ထိုင်းနိုင်ငံအတွင်း ရွေးကောက်ပွဲအနိုင်ရပါက မြန်မာရွှေ့ပြောင်းအလုပ်သမားများအရေးလုပ်ဆောင်ပေးနေသော မြန်မာ NGO များကို နှိမ်နှင်းပြီး အလုပ်သမားသမဂ္ဂများဖွဲ့စည်းရန်ကူညီပေးမည်ဖြစ်ကြောင်း ထိုင်းနိုင်ငံရေးပါတီတစ်ခုဖြစ်သည့် Thai Pakdee ပါတီ မှ မဲဆွယ်နေကြောင်း ထိုင်းသတင်းဌာန Khaosod တွင်ဖော်ပြထားသည်။

ယမန်နေ့ (ဇန်နဝါရီလ ၂၇) ရက် ညပိုင်းက Thai Pakdee ပါတီ မှ ၎င်းတို့၏ ဖေ့စ်ဘုတ်လူမှုကွန်ယက်စာမျက်နှာ (ပေ့ချ်) တွင် ထိုင်းနိုင်ငံအတွင်းရှိ မြန်မာ့ရွှေ့ပြောင်းအရေးကူညီလုပ်ဆောင်ပေးနေသော မြန်မာ NGO များကို နှိမ်နှင်းမည့်အကြောင်း မြန်မာလူမျိုးများက ထိုင်းနိုင်ငံ၏ အစိတ်အပိုင်းများကို သိမ်းပိုက်မည်ကို စိုးရိမ်ကြောင်း ဖော်ပြထားသည်။

ထို့အပြင် ၎င်းပါတီမှ အမည်ဖော်ပြထားခြင်းမရှိသော ထိုင်းနိုင်ငံရေးပါတီနှစ်ခုမှ မြန်မာ NGO များကို ထောက်ပံ့ကူညီမှုများ ပြုလုပ်ပေးနေကြောင်းကိုလည်းပြောကြားထားသည်။

Thai Pakdee ပါတီအား ဆရာဝန်နှင့် ဒီမိုကရက်ပါတီ အမတ်ဟောင်းဖြစ်သူ Warong Dechkitvikrom မှ ၂၀၂၁ ခုနှစ်တွင် စတင်ဖွဲ့စည်းခဲ့ပြီး ထိုင်းနိုင်ငံ ဘုရင်စနစ်ကို အားပေးထောက်ခံသော ပါတီတစ်ခုဖြစ်သည်။

Thai Pakdee ပါတီသည် အတော်အတင့် ရှေးရိုးစွဲသောဝါဒီများနှင့် ထိတ်လန့်ဖွယ် မူဝါဒများကြောင့် လူသိများသော ပါတီတစ်ခုဖြစ််သည်။

၎င်းပါတီသည် အကျင့်ပျက်ခြစားမှုများနှင့် တရားမဝင် ငွေကြေးများကို တိုက်ဖျက်ရန် အတွက် ဘတ် ၅၀၀ တန်နှင့် ၁၀၀၀ တန် ငွေစက္ကူများကိုလည်း ဖျက်သိမ်းရန် အဆိုပြုထားသည်။

ထို့အပြင် ၎င်းတို့၏မူဝါဒအတွင်း အကျင့်ပျက်ခြစားမှုငွေပမာဏ ဘတ် သန်း ၁၀၀ ထက်ကျော်လွန်လျှင် ကျူးလွန်သူများကို ၁၅ ရက်အတွင်း အယူခံမရှိ ကွပ်မျက်ရန် စသည့် ပြင်းထန်သော ပြစ်ဒဏ်အဆိုပြုမှုများလည်း ပါဝင်လျက်ရှိသည်။

ပါတီထောက်ခံသူများက ၎င်းပါတီအား နိုင်ငံ၏ “ဒိုင်း” တစ်ခုအဖြစ် ရှုမြင်ကြသော်လည်း ဝေဖန်သူများ၊ အထူးသဖြင့် လူငယ်များနှင့် တိုးတက်သော လှုပ်ရှားမှုများအကြားတွင် ခေတ်နောက်ကျသော လက်ရှိခေတ် အချိန်ကာလနှင့် ကိုက်ညီမှုမရှိသော ပါတီတစ်ခုအဖြစ် ရှုမြင်ကြောင်း ထိုင်းသတင်းဌာနများတွင် ရေးသားထားသည်။