သျှမ်းပြည်တောင်ပိုင်း၊ ညောင်ရွှေမြို့နယ် ကျေးရွာအချို့တွင် စစ်တပ်လက်အောက်ခံ ပျူစောထီးအဖွဲ့များမှ ကျေးရွာအတွင်း လှည့်ပတ်စစ်ဆေးမှုကြောင့် ဒေသခံများ နံနက် ၅ နာရီခန့်တွင် စတင်မဲပေးခဲ့ရကြောင်း သတင်းရရှိသည်။
ယနေ့ (ဇန်နဝါရီလ ၂၅ ရက်) တွင် စစ်ကော်မရှင် ကျင်းပနေသည့် ရွေးကောက်ပွဲ တတိယပိုင်းတွင် သျှမ်းပြည်တောင်ပိုင်းမှ ညောင်ရွှေ၊ ပင်လောင်း၊ ဖယ်ခုံ၊ မိုးနဲ၊ မိုင်းရှူးနှင့် ကျေးသီးမြို့နယ်တို့ ပါဝင်သည်။
ညောင်ရွှေမြို့နယ်အတွင်းရှိ အနောက်ဘက်ခြမ်းနှင့် မြောက်ဘက်ခြမ်းရှိ ကျေးရွာအချို့တွင် စစ်တပ်လက်အောက်ခံ ပျူစောထီးအဖွဲ့များမှ လှည့်ပတ်စောင့်ကြည့်နေခြင်းကြောင့် ရွေးကောက်ပွဲ ကျင်းပသည့်နေ့တွင် မဲရုံများကို နံနက် ၆ နာရီ၌ စတင်ဖွင့်လှစ်ရမည် ဖြစ်သော်လည်း ကျေးရွာဒေသခံများမှာ စိုးရိမ်စိတ်ဖြင့် နံနက်အစောပိုင်း ၅ နာရီခန့်ကပင် မဲသွားပေးခဲ့ရကြောင်း ဒေသခံတစ်ဦးက သျှမ်းသံတော်ဆင့်သို့ ပြောသည်၊၊
“ရွာထဲမှာက မနက် ၅ နာရီကတည်းက မဲထပေးရတယ်၊ မပေးရင် တစ်ခုခု လုပ်မှာစိုးလို့ သွားပေးကြတာ။ ပျူတွေက ရွာထဲ ပတ်နေတာ၊ ရွာမှာဆိုတော့ ကြောက်ကြတယ်လေ” ဟု ညောင်ရွှေဒေသခံ အမျိုးသမီးတစ်ဦးက ပြောသည်။
ထို့အပြင် ညောင်ရွှေမြို့ပေါ်တွင် ဖွင့်လှစ်ထားသည့် မဲရုံအချို့ရှိ မဲပေးစက်များမှာ စက်ချို့ယွင်းနေသည့် အနေအထားများကိုလည်း မြို့ခံအချို့မှ ကြုံတွေ့ခဲ့ရပြီး စက်ခလုတ်နှိပ် မဲပေးသည့်အခါတွင်လည်း စာရင်းမရောက်ခြင်းကဲ့သို့ ဖြစ်ရပ်များလည်း ဖြစ်ပေါ်နေကြောင်း သိရသည်။
“နှိပ်လိုက်ရင် ဂဏန်းတွေ ပြေးနေတယ်၊ ဒါပေမယ့် ဂဏန်းက အမှန် မပေါ်ဘူး။ ၆ ဆိုရင် ၆ အပြည့် မပေါ်တာမျိုးတွေ၊ နှိပ်လိုက်လည်း စာရင်းမရောက်လို့ နှစ်ခါ နှိပ်ရတာမျိုးတွေနဲ့ ကြောင်နေတာ” ဟု ကိုယ်တိုင် မဲပေးခဲ့သည့် အသက် ၃၀ အရွယ် အမျိုးသမီးတစ်ဦးက သျှမ်းသံတော်ဆင့်သို့ ပြောသည်။
ပြည်သူများမှာ မဲပေးရာ၌ ရွေးချယ်ခွင့် များစွာ မရှိသည့်အပြင် ကိုယ်ရွေးချယ်ခဲ့သည့် မဲစာရွက်ကို မမြင်ရသည့်အတွက် စက်အတွင်းသို့ မိမိပေးလိုက်သော မဲစာရင်း မှန်ကန်စွာ ရောက်သွားခြင်း ရှိ မရှိ ကိုလည်း မသိရကြောင်း ၎င်းအမျိုးသမီးက ဆက်ပြောသည်။
“အရင်လို စာရွက်နဲ့မဟုတ်တော့ မသေချာဘူး။ စတစ်ကာတွေပဲ ကပ်ထားတာဆိုတော့ စတစ်ကာအောက်မှာ ဘယ်ပါတီ အစစ် ရှိမှန်းမှ မသိရတာ။ နှိပ်လိုက်ရင် မီးစိမ်းတယ် အဲ့ဒါပဲ” ဟု အဆိုပါ အမျိုးသမီးက ထပ်လောင်းပြောသည်။
ညောင်ရွှေမြို့နယ် မဲဆန္ဒနယ်တွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ(USDP)၊ အင်းအမျိုးသားအဖွဲ့ချုပ် (INLP)၊ တိုင်းရင်းသားစည်းလုံးညီညွတ်ရေးပါတီ (တစည NUP)၊ ပြည်သူ့ရှေ့ဆောင်ပါတီ (PPP)၊ ပအိုဝ်းအမျိုးသားအဖွဲ့ချုပ် (PNO)၊ ရှမ်းနှင့်တိုင်းရင်းသားများ ဒီမိုကရက်တစ်ပါတီ (ကျားဖြူပါတီ SNDP) တို့ ပါဝင်ယှဉ်ပြိုင်နေသည်။
Leave a Comments