ထိုင်းနိုင်ငံ အန်ထောင် (Ang Thong ) ခရိုင်ရှိ အာရှအဝေးပြေး လမ်းမကြီးပေါ်တွင် ယမန်နေ့ ဇန်နဝါရီလ ၁၉ ရက် ညပိုင်းက ပစ်ကပ်ကားနှစ်စီးကို တားဆီးစစ်ဆေးရာတွင် တရားမဝင် ဝင်ရောက်လာသည့် မြန်မာလုပ်သား ၂၂ ဦးနှင့် မှောင်ခိုကူးသူဟု သံသယရှိသူ ၃ ဦးတို့ကို ထိုင်းအာဏာပိုင်များက ဖမ်းဆီးခဲ့ကြောင်း Khaosod သတင်းက ဖော်ပြသည်။

ရဲတပ်ဖွဲ့များက ၎င်းယာဉ်များကို တားဆီးစစ်ဆေးခဲ့ရာ ကားခန်းအတွင်းနှင့် ကားနောက်ခန်းများတွင် ပုန်းအောင်းလိုက်ပါလာသည့် မြန်မာနိုင်ငံသား ၂၂ ဦးကို တွေ့ရှိခဲ့ခြင်း ဖြစ်သည်။

၎င်းတို့အားလုံးတွင် နိုင်ငံကူးလက်မှတ် သို့မဟုတ် တရားဝင် ခရီးသွားလာခွင့် အထောက်အထားများ တစ်စုံတစ်ရာ မရှိခဲ့ကြောင်း ထိုင်းရဲအရာရှိများက ပြောသည်။

ဖမ်းဆီးခံရသူများသည် စကားပြန်မှတစ်ဆင့် ထွက်ဆိုရာတွင် ချင်းရိုင်ခရိုင် မယ်ဆိုင်မှတစ်ဆင့် စက်လှေဖြင့် ထိုင်းနိုင်ငံအတွင်းသို့ ဝင်ရောက်လာခဲ့ခြင်း ဖြစ်ပြီး အလုပ်အကိုင်ရရှိရန်အတွက် ပွဲစားခ တစ်ဦးလျှင် ဘတ် ၁၃,၀၀၀ ခန့်ပေးဆောင်ခဲ့ရကြောင်း ပြောကြားခဲ့သည်။

ဖမ်းဆီးရမိသည့် မှောင်ခိုကူးသူ ၃ ဦးကို တရားမဝင် ဝင်ရောက်လာသူများအား ခိုလှုံခွင့်ပေးမှု၊ ဖမ်းဆီးခြင်းမှ လွတ်မြောက်အောင် ကူညီပေးမှုတို့ဖြင့် အမူဖွင့်ထားပြီး မြန်မာလုပ်သားများကိုမူ တရားဝင်ခွင့်ပြုချက်မရှိဘဲ နိုင်ငံအတွင်းသို့ ဝင်ရောက်နေထိုင်မှုဖြင့် အမူဖွင့်ထားကြောင်း သိရသည်။

လက်ရှိတွင် ၎င်းတို့အားလုံးနှင့် သိမ်းဆည်းရမိသော ယာဉ်များကို ဥပဒေအရ ဆက်လက်အရေးယူနိုင်ရန် ချာယို Chaiyo ရဲစခန်းသို့ ပို့ဆောင်ထားသည်။ အမှုစစ်ဆေးနေစဉ်အတွင်း ထူးခြားသည့် အခိုက်အတန့်တစ်ခုအနေဖြင့် ရဲတပ်ဖွဲ့မှ အဖွဲ့ခေါင်းဆောင် Sgt. Maj. Wichai Tamsamai ၏ မွေးနေ့ဖြစ်နေကြောင်း သိရသည်။

လုပ်ဖော်ကိုင်ဖက်များက ၎င်းအတွက် မွေးနေ့ကိတ်ဖြင့် အံ့အားသင့်အောင် ပြုလုပ်ပေးနေစဉ် ဖမ်းဆီးခံထားရသည့် မြန်မာနိုင်ငံသားများကလည်း လက်ခုပ်တီးကာ မွေးနေ့သီချင်း အတူတူ ဝိုင်းဝန်းသီဆိုပေးခဲ့ကြကြောင်း ရဲတပ်ဖွဲ့က ပြောကြားခဲ့သည်။