သျှမ်းပြည် မူဆယ်မြို့တွင် စစ်ကော်မရှင်လက်အောက်ခံ ယာဉ်ထိန်းရဲများနှင့် ၎င်းလက်ဝေခံ အပေါင်းအပါများ ငွေတောင်းကြမ်းနေကြောင်း သတင်းရရှိသည်။

ပြီးခဲ့သည့် ၂၀၂၅ ဒီဇင်ဘာလမှ စပြီး မြန်မာ – တရုတ်နယ်စပ် မူဆယ်မြို့ရှိ ဆင်ဖြူဂိတ်တွင် စစ်ကော်မရှင်လက်အောက်ခံ ယာဉ်ထိန်းရဲများနှင့် ၎င်းတို့ လက်ဝေခံ အပေါင်းအပါများ ငွေတောင်းကြမ်းနေကြောင်းကို မူဆယ်မြို့နေ ကိုယ်တိုင်ကြုံတွေ့ခဲ့ရသည့် ကုန်သည် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“သူတို့က တရုတ်ဘက်ကနေ ဝင်လာတဲ့ ကားတွေကို ပိုက်ဆံတောင်းနေတာ။ တရုတ်ကားလည်း တောင်းတာပဲ၊ မြန်မာနိုင်ငံက ကားလည်း တောင်းတာပဲ။ ကျမတို့ကားဆို အဝင်အထွက် နေ့တိုင်း ပေးနေရတာ၊ ဘာမှ မစစ်ဘူး ကားအကြီးအသေး မရွေး ကောက်တယ်။ ကားအလွတ်ဖြစ်ဖြစ်၊ ကုန်ပစ္စည်း ပါတာဖြစ်ဖြစ် အကုန်ကောက်တာ”ဟု မူဆယ်မြို့နေ ကိုယ်တိုင်ကြုံတွေ့နေရသည့် ကုန်သည်အမျိုးသမီးတစ်ဦးက ပြောသည်။

ထိုဆင်ဖြူနယ်စပ်ဂိတ်တွင် ယာဉ်ထိန်းရဲများက ၎င်း၏ လက်ဝေခံ အပေါင်းအပါများကို ယူနီဖောင်း ပေးဝတ်ကာ ငွေကောက်ခိုင်းခြင်းများ ရှိနေကြောင်း အသက် ၃၅ နှစ်အရွယ် မူဆယ်မြို့နေ တပိုင်တနိုင် ကုန်ကူးနေသည့် အမျိုးသမီးတစ်ဉီးက ပြောသည်။

“အပြင်လူတွေကို ယူနီဖောင်း ပေးဝတ်၊ ဝေါကီတော်ကီတွေ ပေးကိုင်ထားပြီး ခြိမ်းခြောက် ငွေကောက်တာ။ ငွေမပေးရင် ဖမ်းမယ်၊ ဆီးမယ်ဆိုပြီး ခြိမ်းခြောက်တာတွေကလည်း လုပ်တယ်။ တခါတလေ ၁၀ ယွမ်၊ ၂၀ ယွမ်။ တစ်ရက်နဲ့ တစ်ရက် မတူဘူး နေ့တိုင်းပေးရတာ”ဟု မူဆယ်မြို့နေ ကိုယ်တိုင်ကြုံတွေ့နေရသည့် အဆိုပါ အမျိုးသမီးက ပြောသည်။

အဆိုပါ ယာဉ်ထိန်းရဲများမှ နေ့စဉ်နီးပါး ငွေတောင်းကြမ်းနေခြင်းကြောင့် ကုန်စည်သယ်ဆောင်နေသည့် ပြည်သူများအတွက် အခက်အခဲများ ဖြစ်စေကြောင်း ၎င်းအမျိုးသမီးက ဆက်ပြောသည်။

“ကျမတို့ သျှမ်းပြည်ကလူတွေ ဟိုဘက်ကနေ ကုန်ပစ္စည်းလေးတွေ သယ်လာရင် တစ်ခေါက်ကို မြန်မာငွေ ၁ သောင်း၊ ၂ သောင်းလောက်ပဲ ကျန်တာ။ အဲ့ဒါကို သူတို့ကို ပေးရတော့ မိသားစု စားဝတ်နေရေးတောင် မလောက်ငှဘူး။ နေ့တိုင်းလိုလို ဖြစ်နေတာပါ၊ တချို့တွေက မနက်ကတည်းက စောင့်နေတာ ပစ္စည်သယ်ဖို့”ဟု အဆိုပါ အမျိုးသမီးက ထပ်လောင်းပြောသည်။

သျှမ်းသံတော်ဆင့်မှ လက်ခံရရှိထားသည့် တိုင်ကြားစာတစ်ခုတွင် မူဆယ်မြို့နယ်ရှိ မြန်မာ-တရုတ် နှစ်နိုင်ငံ နယ်စပ်ဂိတ်ဖြစ်သည့် ဆင်ဖြူဂိတ်တွင် သက်သေခံကတ် တာဝန်ပေးအပ်မှု အမိန့် တစုံတရာ မရှိ၊ တရားဝင် ခွင့်ပြုချက် မရှိဘဲ ယာဉ်ထိန်းရဲတပ်ဖွဲ့ဝင် အယောင်ဆောင်ကာ ငွေကောက်ခံနေသည့်အကြောင်း ကိုယ်တိုင်ကြုံတွေ့ခဲ့သည့် ကုန်သည်များမှ ရေးသားထားသည်။

မူဆယ်မြို့ရှိ ဆင်ဖြူနယ်စပ်ဂိတ်တွင် စစ်ကော်မရှင်လက်အောက်ခံ စစ်ဘက်ရေးရာ လုံခြုံရေးတပ်ဖွဲ့၊ ရဲတပ်ဖွဲ့၊ လူဝင်မှုကြီးကြပ်ရေးဌာန၊ အကောက်ခွန်ဦးစီးဌာနနှင့် ယာဉ်ထိန်းရဲ စသည့် ဌာနဆိုင်ရာများ ပူးပေါင်းစစ်ဆေးရေးအဖွဲ့တို့ကလည်း တရုတ်နိုင်ငံဘက်မှ မြန်မာနိုင်ငံအတွင်းတို့ ပစ္စည်းတင်သွင်းလာသည့် ကားများကို ငွေကောက်ခံမှုရှိကြောင်း သိရသည်။