စစ်ကော်မရှင် ပြုလုပ်နေသည့် ရွေးကောက်ပွဲ အပိုင်း (၁) ပြီးဆုံးပြီးနောက် မနက်ဖြန် ရွေးကောက်ပွဲ အပိုင်း (၂) မဲပေးရမည် ဖြစ်သော်လည်း ပြည်သူများ စိတ်ဝင်စားမှု နည်းပါးပြီး ရာနှုန်းပြည့် နှုတ်ဆိတ်နေသည်ဟု ဆိုနိုင်ကြောင်း ရွေးကောက်ပွဲ စောင့်ကြည့်သူများနှင့် သတင်းသမားများက ပြောသည်။
ပြီးခဲ့သည့် NLD လက်ထက် ၂၀၂၀ ရွေးကောက်ပွဲနှင့် နှိုင်းယှဉ်လျှင် လူမှုကွန်ရက်များနှင့်မြေပြင်တွင် ပြည်သူလူထု ပူးပေါင်းပါဝင်မှု လုံးဝ မရှိဟု ဆိုနိုင်ရာ အဓိက အားဖြင့် အနည်းဆုံး ထောင်ဒဏ် ၃ နှစ်မှ ထောင်ဒဏ် တသက်တကျွန်းနှင့် သေဒဏ် အထိ ချမှတ်နိုင်သည့် “ရွေးကောက်ပွဲကို နှောင့်ယှက်ဟန့်တား ဖျက်ဆီးခြင်းမှ ကာကွယ်ရေး ဥပဒေကြောင့်ဟု ဆိုကြသည်။
စစ်ကော်မရှင်က အဆိုပါ ဥပဒေကို ၂၀၂၅ ခုနှစ်၊ ဇူလိုင်လ ၂၉ ရက်တွင် ပြဋ္ဌာန်းခဲ့ရာ လက်ရှိအချိန်အထိ ယင်းဥပဒေဖြင့် ဖမ်းဆီးခံရသည့် ပြည်သူ ၃၃၅ ဦးအထိ ရှိနေရာ အမျိုးသား ၂၇၅ ဦးနှင့် အမျိုသမီး ၆၀ ဦး ပါဝင်သည်။
“အာဏာသိမ်းပြီး ကတည်းက လိုင်းပေါ်မှာ စစ်တပ် မကောင်းကြာင်း ပြောတာမျိုး တော်လှန်ရေး ထောက်ခံတာမျိုး တင်တာနဲ့ ဖမ်းတာ လူထောင်ချီနေပြီ။ ဆိုတော့ လူတွေက ဘာမှ သိပ်မတင်တော့ဘူး။ ရွေးကောက်ပွဲ ဆိုလည်း အဲလို ဥပဒေကြီးနဲ့ ဖမ်းတော့ ဘယ်သူမှ ဘာမှ မတင်ရဲတော့ဘူးလေ” ဟု တောင်ကြီးမြို့ခံ တစ်ဉီးက ဆိုသည်။
စစ်ကော်မရှင် ရွေးကောက်ပွဲ ဥပဒေဖြင့် ပထမဆုံး အဖမ်းခံရသူသည် စစ်ရှောင်ရင်း တောင်ကြီးမြို့တွင် နေထိုင် လုပ်ကိုင်နေသူ အမျိုးသား တဥ◌ီး ဖြစ်သည်ဟု ၎င်းက ဆက်ပြောသည်။
ယင်းသို့ ပြည်သူများ နှုတ်ဆိတ်နေခြင်းသည် ရွေးကောက်ပွဲ ဥပဒေကြောင့်သာမက စစ်ကော်မရှင်၏ ရွေးကောက်ပွဲ အပေါ် စိတ်ဝင်စားမှု မရှိဘဲ ပူးပေါင်းပါဝင်လိုသူ နည်းပါးမှုကြောင့်ဟု သျှမ်းတောင် စစ်တပ် ရွေးကောက်ပွဲနှင့် ပတ်သက်၍ အချက်အလက်များ မှတ်တမ်းပြုနေသူ တစ်ဉီးက ဆိုသည်။
