စစ်ကော်မရှင် ကျင်းပသည့် ရွေးကောက်ပွဲကို နှောင့်ယှက်ဟန့်တားသည်ဟုဆိုကာ ဇန်နဝါရီလ ၅ ရက်အထိ ပြည်သူ ၃၃၅ ဦးကို အမှုအဖွင့်အရေးယူထားကြောင်း ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယ ဗိုလ်ချုပ်ကြီး ထွန်းထွန်းနောင်က ပြောသည်။

ယမန်နေ့ (ဇန်နဝါရီလ ၆ ရက်) က ကျင်းပသည့် ပါတီစုံဒီမိုကရေစီအထွေထွေ ရွေးကောက်ပွဲကာလ လုံခြုံရေးဆိုင်ရာ ကြီးကြပ်မှုဗဟိုကော်မတီ၏ ဆဋ္ဌမအကြိမ် လုပ်ငန်းညှိနှိုင်းအစည်းအဝေးတွင် ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယ ဗိုလ်ချုပ်ကြီး ထွန်းထွန်းနောင်က ထိုကဲ့သို့ ပြောကြားခဲ့ခြင်း ဖြစ်သည်။

အဆိုပါရွေးကောက်ပွဲဥပဒေဖြင့် ဖမ်းဆီးခံရသည့် ပြည်သူ ၃၃၅ ဦးထဲတွင် အမျိုးသား ၂၇၅ ဦးနှင့် အမျိုသမိး ၆၀ ဦး ပါဝင်သည်။

အစည်းအဝေးတွင် ပြည်ထောင်စုဝန်ကြီးက ၂၀၂၅ ခုနှစ် ဒီဇင်ဘာလ ၂၈ ရက်တွင် ရွေးကောက်ပွဲ အပိုင်း (၁) အား တိုင်းဒေသကြီး/ ပြည်နယ်များရှိ မြို့နယ် ၁၀၂ မြို့နယ်များရှိ မဲရုံများသို့ ဆန္ဒမဲပေးပိုင်ခွင့်ရှိသည့် မဲဆန္ဒရှင်များအနက် ဆန္ဒမဲလာရောက်ပေးခဲ့မှုမှာ ၅၂ ဒသမ ၁၃ ရာခိုင်နှုန်းရှိသည်ကို တွေ့ရှိရသည်။

ရွေးကောက်ပွဲ အပိုင်း (၁) ကျင်းပနေချိန်တွင် နိုင်ငံတကာမှ လေ့လာရေးအဖွဲ့များ၊ ပြည်တွင်းပြည်ပ သတင်းဌာနများနှင့် မီဒီယာအဖွဲ့အစည်းများက လာရောက်လေ့လာကြည်သည်ကိုလည်း တွေ့ရှိရကြောင်း ပြောကြားခဲ့သည်။

ထို့နောက် ဆက်လက်ကျင်းပမည့် ရွေးကောက်ပွဲ အပိုင်း (၂) နှင့် အပိုင်း (၃) တို့တွင် မဲဆန္ဒရှင်ပြည်သူများ စိတ်အေးချမ်းသာ လုံခြုံမှုရှိစွာဖြင့် ဆန္ဒမဲပေးနိုင်ရေးအတွက် ရွေးကောက်ပွဲ အပိုင်း (၁) ကျင်းပပြုလုပ်ခဲ့စဉ်က ကြုံတွေ့ခဲ့ရသည့် အားနည်းချက်များကို ပြန်လည်သုံးသပ်သွားမည်ဟု ဆိုသည်။

စစ်ကော်မရှင်သည် ပြည်သူအများစု လက်မခံသည့်ကြားမှ အတုအယောင် ရွေးကောက်ပွဲကို ဖြစ်မြောက်စေရန် နည်းလမ်းမျိုးစုံ အသုံးပြုလုပ်ဆောင်နေပြီး အနည်းဆုံး ထောင်ဒဏ် ၃ နှစ်မှ ထောင်ဒဏ် တသက်တကျွန်းနှင့် သေဒဏ်ချမှတ်နိုင်သည့် ရွေးကောက်ပွဲကို နှောင့်ယှက်ဟန့်တားဖျက်ဆီးခြင်းမှ ကာကွယ်ရေးဥပဒေကို ၂၀၂၅ ခုနှစ် ဇူလိုင်လ ၂၉ ရက်တွင် ပြဋ္ဌာန်းခဲ့သည်။