သျှမ်းပြည်တောင်ပိုင်း၊ ရွာငံမြို့နယ် လယ်ကိုင်းကျေးရွာမှ ဒေသခံ (၄)ဦးကို အမည်မသိ လက်နက်ကိုင်အဖွဲ့မှ လာရောက်ဖမ်းဆီး ခေါ်ဆောင်သွားပြီး နှစ်ပတ်ကျော် ကြာသည်အထိ အဆက်အသွယ် ပြန်မရသေးကြောင်း သတင်းရရှိသည်။
ဖြစ်စဉ်မှာ ဇန်နဝါရီလ နောက်ဆုံးပတ် ည ၁၀ နာရီခန့်တွင် ရွာငံမြို့နယ် လယ်ကိုင်းကျေးရွာနေ အသက် ၄၀ မှ ၆၀ နှစ်ခန့်ရှိ ပြည်သူ (၄)ဦးကို အမည်မသိ လက်နက်ကိုင်အဖွဲ့မှ အရပ်ဝတ်ဖြင့် လာရောက်ဖမ်းဆီး ခေါ်ဆောင်သွားခဲ့ကြောင်း ဒေသခံများက ပြောသည်။
ထိုသို့ ဖမ်းဆီးခေါ်ဆောင်ခံရပြီးနောက် ယနေ့ (ဖေဖော်ဝါရီလ ၉ ရက်) အထိ နှစ်ပတ်ကျော်ကြာ အဆက်အသွယ် ပြန်မရဘဲ အကြောင်းပြချက်မရှိ ဖမ်းဆီးခေါ်ဆောင်ခံရခြင်းကြောင့် မိသားစုဝင်များမှ စိုးရိမ်ပူပန်နေကြောင်း ဒေသခံများက သျှမ်းသံတော်ဆင့်ကို ပြောသည်။
“ဖမ်းသွားတာ ဟုတ်တယ်၊ ဘယ်အဖွဲ့က ဖမ်းတယ် ဆိုတာတော့ မသိရသေးဘူး။ ဒီနေ့အထိ အစအန မရသေးတော့ သေမလား ရှင်မလားလည်း မသိဘူး၊ မိသားစုဝင်တွေကတော့ စိုးရိမ် ပူပန်နေကြတာ”ဟု ဖြစ်စဉ်သိရှိသူ ရွာငံဒေသခံ အမျိုးသား တစ်ဦးက ပြောသည်။
ဖမ်းဆီးခေါ်ဆောင်ခံရသော ပြည်သူများမှာ ရွာငံမြို့နယ် လယ်ကိုင်းကျေးရွာနေ အသက် ၅၄ နှစ်အရွယ် ဦးစံရွှေမြင့်၊ အသက် ၄၃ နှစ်အရွယ် ဦးကျော်မိုးသူ၊ အသက် ၄၄ နှစ် အရွယ် မဝေဆုလှိုင်နှင့် အသက် ၆၃ နှစ်အရွယ် အမျိုးသား တစ်ဦးတို့ ပါဝင်ကြောင်း ဒေသခံများထံမှ သိရသည်။
ရွာငံမြို့နယ်တွင် ပြည်သူများကို လက်နက်ကိုင်တပ်ဖွဲ့များက ဖမ်းဆီးခြင်း၊ စစ်ကော်မရှင်တပ်မှ အကြောင်းမဲ့ ဖမ်းဆီးခြင်းတို့ကြောင့် လုံခြုံမှု မရှိဘဲ စိုးရိမ်စိတ်ဖြင့် ရှင်သန်နေရကြောင်း ဒေသခံ အမျိုးသမီးတစ်ဦးက ပြောသည်။
“ခုတလောက အခြေအနေ သိပ်ကောင်းတဲ့ထဲ မပါဘူး။ လက်နက်ကိုင်တွေကလည်း များတယ်၊ တစ်ခုခုဆို ဘယ်အဖွဲ့မှန်း မသိဘူး။ လက်နက်ကိုင်ပြီး ပြန်ပေးဆွဲသွားတာလားတောင် မပြောတတ်တော့ဘူး။ ဘယ်နားမှ မလုံခြုံတော့ဘူး၊ ကိုယ့်အိမ်ကိုယ် နေတာတောင် မလုံခြုံဘူး”ဟု အဆိုပါ ရွာငံဒေသခံ အမျိုးသမီးက ပြောသည်။
အဆိုပါ ဖမ်းဆီးခံရသော ဒေသခံ(၄)ဦးသည် လက်နက်ကိုင် တပ်ဖွဲ့များနှင့် ချိတ်ဆက်မှု မရှိဘဲ နိုင်ငံရေး တက်ကြွလှုပ်ရှားသူများလည်း မဟုတ်ကြောင်း ၎င်းအမျိုးသမီးက ဆက်ပြောသည်။
လက်ရှိ ရွာငံမြို့နယ်တွင် ဓနုပြည်နယ် အမျိုးသားလွတ်မြောက်ရေးတပ် (DSNDA)၊ ဓနုပြည်သူ့ လွတ်မြောက်ရေးတပ်တော် (DPLA) ၊ စစ်ကော်မရှင်တပ်နှင့် ၎င်းလက်အောက်ခံ ပျူစောထီးများ၊ ပအိုဝ်းပြည်သူ့စစ် (PNO) တပ် စသည်တို့က နယ်မြေစိုးမိုးထားသည်။
ယမန်နှစ် ၂၀၂၅ ဇွန်လ (၁၁) ရက် နံနက်ပိုင်းတွင်လည်း တောင်ကြီး-ရွာငံလမ်းပိုင်း တစ်နေရာ၌ ထွေအုပ်ဝန်ထမ်း (၃)ဦးကို လက်နက်ကိုင်အဖွဲ့တစ်ခုမှ ဖမ်းဆီးခေါ်ဆောင်သွားခဲ့ပြီး မည်သည့် အဖွဲ့မှ ခေါ်ဆောင်သွားသည်ကို ယနေ့အထိ ထုတ်ပြန်ချက် တစုံတရာ ထုတ်ပြန်လာခြင်း မရှိသေးကြောင်း သတင်းရင်းမြစ်များထံမှ သိရသည်။
Leave a Comments