အနည်းဆုံး လူငယ် ၆၀၀၀၀ ကျော်ကို အဓမ္မ စစ်တပ်ထဲ ဆွဲထည့်ထားသည့် စစ်ခေါင်းဆောင် မင်းအောင်လှိုင် ဦးဆောင်သော လူငယ် ငြိမ်းချမ်းရေး ဖိုရမ် ၂၀၂၆ ကို ယမန်နေ့ (ဇန်နဝါရီ ၁၃ ရက်) နံနက်ပိုင်းက နေပြည်တော်၌ စတင် ကျင်းပနေကြောင်း စစ်ကောင်စီက ထုတ်ပြန်သည်။

ယင်းဖိုရမ် ဖွင့်ပွဲတွင် လွဲမှားသည့် လက်နက်ကိုင် လမ်းစဉ်များကြောင့် ဒီမိုကရေစီ ပြည်ထောင်စုကြီး၏ လူ့စွမ်းအားအရင်းအမြစ်များနှင့် အခြေခံ အဆောက်အအုံများ ဆုံးရှုံးခဲ့ရပြီး ပြည်တွင်းပြည်ပ ရင်းနှီးမြှုပ်နှံမှုများ ဝင်ရောက်ရေး အဟန့်အတား ဖြစ်စေကာ ဆိုးကျိုးများနှင့်သာ တွေ့ကြုံရမည်ဟု မင်းအောင်လှိုင် က ပြောဆိုသည်။

“၂၀၂၀ ပြည့်နှစ် ရွေးကောက်ပွဲမှာ ဆိုးဆိုးဝါးဝါး ပြုလုပ်ခဲ့တဲ့ မဲမသမာမှုတွေကြောင့် တပ်မတော်က အမျိုးသား နိုင်ငံရေး တာဝန်ကို ဥပဒေနဲ့အညီ ထိန်းသိမ်းကာကွယ် ထမ်းဆောင်ခဲ့တာ ဖြစ်ပါတယ်။ ဒီအဖြစ်မှန်ကို ဖုံးကွယ်ပြီး အကြမ်းဖက် NUG၊ CRPH အဖွဲ့တွေက တပ်မတော် အနေနဲ့ ဒီမိုကရေစီ နောက်ပြန်ဆွဲ လုပ်ဆောင်နေသယောင် ဝါဒမှိုင်းတိုက်ပြီး လူငယ်လူရွယ်တွေကို လွဲမှားတဲ့ ရည်ရွယ်ချက်၊ လွဲမှားတဲ့ မျှော်လင့်ချက်တွေနဲ့အတူ အကြမ်းဖက် လက်နက်ကိုင် လမ်းစဉ်ကို တွန်းပို့ခဲ့ကြပါတယ်” ဟု ၎င်းက အပြစ်တင် ပြောဆိုသည်။

သို့သော် လူငယ်များအား အဓမ္မ စစ်ထဲ ဆွဲသွင်းနေသည်မှာ စစ်တပ်ကသာ ဖြစ်ပြီး PDF အပါအဝင် အခြားသော လူငယ်များ လက်နက်စွဲကိုင် တော်လှန်ရခြင်းမှာ စစ်တပ်က မတရား အာဏာသိမ်း ဖိနှိပ်မှုများကြောင့်သာ ဖြစ်ကြောင်း နိုင်ငံရေးသမားများက ဆိုသည်။

“၁၉၆၂ ကတည်းက ခုထိ စစ်တပ်က မတရား ဖိနှိပ်နေတာ အားလုံးသိနေတာပဲ။ လူငယ်တွေကို အဓမ္မ စစ်ထဲထည့်တာက စစ်တပ်။ လက်နက်ကိုင် တော်လှန်နေတဲ့ လူငယ်တွေက သူတို့ အသိစိတ်၊ သူတို့ ဆန္ဒနဲ့ လက်နက်ကိုင်ကြတာ။ အဲဒါကို ကွဲကွဲပြားပြား မြင်ဖို့လိုပါတယ်” ဟု ပြည်တွင်းတွင် နေထိုင်နေသည့် နိုင်ငံရေးသမား တဦးက သုံးသပ်သည်။

ထို့အပြင် စစ်ခေါင်းဆောင်က PDF အပါအဝင် လက်နက်အဖွဲ့များလက်နက်ချရန် အစဉ်အမြဲ ကြိုဆို ဖိတ်ခေါ်ထားပြီ ဆက်လက် ကမ်းလှမ်းဖိတ်ခေါ်ကြောင်း ဆိုလိုက်ပြီး ဒီဇင်ဘာ ၂၈ ရက်နှင့် ဇန်နဝါရီ ၁၁ ရက်တွင် ပြုလုပ်ခဲ့သည့် ရွေးကောက်ပွဲသည် လွတ်လပ်ပြီး တရားမျှတသည်ဟု ပြောဆိုသည်။

ယင်းသို့ နေပြည်တော်တွင် စစ်တပ်က လူငယ် ငြိမ်းချမ်းရေး ဖိုရမ် ကျင်းပနေသော်လည်း လက်ရှိ သျှမ်းတောင်နှင့် ကချင်ပြည်နယ် အပါအဝင် မြန်မာနိုင်ငံ နေရာအနှံ့အပြား လူငယ်များက လက်နက်စွဲကိုင် တော်လှန်နေသောကြောင့် နေ့စဥ်တိုက်ပွဲများ ဖြစ်ပွားနေဆဲ ဖြစ်သည်။