“ကြောက်လို့ မဲသွားပေးတဲ့လူတွေများတယ်။ ကြံ့ခိုင်ရေးနဲ့ မဘသ ကလွဲရင် ဘယ်သူမှ ရွေးကောက်ပွဲကို စိတ်မဝင်စားဘူး” ဟု ၎င်းက မှတ်ချက်ပြုသည်။
အဆိုပါ စစ်ကော်မရှင်၏ ထုတ်ပြန်သည့် ရွေးကောက်ပွဲ ဥပဒေကြောင့် ပြည်သူများအား ဆက်သွယ် မေးမြန်း၍ မရသဖြင့် အခက်အခဲများစွာ ကြုံတွေ့နေရကြောင်း လွတ်လပ်သည့် မြန်မာသတင်းဌာနများတွင် လုပ်ကိုင်နေသည့် သတင်းသမားများက ဆိုသည်။
“အွန်လိုင်းကနေပဲ ဖြစ်ဖြစ်၊ ဖုန်းနဲ့ပဲဖြစ်ဖြစ် သတင်းလှမ်းမေးရင် “မသိဘူး” ပဲ ဖြေကြတယ်။ တချို့ လုံးလုံးမဖြေဘူး။ တော်တော်ကို အခက်အခဲ တွေ့ရပါတယ်” ဟု ပြည်တွင်း၌ နေထိုင် လုပ်ကိုင်နေသည့် သတင်းသမားး တစ်ဉီးက ဆိုသည်။
သျှမ်းသံတော်ဆင့် သတင်းဌာနမှ လူမှုကွန်ရက် (FaceBook) ကွန်ရက်ပေါ်တွင် ရွေးကောက်ပွဲနှင့် ပတ်သက်၍ ရေးသားမှုများအား လေ့လာရာ သာမန် ပြည်သူများသာမက သျှမ်းနိုင်ငံရေးနှင့် နီးစပ်သူများပင် ရွေးကောက်ပွဲနှင့် ပတ်သက်၍ မည်သည့် ဝေဖန်ရေးသားမှုမှ မတွေ့ရဘဲ နှုတ်ဆိတ်နေကြောင်း တွေ့ရသည်။
“ပြည်သူတွေ မပြောနဲ့ ကြံ့ခိုင်ရေးပါတီတောင် မနက်ဖြန် မဲရုံစောင့်ဖို့ လူမရှိလို့ စားရိတ်ငြိမ်း နှစ်သောင်းခွဲ ပေးမယ်ဆိုပြီး ဒီမနက် လိုက်ခေါ်နေရတာ” ဟု ရန်ကုန်မြို့ လှိုင်မြို့နယ်တွင် နေထိုင်သူ တဥ◌ီးက ပြောဆိုသည်။
မည်သို့ပင် ဖြစ်စေ စစ်ကော်မရှင် အနေဖြင့်မူ ရွေးကောက်ပွဲ အောင်မြင်စွာ ကျင်းပသည် ဆိုသည့် ရလဒ်ကိုသာ လိုလားသည်ဖြစ်ရာ ပြည်သူ တစ်ဉီးတစ်ယောက်မျှ မပူးပေါင်း မပါဝင်သည့်တိုင် ရွေးကောက်ပွဲ ပြုလုပ်မည်သာ ဖြစ်ကြောင်း လေ့လာသူများက သုံးသပ်ထားသည်။
ပြီးခဲ့သည့် ၂၀၂၅ ခုနှစ်၊ ဒီဇင်ဘာလ ၂၈ ရက်တွင် ရွေးကောက်ပွဲ အပိုင်း (၁) အား မြို့နယ် ၁၀၂ မြို့နယ်တွင် ပြုလုပ်ရာ ဆန္ဒမဲပေးပိုင်ခွင့်ရှိသည့် မဲဆန္ဒရှင်များအနက် ၅၂ ဒသမ ၁၃ ရာခိုင်နှုန်း လာရောက် မဲပေးခဲ့ကြောင်း စစ်ကောင်စီက ထုတ်ပြန်ထားသည်။
Leave a Comments