သျှမ်းပြည်တောင်ပိုင်း တောင်ကြီးမြို့တွင် စစ်ကော်မရှင်နှင့် ပအိုဝ်းပြည်သူ့စစ် PNO တို့က လုံခြုံရေးအကြောင်းပြပြီး စစ်ဆေးမှုတင်းကြပ်နေပြီး၊ ယခုရက်ပိုင်း လူငယ်များလည်း ပျောက်ဆုံးမှုရှိလာကြောင်း သတင်းရရှိသည်။
ပြီးခဲ့သည့် ဒီဇင်ဘာလ တတိတယ ပတ်မှစပြီး တောင်ကြီးမြို့တွင် ည (၇)နာရီနောက်ပိုင်းတွင် စစ်ကော်မရှင်နှင့် ၎င်း၏လက်အောက်ခံ PNOတို့က ယူနီဖောင်းအပြည့်စုံ ဝတ်ပြီး ကား(၈)စီးခန့်ဖြင့် အရှေ့မြို့ပတ်လမ်း မီးပွိုင့်များ အနောက်မြို့ပတ်လမ်းတွင် လှည့်လည်စောင့်ကြည့် စစ်ဆေးနေကြောင်း သိရသည်။
ထိုသို့ စစ်ကော်မရှင်တပ် မြို့တွင်းလုံခြုံရေး တင်းကြပ်ပြီးနောက်ပိုင်း တောင်ကြီးမြို့ ရွေတောင်ရပ်ကွက်၊ ကံသာရပ်ကွက်၊ ကျောင်းကြီးစုရပ်ကွက်နှင့် ဖရဲရပ်ကွက်မှ ညဆိုင်းအလုပ်လုပ်သူ သက်လတ်ပိုင်းအရွယ် (၃) ဦးနှင့် လူငယ် (၂)ဦး တို့သည် ပြီးခဲ့သည့် ဒီဇင်ဘာလ ၂၃ ရက်နေ့တွင် ပျောက်ဆုံးသွားကြောင်း သိရသည်။
“လူငယ်တွေတော့ ပျောက်နေတာ ကြားတယ်၊ အသိထဲက အထက်တန်းကျောင်းသား ဆိုလည်း အပြင်သွားမယ်ဆိုပြီး ဒီဇင်ဘာ ၂၄ ရက်က ထွက်သွားတာ ခုထိအဆက်သွယ်လည်းမရ ၊ပြန်လည်း မလာဘူး။ ပေါ်တာများဆွဲခံလိုက်ရတာလား မသိဘူး။ တစ်ခုခုဖြစ်သွားမှာ စိတ်ပူနေကြတာ။”ဟု တောင်ကြီးမြို့ခံ အသက် ၃၀ ဝန်းကျင်ရှိ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ပျောက်ဆုံးသွားသော လူငယ်များထဲတွင် စစ်ရှောင်အမျိုးသားတစ်ဦးလည်း ပါဝင်ပြီး ယနေ့အထိ အဆက်သွယ်ပြန်မရသေးသောကြောင့် မိသားစုဝင်များ စိတ်ပူနေကြောင်း ၎င်းက ဆက်ပြောသည်။
စစ်ကော်မရှင်တပ် ဦးဆောင်ကျင်းပမည့် ရွေးကောက်ပွဲ သည် လာမည့် ဒီဇင်ဘာလ ၂၈ ရက်တွင် သျှမ်းပြည်နယ်၌ မြို့နယ် (၁၂)ခုတွင် ကျင်းပမည်ဖြစ်သောကြောင့် လုံခြုံရေးတင်းကြပ်လာပြီး ပြည်သူများ ညဘက် အသွားအလာ ဂရုစိုက်ကြရန် တောင်ကြီးမြို့ခံများက အကြံပြုပြောထားသည်။
“ရွေးကောက်ပွဲနီးလို့ ထင်တယ် စစ်ကားတွေ မီးပွိုင့်ဖက်မှာ တွေ့တယ်။လမ်းသွားလမ်းလာတွေကို စစ်တယ်၊ ည ၉နာရီနောက်ပိုင်းဆို ပိုစစ်တယ်၊ ဘယ်သွားလဲ ဘယ်လာလဲနဲ့ စစ်တာ၊ ညဖက်ကို ဘယ်မှမသွားတာ အကောင်းဆုံး၊ ညဆိုင်း အလုပ်သွားရင်လည်း စောစောပြန်တာပိုကောင်းတယ်။”ဟု တောင်ကြီးမြို့ခံ အမျိုးသားတစ်ဦးက ပြောသည်။
ထိုသို့ စစ်ကော်မရှင်က စစ်ယူနီဖောင်းအပြည့် ဝတ်ပြီး ကားများနှင့် တောင်ကြီးမြို့ကို လှည့်ပတ်စောင့်ကြည့်ခဲ့သည့်မှာ လွန်ခဲ့သည့် ၂၀၂၁ ခုနှစ်မှ ၂၀၂၂ခုနှစ် တွင်သာရှိခဲ့ပြီး ယခု ၂၀၂၅ခုနှစ်တွင် ဒုတိယအကြိမ် ထပ်မံတွေ့ရသည်ဟု ၎င်းက ဆက်ပြောသည်။
ပြီးခဲ့သည့် ဒီဇင်ဘာ ၁၁ရက်တွင် အသက် ၂၄နှစ်အရွယ်ရှိ ကိုအောင်ကိုကို(ခ)ဖိုးနီသည် ဖယ်ခုံမြို့နယ် နောင်လိုင်ကျေးရွာသို့ ပြောင်းဖူးချိုးရန် နေရပ်ပြန်သွားခဲ့သည်။
ထို့နောက် ဒီဇင်ဘာ ၁၉ရက် မနက်ပိုင်းတွင် ကိုအောင်ကိုကို(ခ) ဖိုးနီသည် ဇနီးနှင့် ကလေး ၂ယောက်ရှိရာ စစ်ဘေးရှောင်နေရာသို့ ပြန်လာရာလမ်းတွင် ရုတ်တရက်ပျောက်ဆုံးသွားခဲ့ရာမှ ယနေ့(ဒီဇင်ဘာ ၂၃)ရက်ထိ မတွေ့ရှိသေးကာ မိသားစုဝင်များက စိုးရိမ်ပူပန်နေကြသည်။
ယခုလက်ရှိ တောင်ကြီးမြို့တွင် စစ်ကော်မရှင်မှ ညဘက် ကင်းလှည့် စစ်ဆေးနေချိန်တွင် လမ်းသွားလမ်းလာ များအပါအဝင် လိုင်စင်မဲ့ကား များကိုဖမ်းဆီးပြီး အဆိုပါ ဖမ်းခံရသည့်ကားများကို ငွေဖြင့် ပြန်ရွေးလျှင် လူပါ ဖမ်းဆီးခံရမည်ဟု စစ်ကော်မရှင်က ခြိမ်းခြောက်ထားကြောင်း သိရသည်။
Leave a Comments