သျှမ်းပြည် သီပေါမြို့နယ်တွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ USDP မှ ဒေသခံများကို ဆန်၊ ဆီ၊ ငါးပိ ငါးခြောက်များ ပေး၍ စည်းရုံးရေးဆင်းနေသော်လည်း လူထုစိတ်ဝင်စားမှု မရှိကြောင်း စုံစမ်းသိရသည်။
ဇန်နဝါရီလ (၇) ရက်တွင် သီပေါမြို့နယ် မိုးတေကျေးရွာအုပ်စုရှိ ကွန်စံလိတ် မူလတန်းကျောင်းတွင် ပြည်ခိုင်ဖြိုးပါတီ USDP မှ ဒေသခံများကို အစည်းအဝေး ဟု ပြောဆိုကာ တက်ရောက်လာသူ (၂၅၀) ယောက်အတွက် ဆန်၊ ဆီ၊ ငါးပိ ၊ ငါးခြောက်များ ပေး၍ ပါတီစည်းရုံးရေး ပြုလုပ်ခဲ့ကြောင်း ဒေသခံများက ပြောသည်။
“ကြံ့ခိုင်ရေးပါတီက စာသင်ကျောင်းမှာ စည်းရုံးရေး လာတယ်လို့ ပြောရမှာ။ ခက်ခဲနေတဲ့ ပြည်သူအတွက် ဆိုပြီးတော့ ဆန် ၃ ပြည်၊ ဆီ ၃၅ ကျပ်သား၊ ကုလားပဲ၊ ငါးပိ ငါးခြောက် ထောက်ပံ့တယ်၊ လူဦးရေ ၂၅၀ အတွက် ပေးတယ်။ နောက်ပြီး ဘယ်လို မဲပေးရမလဲဆိုတာ ပြောပြတယ်” ဟု သီပေါဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယင်းမတိုင်မီ ဇန်နဝါရီလ ၆ ရက် နံနက်ပိုင်းတွင် ရှမ်းနှင့် တိုင်းရင်းသားများ ဒီမိုကရက်တစ်ပါတီ (SNDP ကျားဖြူပါတီ) လည်း မိုးတေကျေးရွာအုပ်စုတွင် ပါတီစည်းရုံးရေး ဟောပြောခဲ့ရာ တက်ရောက်နားထောင်သူ (၃၀၀) ကျော်ရှိကြောင်း သီပေါဒေသခံများထံမှ သိရသည်။
“ရွေးကောက်ပွဲကိုတော့ လူထုက စိတ်ဝင်စားမှု မရှိကြဘူး၊ ဘာကြောင့်လဲဆိုတော့ ကြံ့ခိုင်ရေးကပဲ နိုင်မယ်ဆိုတာ လူတိုင်းသိနေတာပဲလေ။ သူတို့နိုင်မှာကို ဘာစိန်ခေါ်မှု အတားအဆီးမှလည်း မရှိဘဲနဲ့ ပြည်သူက အဲ့တာကြောင့် စိတ်မဝင်စားတော့တာ။ ပြည်သူကတော့ အစည်းအဝေး လာတက်ဆိုရင်လည်း ဘာမှနားမလည်ဘဲ ဒီတိုင်းသွားလိုက်တာပဲ”ဟု သီပေါဒေသခံ ၎င်းအမျိုးသားက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် အောက်တိုဘာလတွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထံမှ စစ်ကော်မရှင်တပ် ပြန်လည်တိုက်ခိုက် ထိန်းချုပ်ခဲ့သည့် ကျောက်မဲမြို့နှင့် သီပေါမြို့သည် ရွေးကောက်ပွဲ တတိယပိုင်းတွင် ပါဝင်ထားပြီး မြို့ပေါ်ရပ်ကွက်နှင့် အနီးအနား ကျေးရွာအုပ်စုများ၌သာ ကျင်းပနိုင်မည်ဖြစ်ကြောင်း UEC မှ ကြေညာသည်။
အလားတူ ဇန်နဝါရီလ ပထမပတ်မှ စတင်ပြီး ကျောက်မဲမြို့ပေါ် ရပ်ကွက် (၉) ခုတွင် စစ်ကော်မရှင်ဘက်မှ မဲစာရင်းပြုစုရန် အိမ်ထောင်စုနှင့် လူဦးရေစာရင်းများ လိုက်လံစစ်ဆေးနေခြင်းကြောင့် လုံခြုံရေး စိုးရိမ်ထိတ်လန့်နေရကြောင်း ကျောက်မဲဒေသခံများက ပြောသည်။
ရွေးကောက်ပွဲ မကျင်းပနိုင်သည့် နယ်မြေများထဲ ကျောက်မဲနှင့် သီပေါမြို့နယ်တွင် ကျေးရွာအုပ်စု (၁၀၀) ကျော်ဖြင့် အများဆုံးဖြစ်ပြီး TNLA ဆက်လက်ထိန်းချုပ်ထားသည့် မိုင်းငေါ့မြို့နှင့် မိုင်းလုံမြို့ပေါ်မှ ရပ်ကွက် (၁၁) ခုလည်း ပါဝင်သည်။
အဆိုပါ ကျောက်မဲနှင့် သီပေါမြို့နယ် မဲဆန္ဒနယ်များတွင် ဝင်ရောက်ယှဉ်ပြိုင်ရန် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ၊ ရှမ်းနှင့် တိုင်းရင်းသားများ ဒီမိုကရက်တစ်ပါတီ (SNDP) နှစ်ပါတီသာ ကိုယ်စားလှယ်လောင်းစာရင်း တင်သွင်းထားသည်။
Leave a Comments