စစ်တပ်က ပြုလုပ်နေသည့် ရွေးကောက်ပွဲကို တပါတီစနစ် ကျင့်သုံးသည့် ကွန်မြူနစ် နိုင်ငံများ၊ အတိုက်အခံများ ပါဝင်ယှဥ်ပြိုင်ခွင့် မပြုသည့် ရွေးကောက်ပွဲများ ကျင်းပသည့် အာဏာရှင် နိုင်ငံများက လာရောက်လေ့လာနေပြီ ဖြစ်ကြောင်း စစ်တပ် အာဘော် သတင်းစာများက ယမန်နေ့ ​(ဒီဇင်ဘာလ ၂၆) ရက်တွင် ဖော်ပြသည်။

ဒီဇင်ဘာ ၂၈ ရက် စစ်တပ် ရွေးကောက်ပွဲကို လေ့လာစောင့်ကြည့်ရန် တရုတ်၊ ရုရှား၊ အိန္ဒိယ အပါအဝင် နိုင်ငံ ၆ ခုမှ ကိုယ်စားလှယ်များ ယမန်နေ့ နံနက်ပိုင်းက ရန်ကုန်မြို့သို့ ရောက်ရှိလာကြောင်း စစ်တပ် အာဘော် သတင်းများက ထုတ်ပြန်သည်။ ဘယ်လာရုစ်နိုင်ငံ ကမူ ၂၅ ရက်နေ့ ကတည်းက ရောက်ရှိနေကြောင်း ဆိုသည်။

အဆိုပါ နိုင်ငံများ အနက် တရုတ်နှင့် ဗီယက်နမ်သည် တပါတီ အာဏာရှင် စနစ် ကျင့်သုံးသည့် ကွန်မြူနစ် နိုင်ငံများ ဖြစ်ပြီး ရုရှား၊ ဘယ်လာရုစ်၊ ကာဇက်စတန်နှင့် ကမ္ဘောဒီးယား တို့သည် အတိုက်အခံများအား နည်းမျိုးစုံဖြင့် နှိပ်ကွပ်ပြီး ရွေးကောက်ပွဲ ဝင်ခွင့် မပေးသည့် အာဏာရှင် နိုင်ငံများ ဖြစ်သည်။

ထို့အတူ ပါတီစုံ ဒီမိုကရေစီ စနစ် ကျင့်သုံးသည့် အိန္ဒိယ နိုင်ငံကမူ အငြိမ်းစား စစ်ဗိုလ်ချုပ် တဦး ဦးဆောင်သည့် အဖွဲ့ကို စေလွှတ်သည်ဖြစ်ရာ မြန်မာ စစ်တပ်၏ တောင်းဆိုမှုကြောင့် အိန္ဒိယ စစ်တပ်က စေလွှတ်မှု အဖြစ် ရှုမြင်နိုင်ကြောင်း ဝါရင့် ရွေးကောက်ပွဲ လေ့လာ စောင့်ကြည့်သူ တဦးက သုံးသပ်သည်။

“လာဖို့ ရှိတာက အားလုံး ၁၀ နိုင်ငံပေါ့။ ဒီအထဲမှာ တရုတ်၊ ဗီယက်နမ်နဲ့ လာအိုက ကွန်မြူနစ်။ ဒီမိုကရေစီ နိုင်ငံလို့ ပြောလို့ရထဲမှာ အိန္ဒိယ၊ ထိုင်းနဲ့ ဖိလစ်ပိုင် ပါမယ်။ အခု အိန္ဒိယက အငြိမ်းစား ဗိုလ်ချုပ် ဦးဆောင်ပြီး လာတယ် ဆိုတော့ စစ်တပ်ချင်း ဆက်ဆံရေး သဘော။ ထိုင်းကတော့ ရှင်းတယ်၊ ထားဝယ် ကမ်းလွန်ဘက်မှာ ဓာတ်ငွေ့သိုက် တွေ့တယ်ဆိုတဲ့ သတင်း တက်ကတည်းက ထိုင်းနိုင်ငံခြားရေးဝန်ကြီး နေပြည်တော် သွားတာပဲလေ၊ အကျိုးစီးပွားပေါ့။ ဖိလစ်ပိုင် ကတော့ အနောက်နိုင်ငံတွေက စောင့်ကြည့်ခိုင်းတဲ့ သဘော။ ဆိုတော့ အခု လာတဲ့ ၁၀ နိုင်ငံ ဆိုတာ နိုင်ငံရေး၊ စီးပွားရေး အကျိုးစီးပွားတူ ပုလင်းတူ ဗူးဆို့ပေါ့” ဟု ၄င်းက သုံးသပ်သည်။

ယင်း ၁၀ နိုင်ငံမှ ထုတ်ပြန်မည့် စစ်တပ် ရွေးကောက်ပွဲ အစီရင်ခံစာတွင် “ရွေးကောက်ပွဲသည် ဘက်လိုက်မှု ကင်းပြီး တရားမျှတသည်” ဟုသာ ဖော်ပြ ထုတ်ပြန်မည် ဖြစ်ကြောင်း ၄င်းက ဟောကိန်းထုတ်သည်။

စစ်တပ် ရွေးကောက်ပွဲ စောင့်ကြည့်ရန် တရုတ်၊ ရုရှား၊ အိန္ဒိယ၊ ဘယ်လာရုစ်၊ ထိုင်း၊ လာအို၊ ပါကစ္စတန်၊ ဖိလစ်ပိုင် စသည့် နိုင်ငံများ အပါအဝင် နိုင်ငံ ၁၀ ခုမှ လေ့လာသူများအား ဖိတ်ခေါ်ထားကြောင်း စစ်တပ် ရွေးကောက်ပွဲ ကော်မရှင်က ပြောဆိုထားသည်။

ဒေသတွင်း အရေးပါသည့် အဖွဲ့အစည်း ဖြစ်သည့် အာဆီယံ ကမူ လေ့လာစောင့်ကြည့်ရန် စေလွှတ်မည် မဟုတ်ကြောင်း ထုတ်ပြန်ထားပြီး စစ်တပ်၏ အတုအယောင် ရွေးကောက်ပွဲကို ကန့်ကွက်ကြောင်း ကုလသမဂ္ဂ အပါအဝင် အနောက်နိုင်ငံများက ထုတ်ပြန်ထားသည်။