ လမ်းဖောက်ခြင်း၊ လျှပ်စစ်မီးရရှိရေး လုပ်ငန်းများ စတင်ဆောင်ရွက်နေပြီး နေအိမ်ဆောက်လုပ် နေထိုင်သူများနှင့် စိုက်ပျိုးလုပ်ကိုင်သူများက သတ်မှတ်ရန်ပုံငွေ ပေးသွင်း၍ ပြန်လည်နေရာချထားပေးမည်ဟု ဆိုသည်။
“အခုဟာက မြေနေရာကလည်း အိမ်တွေဖျက်၊ လူတွေ အကုန်ထွက်ပြီးတော့ ကိုယ့်အိမ်နေရာမှာ ပြန်ပြီး အိမ်ဆောက်နေဖို့ သူတို့ကို သိန်း (၄၀) ရန်ပုံငွေ သွင်းရမယ်တဲ့။ ကိုယ့်နေရာကိုယ် ပိုက်ဆံပြန်ပေးပြီး ဝယ်နေရသလို ဖြစ်နေတာ။ PNO နဲ့ မြေပွဲစားတွေ ပေါင်းပြီး နှင်ထုတ်တဲ့ သဘောပဲ”ဟု အသက် ၃၀ ဝန်းကျင် ဒေသခံ အမျိုးသား တစ်ဦးက ပြောသည်။
လုံခုတ်ကျေးရွာအုပ်စုသည် နောင်တောင်းကျောင်း မြောက်ဘက်တွင်ရှိပြီး အဆိုပါ မြေပေါ်တွင် ခွင့်ပြုမိန့်မရှိဘဲ ဆောက်လုပ်ထားသည့် အဆောက်အဦများကို လာမည့် ဖေဖော်ဝါရီလ (၂၇)ရက်နေ့တွင် အပြီးဖျက်သိမ်းပေးရန်နှင့် ရွှေ့ပြောင်းခြင်း မရှိသည့် မြေနေရာများကို အင်အားသုံးကာ ဖယ်ရှား ရှင်းလင်းသွားမည်ဟု စစ်ကော်မရှင်လက်အောက်ခံ ဒေသဦးစီးအဖွဲ့မှ ဖွဲ့စည်းထားသည့် ကျူးကျော်များ ရှင်းလင်းနေရာ ချထားရေး လုပ်ငန်းကော်မတီက ထုတ်ပြန်ထားသည်။
ပြီးခဲ့သည့် ဇန်နဝါရီလ တတိယပတ်တွင် ဟိုပုံးမြို့နယ် နောင်တောင်းဘုန်းကြီးကျောင်း တောင်ဘက်ရှိ ညောင်ဗင်ကျေးရွာမှ အိမ်ခြေ တစ်ရာကျော်ကို မြေပွဲစားများက စစ်တပ်လက်အောက်ခံ ရဲတပ်ဖွဲ့နှင့် PNO တို့ကို ခေါ်လာပြီး ဒေသခံများ ပိုင်ဆိုင်သည့် မြေနေရာကို တပ်ပိုင်နယ်မြေဟု ပြောဆိုကာ အမြန်ဆုံး ဖယ်ရှားပေးရန် လာရောက်ခြိမ်းခြောက်မှု ပြုလုပ်ခဲ့သည်။
Leave a Comments