သျှမ်းပြည် တောင်ကြီးမြို့ သစ်တောရပ်ကွက်ရှိ ဗိုလ်ချုပ်အောင်ဆန်းပန်းခြံကို စစ်ကော်မရှင် လက်အောက်ခံ စည်ပင်သာယာရေးဌာနနှင့် ကုမ္ပဏီတို့ ပူးပေါင်းကာ “ပန်းခြံစည်ကားသာယာလှပေစရန်” အမည်တပ်ပြီး ဆိုင်ခန်းဆောက်လုပ်ရောင်းစားရန် စီစဉ်နေကြောင်း မြို့ခံများက သျှမ်းသံတော်ဆင့်ကို ပြောသည်။
တောင်ကြီးမြို့တွင် အများပြည်သူအပန်းဖြေရန် တစ်နေရာသာကျန်ရှိသည့် ဗိုလ်ချုပ်အောင်ဆန်းပန်းခြံကို လူနေဆိုင်ခန်းတွဲများ ဆောက်လုပ်ရန် ပြီးခဲ့သည့် ၂၀၂၅ ခုနှစ် နိုဝင်ဘာလ ၅ ရက်က ဆောက်လုပ်ခွင့်ရရှိရန် ပြည်နယ်အစိုးရကို စာတင်ထားကြောင်း သိရသည်။
“ဘယ်သဘာတူပါမလဲ၊ ဗိုလ်ချုပ်ကြေးရုပ် ပျောက်သွားမှာပေါ့။ အများပြည်သူ အပန်းဖြေဖို့ ဝင်ကြေးမပေးရတာ ဆိုလို့ အဲ့တစ်ခုပဲရှိတာ။ သူတို့လုပ်နေတာ လူထုအတွက် အကျိုးမရှိဘူး၊ သူတို့လုပ်စားနေတာ” ဟု တောင်ကြီးမြို့ခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါပန်းခြံအတွင်း အဆောက်အဦး ဆောက်လုပ်ရေးလုပ်ငန်းများကို စည်ပင်နှင့် ရှမ်းချယ်ရီတောင်တန်း ဆောက်လုပ်ရေး ကုမ္ပဏီပိုင်ရှင် မောင်တိုးတို့က အကျိူးတူပူးပေါင်း လုပ်ဆောင်ရန်ဖြစ်ကြောင်း ၎င်းက ပြောသည်။
လူနေဆိုင်ခန်းတွဲ ဆောက်လုပ်မည့် အစီအစဉ်ကို မြို့ခံပြည်သူလူထုမှသိရှိခြင်းမရှိဘဲ ခေတ်ပျက်ကာလကို အခွင့်ကောင်းယူပြီး စည်ပင်က လုပ်စားနေကြောင်း မြို့ခံများကဝေဖန်ပြောဆိုနေကြသည်။
“ချယ်ရီကွင်း မောင်းတိုးရဲ့ လက်ချက်တွေပေါ့။ အနိုင်ရပအိုဝ်းပါတီတွေကလည်း သျှမ်းပြည်နယ်ကို ပအိုဝ်းပြည်နယ်ဖြစ်ရေးဘဲ ကြိုးစားနေကြတာ၊ ဒါကို စိတ်မဝင်စားဘူး။ ကြံ့ခိုင်ရေးက ကောင်တွေကလည်း ရှုံးသွားလို့ စိတ်မဝင်စားဘူး” ဟု အထက်ပါ အမျိုးသားတစ်ဦးက ထပ်လောင်းပြောသည်။
ဗိုလ်ချုပ်အောင်ဆန်းပန်းခြံသည် တောင်ကြီးမြို့လယ်တွင် တည်ရှိပြီး အများပြည်သူအပန်းဖြေရန်အတွက် တစ်ခုတည်းကျန်ရှိသော နေရာဖြစ်သည်။
အဆိုပါပန်းခြံတွင် ဗိုလ်ချုပ်အောင်ဆန်းရုပ်တုကို ပြသထားရုံသာမက မြန်မာ့လွတ်လပ်ရေးကြိုးပမ်းမှု အထိမ်းအမှတ်အဖြစ် ၁၉၄၇ ခုနှစ်တွင် ချုပ်ဆိုခဲ့သော သမိုင်းဝင်ပင်လုံ စာချုပ်ကို အထိမ်းမှတ်ပြုသည့် ပန်းချီကားကိုလည်း ပြသထားသည်။
Leave a Comments