သျှမ်းပြည် ဟိုပန်မြို့နယ်ရှိ ‘ဝ’ပြည်သွေးစည်းညီညွတ်ရေးပါတီ (UWSP/UWSA) တရားစီရင်ရေး ကော်မတီမှ လောင်းကစားအကြွေးကြောင့် လူသတ်မှုကျူးလွန်ခဲ့သူ အမျိုးသားတစ်ဦးကို သေဒဏ် ချမှတ်ခဲ့ကြောင်း စုံစမ်းသိရသည်။

ယနေ့ (ဒီဇင်ဘာလ ၂၇ ရက်) နံနက်ပိုင်းတွင် ‘ဝ’တပ်ဖွဲ့ UWSA ထိန်းချုပ်ထားသည့် ဟိုပန်မြို့တွင် တရားစီရင်ရေး အခမ်းအနားဟု ခေါင်းစဉ်တပ်ပြီး လောင်းကစားအကြွေးကြောင့် လူသတ်မှု ကျူးလွန်ခဲ့သည့် နောင်ချိုမြို့နယ်မှ အသက် (၂၄) နှစ်အရွယ်ရှိ စိုင်းအောင်လင်းဦး ဆိုသူအား လူအများ ရှေ့မှောက်တွင် သေဒဏ်ချမှတ်ခဲ့ကြောင်း ဒေသခံများက ပြောသည်။

“ဖြစ်စဉ်ကတော့ ပြီးခဲ့တဲ့ ၂ လတုန်းက ဖြစ်တာ၊ ဟိုပန်မှာ အလုပ်လာလုပ်တဲ့လူ အချင်းချင်းပဲ အရက်မူးပြီး လုပ်ကြံကြတာ။ မနက်က အမှုသွား အမှုလာ ဖတ်ပြတာတော့ လောင်းကစားအကြွေးဆပ်ဖို့ ဖုန်းခိုးဖို့လုပ်ရင်း လူသတ်မှုဖြစ်သွားတယ်လို့ ပြောတယ်။ သေဒဏ်ချခံရတာက နောင်ချိုဘက်က” ဟု ဟိုပန်မြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ဟိုပန်မြို့နယ်ရှိ UWSA လက်အောက်ခံရဲတပ်ဖွဲ့၏ သတင်းထုတ်ပြန်ချက်အရ ပြီးခဲ့သည့် အောက်တိုဘာလ ၃၁ ရက်တွင် သေဒဏ်ချခံရသည့် စိုင်းအောင်လင်းဦးသည် လောင်းကစားဝိုင်းတွင် ရှုံးနိမ့်ပြီး တရုတ်ယွမ် ၈၀၀ (မြန်မာကျပ်ငွေ ကာလပေါက်ဈေး ၄ သိန်းခွဲခန့်) နှင့် မြန်မာကျပ်ငွေ ၂ သိန်းခန့် အကြွေးတင်ခဲ့ကြောင်း ဆိုသည်။

အဆိုပါညပိုင်းတွင် စိုင်းအောင်လင်းဦးသည် သူငယ်ချင်းတစ်ဦးနှင့် အရက်အတူ သောက်ခဲ့ပြီးနောက် ၎င်း၏ ဆိုင်ကယ်နှင့် လက်ကိုင်ဖုန်းကို ခိုးယူရန် အသင့်ယူဆောင်လာသည့် တူဖြင့် ဦးခေါင်းနှင့် လိင်အင်္ဂါနေရာကို အိပ်ပျော်နေစဉ် ထုရိုက်ခဲ့ရာ ပွဲချင်းပြီး သေဆုံးသွားခဲ့ကြောင်း UWSA ထုတ်ပြန်ချက်အရ သိရသည်။

၎င်းဖြစ်ရပ် ဖြစ်ပွားခဲ့ပြီးနောက် နိုဝင်ဘာလ ၁ ရက် နေ့လယ်ပိုင်းတွင် UWSA လက်အောက်ခံ ရဲတပ်ဖွဲ့မှ လူသတ်မှုကျူးလွန်သူ စိုင်းအောင်လင်းဦးကို သက်သေခံပစ္စည်းများနှင့်တကွ ဖမ်းဆီးရမိခဲ့ပြီး တရားစွဲဆိုခဲ့ကြောင်း ထုတ်ပြန်ချက်တွင် ရေးသားထားသည်။

အလားတူ နိုဝင်ဘာလ (၁၄) ရက်တွင် ‘ဝ’တပ်ဖွဲ့ UWSA ထိန်းချုပ်ထားသည့် ဟိုပန်မြို့တွင် တရားစီရင်ရေး အခမ်းအနား ကျင်းပပြီး ရွှေဆိုင်ဖောက်ထွင်းခိုးယူသူကို ထောင်ဒဏ် (၁၅) နှစ် လူအများရှေ့ ပြစ်ဒဏ်ချမှတ်ခဲ့ပြီး လူသတ်မှုကျူးလွန်သူတစ်ဦးကို သေဒဏ်ပေး၍ ချက်ချင်းကွပ်မျက်ခဲ့ကြောင်း ဒေသခံများထံမှ သိရသည်။

ပြီးခဲ့သည့် အောက်တိုဘာလ ၃၀ ရက်တွင်လည်း ဟိုပန်မြို့တွင် ရာဇဝတ်မှု ကျူးလွန်ကြောင်း ဖော်ထုတ်ခံရသူ (၇)ဦးကို လူသတ်မှုအတွက် သေဒဏ်နှင့် မုဒိမ်းမှုကို ထောင်ဒဏ် (၁၅) နှစ်တို့ လူစုလူဝေးရှေ့မှောက် ပြစ်ဒဏ်အသီးသီး ချမှတ်ခဲ့ကြောင်း ဒေသခံများက ပြောသည်။