သျှမ်းပြည်မြို့တော် တောင်ကြီးမြို့နယ်အတွင်း ကျေးရွာဘက်တွင် မည်သို့ ရွေးချယ်မဲပေးရမည်ကို မသိခြင်း၊ မည်သည့် မဲရုံတွင် မဲပေးရမည်ကို မသိခြင်းတို့ကြောင့် ဆန္ဒမဲပေးသူ နည်းပါးနေကြောင်း ဒေသခံများက ပြောသည်။
ယနေ့ ဒီဇင်ဘာလ ၂၈ ရက်တွင် စတင်ကျင်းပနေသည့် စစ်ကော်မရှင် ရွေးကောက်ပွဲ ပထမပိုင်းတွင် သျှမ်းပြည်တောင်ပိုင်းမှ တောင်ကြီး၊ ဟိုပုံး၊ ပင်းတယ၊ နမ့်စန်၊ လင်းခေးနှင့် လွိုင်လင် အပါအဝင် (၆) မြို့နယ်တွင် ပြုလုပ်နေသည်။
“ဒီက ရွာဘက်ကလူတွေ ဘာမှမသိဘူး။ ကျမတို့အနောက်က ဦးလေးတွေ၊ အဒေါ်တွေ ဘာပေးရမှန်းမသိလို့ ကြံ့ခိုင်ရေးပါတီပဲ နှိပ်ကြတာ။ သူတို့ (ဦးလေးနဲ့ အဒေါ်) တွေပြောနေကြတာ ငါတို့က ဒီတစ်ခုပဲ သိတယ်၊ တခြားလည်း မသိဘူးတဲ့” ဟု တောင်ကြီးမြို့နယ် အေးသာယာမြို့ခံတစ်ဦးက ပြောသည်။
ထို့အပြင် ယနေ့ နံနက်ပိုင်း မဲသွားပေးရမည်ကို အများစုက မည်သည့် နေရာတွင် မဲပေးရမည်ကို မသိရှိကြကြောင်း ၎င်းက ပြောသည်။
“ဒီမနက် မဲသွားပေးတဲ့သူတွေက အယောက် ၅၀၊ ၆၀ ကျော်လောက်ပဲ ရှိတယ်။ ဟိုးအရင်တုန်းကနဲ့ ယှဉ်ရင် မများဘူး။ အရင်ကဆို အစောကြီး လူတွေပြည့်ကြပ်နေတာပဲ” ဟု ၎င်းက ထပ်လောင်းပြောသည်။
တောင်ကြီးမြို့နယ်ရှိ ရပ်ကွက် ၅၁ ခုနှင့် ကျေးရွာအုပ်စု ၂၄ စုတွင် မဲရုံ ၁၉၀ ရုံ ဖွင့်လှစ်ထားကြောင်း သိရသည်။
ပြီးခဲ့သည့် ဒီဇင်ဘာလ ၂၆ ရက်နေ့က တောင်ကြီးမြို့နယ်တွင် ကြိုတင်မဲများ ရေတွက်ရာ ကြံ့ခိုင်ရေးပါတီက မဲထောင်ချီ အပြတ်အသတ်အနိုင်ရရှိကြောင်း သိရသည်။
စစ်တပ် ပြုလုပ်သည့် ရွေးကောက်ပွဲ ကြိုတင်မဲများကို ရေတွက်ရာ တောင်ကြီးမြို့နယ်တွင် ပြည်သူ့လွှတ်တော် နေရာအတွက် ကြံ့ခိုင်ရေး ၂၃၄၄၊ ကျားဖြူ ၁၁၊ PNO ပြည်သူ့စစ် ၁၄ နှင့် ပြည်သူ့ပါတီ ၄ မဲ၊ အမျိုးသား လွှတ်တော် နေရာ အတွက် ကြံ့ခိုင်ရေး ၁၃၃၆၊ ကျားဖြူ ၁၁၊ PNO ပြည်သူ့စစ် ၃၃ နှင့် ပြည်သူ့ပါတီ ၄ မဲ၊ ပြည်နယ် လွှတ်တော် နေရာ အတွက် ကြံ့ခိုင်ရေး ၂၃၂၀၊ ကျားဖြူ ၁၁၊ PNO ပြည်သူ့စစ် ၁၄ နှင့် ပြည်သူ့ပါတီ ၆ မဲ အသီးသီး ရရှိခဲ့ကြောင်း သိရသည်။
Leave a Comments