သျှမ်းပြည် မိုင်းရယ်နှင့် သီပေါမြို့နယ်ကြားတွင် စစ်ကော်မရှင်တပ် ဗုံးကြဲတိုက်ခိုက်ခဲ့စဉ် ထွက်ပြေးတိမ်းရှောင်ရသည့် စစ်ဘေးရှောင် ၃၀၀ နီးပါး နေရပ်ပြန်သွားခဲ့ကြောင်း စုံစမ်းသိရသည်။

ဇန်နဝါရီလ (၉) ရက် နံနက်ပိုင်းတွင် မိုင်းရယ်နှင့် သီပေါမြို့နယ် အစပ်ရှိ ရှန်တော်ကျေးရွာအနီး ကျားဖြန့်ရုံဟောင်းဟု ယူဆရသည့် နေရာကို ရွေးကောက်ပွဲ ဒုတိယပိုင်း ကျင်းပရန် ရက်ပိုင်းအလိုတွင် စစ်ကော်မရှင်တပ်ဘက်မှ ဂျက်ဖိုက်တာဖြင့် လေကြောင်းဗုံးကြဲ တိုက်ခိုက်ခဲ့သည်။

အဆိုပါ လေကြောင်းတိုက်ခိုက်မှုကြောင့် သီပေါမြို့နယ် ပြိန်းညောင်ကျေးရွာအုပ်စုရှိ နားပြိုင်း၊ နားမောင်း၊ နောင်စို့၊ နမ့်နက်ကျေးရွာများမှ ဒေသခံ (၃၀၀) နီးပါးခန့် မန်ပန်းကျေးရွာ စာသင်ကျောင်းသို့ ထွက်ပြေးတိမ်းရှောင်ခဲ့ရပြီး လက်ရှိတွင် တိုက်ပွဲငြိမ်သက်ခြင်းကြောင့် နေရပ်ပြန်သွားကြောင်း ဒေသခံများက ပြောသည်။

“လေယာဉ်ဗုံးလာကြဲတုန်းက မန်ပန်းအုပ်စုထဲ ကျတာ။ မြို့နဲ့နီးတာဆိုရင် မိုင်းရယ်နဲ့ ပိုနီးတယ်၊ ကျေးရွာအုပ်စုက သီပေါထဲမှာ စာရင်းပါတာ။ စစ်ရှောင်ကတော့ လေယာဉ်ဗုံးလာကြဲတဲ့ ၉ ရက်နေ့က စပြေးလာကြတာ။ အဲ့တုန်းက စစ်တပ်ဘက် နယ်မြေရှင်းလင်းရေး လုပ်တော့ သကြားစက်လည်း ၅ ရက်ပိတ်တာ၊ အခုတော့ ပြန်ဖွင့်ပြီ။ စစ်ရှောင်တွေလည်း ပြန်ကြပြီ” ဟု သီပေါဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

သီပေါမြို့နယ်အတွင်း စစ်ကော်မရှင်တပ်မှ လေကြောင်းအသုံးပြု တိုက်ခိုက်ခဲ့ခြင်းနှင့် စပ်လျဉ်း၍ နယ်မြေရှင်းလင်းမှု၊ ပစ်ခတ်တိုက်ခိုက်မှုနှင့် တရားမဝင်လုပ်ငန်း လုပ်ဆောင်သော အဖွဲ့များသည် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) နှင့် ပတ်သက်ခြင်းမရှိကြောင်း SSPP သတင်းနှင့်ပြန်ကြားရေးဌာနမှ ဇန်နဝါရီလ (၁၀) ရက်တွင် ထုတ်ပြန်ထားသည်။

စစ်ကော်မရှင်ဘက်မှ သီပေါနှင့် မိုင်းရယ်မြို့နယ် အစပ်တွင် လေကြောင်းတိုက်ခိုက်ခဲ့ပြီးနောက် အွန်လိုင်းငွေလိမ် ကျားဖြန့်လုပ်ငန်းတွင် အသုံးပြုသည့် ပစ္စည်းများနှင့် မူးယစ်ဆေးဝါး ချက်လုပ်ရာတွင် အသုံးပြုသည့် ပစ္စည်းများ သိမ်းဆည်းရမိခဲ့ကြောင်း ဇန်နဝါရီ (၁၁) ရက်တွင် ထုတ်ပြန်ခဲ့သည်။

သီပေါမြို့နယ် နမ့်လန်ဒေသတွင် ဇန်နဝါရီ ၈ ရက်နှင့် ၉ ရက်နေ့က စစ်ကော်မရှင်တပ် နယ်မြေရှင်းလင်းရေး လုပ်ဆောင်စဉ် အွန်လိုင်းငွေလိမ် ကျားဖြန့်လုပ်ငန်းနေရာမှ ကွန်ပျူတာ (၅၃) လုံး၊ ဖုန်း ၁၁ လုံးနှင့် စတားလင့် ၅ လုံးအပြင် မူးယစ်ဆေးဝါး ချက်လုပ်သည့်နေရာတစ်ခုလည်း ထပ်မံတွေ့ရှိခဲ့ကြောင်း ဆိုသည်။

အဆိုပါ မူးယစ်ဆေးဝါး ချက်လုပ်သည့်နေရာမှ ကွန်ပျူတာ ၁၇ လုံး၊ စတားလင့် ၃ လုံး၊ မူးယစ်ဆေးဝါး ချက်လုပ်ရာတွင် အသုံးပြုသည့် ဆေးပြားရိုက်စက်၊ ဆေးမွှေစက်၊ ဆေးပြားရေတွက်စက်၊ ဖြန်ပြွန်အရိုး၊ မီးစက်၊ ဘက်ဟိုးနှင့် မူးယစ်ဆေးဝါး ချက်လုပ်ရန် ရောစပ်ရသည့် ဓာတုဆေးရည်အပြင် SSA တံဆိပ်ပါ အစိမ်းရောင်ယူနီဖောင်းတစ်စုံ သိမ်းဆည်းရမိခဲ့ကြောင်း စစ်ကော်မရှင်ထုတ်ပြန်ချက်တွင် ရေးသားထားသည်။

ထို့အတူ ဇန်နဝါရီ ၁၀ ရက်နှင့် ၁၁ ရက်တွင် မိုင်းရယ်မြို့နယ်အတွင်း မူးယစ်ဆေးဝါး ချက်လုပ်သည့် နေရာ (၁၀) ခုထက်မနည်း ထပ်မံတွေ့ရှိခဲ့ပြီး အက်စစ်ပုံးများ၊ ဂတ်စ်အိုးများ၊ ဓာတုဆေးရည်များ ထည့်ထားသည့် ပေပါပုံးများ၊ ဖန်ပေါင်းအိုးများ စသည့် မူးယစ်ဆေးဝါး ချက်လုပ်ရာတွင် အသုံးပြုသည့် ဆက်စပ်ပစ္စည်းများ သိမ်းဆီးရမိကြောင်း ဖော်ပြထားသည်။