သျှမ်းပြည် လားရှိုးမြို့နယ်တွင် ကိုးကန့်တပ်ဖွဲ့ MNDAA ထိန်းချုပ်ထားသည့် ကျေးရွာများမှ ဒေသခံများကို မြို့ပေါ်ရှိ မဲရုံများတွင် မဲသွားပေးရန် သယ်ယူပို့ဆောင်ပေးမည်ဖြစ်ကြောင်း စုံစမ်းသိရသည်။

ယမန်နေ့ (ဒီဇင်ဘာလ ၂၅ ရက်) နံနက်ပိုင်းတွင် လားရှိုးမြို့နယ်အတွင်း ကိုးကန့်တပ်ဖွဲ့ MNDAA ထိန်းချုပ်ထားသည့် နမ့်ပေါင်ကျေးရွာတွင် MNDAA လက်အောက်ခံ ရွာလူကြီးမှ ရွာသားများကို လူစုကာ လားရှိုးမြို့ပေါ်ရှိ မဲရုံများတွင် ဆန္ဒမဲသွားပေးရန် သယ်ယူပို့ဆောင်ပေးမည်ဟု ပြောဆိုခဲ့ကြောင်း ဒေသခံများက ပြောသည်။

“မနေ့က မနက်ပိုင်းမှာ ကိုးကန့်လူကြီးတွေ ရွာသားတွေကို တံတားနားမှာ လူစုဖို့ ခေါ်တယ်။ မဲသွားပေးဖို့ လားရှိုးဘက်က ကားနဲ့ လာကြိုမယ်၊ လားရှိုးမှာ မဲရုံနေရာခွဲပြီး သွားပေးရမယ်လို့ ပြောတယ်” ဟု နမ့်ပေါင်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် ဒီဇင်ဘာလလယ်တွင် လားရှိုးမြို့နယ်အတွင်း ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုး-မိုင်းရယ် လမ်းမကြီးတလျှောက်ရှိ ကျေးရွာများတွင် ရွေးကောက်ပွဲ ကျင်းပနိုင်ရေး မဲရုံ ဖွင့်လှစ်ရန် စစ်ကော်မရှင်လက်အောက်ခံ ဌာနဆိုင်ရာ ဝန်ထမ်းများ နှစ်ဘက်တပ်ဖွဲ့ လုံခြုံရေးရယူပြီး သွားရောက်ကြည့်ရှုခဲ့ကြောင်း ဒေသခံများက ပြောသည်။

သို့သော် လားရှိုးမြို့နယ်ရှိ MNDAA ထိန်းချုပ်နယ်မြေများတွင် ရွေးကောက်ပွဲလုပ်ရန် ခွင့်မပြုထားသကဲ့သို့ မဲရုံလည်း ဖွင့်လှစ်ခွင့်မပြုကြောင်း MNDAA သတင်းများ ဖော်ပြနေသည့် The Kokang တွင် သတင်းတင်ဆက်နေသူ နေဝေစိုး က ဖေ့စ်ဘုတ်လူမှုကွန်ရက်မှတဆင့် ပြန်လည်ဖြေရှင်းခဲ့သည်။

“မဲပေးဖို့ကတော့ ဒေသခံတွေ စိတ်မဝင်စားပေမယ့် ထွေအုပ်က သန်းခေါင်စာရင်း ကောက်တုန်းက စာရင်းအတိုင်း တချို့လူတွေကို ခေါ်တာဖြစ်မယ်။ အဲ့တုန်းက သန်းခေါင်စာရင်း လာကောက်တဲ့အချိန် ကိုးကန့်တွေပဲ လုံခြုံရေးယူပေးတယ်လို့ ပြောတယ်။ စာရင်းပါတာလည်း တချို့ ဝန်ထမ်းတွေပဲ” ဟု နမ့်ပေါင်ဒေသခံ ၎င်းအမျိုးသားက ဆက်ပြောသည်။

လားရှိုးမြို့ပေါ်သို့ မဲသွားပေးရန် MNDAA တာဝန်ရှိသူများက ဒေသခံများကို ပြောဆိုခဲ့သော်လည်း မည်သူက တာဝန်ယူ၍ ကြိုဆိုပို့ဆောင်ပေးမည်ကို ရှင်းရှင်းလင်းလင်း မသိရပေ။

လားရှိုးမြို့နယ်သည် ဒီဇင်ဘာလ (၂၈) ရက်တွင် စတင်ကျင်းပမည့် ရွေးကောက်ပွဲ ပထမပိုင်းတွင် ပါဝင်နေသော်လည်း စစ်ကော်မရှင်ဘက်မှ မြို့ပေါ်ရပ်ကွက် (၁၂) ခုသာ ထိန်းချုပ်ခွင့် ရရှိထားပြီး မြို့ပြင်ရှိ ကျေးရွာအုပ်စု အများစုကို ကိုးကန့်တပ်ဖွဲ့ MNDAA က ထိန်းချုပ်ထားသည်။

လားရှိုးမြို့ပေါ် ရပ်ကွက် ၁၂ ခုနှင့် ဟူးမွန်ကျေးရွာအုပ်စုတွင် မဲရုံ ၆၆ ရုံ ထားရှိပြီး မဲဆန္ဒရှင် ၁၀၇,၈၆၇ ဦး ရှိကြောင်း စစ်ကော်မရှင်လက်အောက်ခံ ခရိုင်ပြန်ကြားရေးနှင့် ဆက်သွယ်ရေးဦးစီးဌာနမှ သတင်းထုတ်ပြန်ထားသည်။

ပြီးခဲ့သည့် ဒီဇင်ဘာလ (၅) ရက်တွင် စစ်ကော်မရှင်လက်အောက်ခံ ပြည်ထောင်စုရွေးကောက်ပွဲကော်မရှင် UEC ထုတ်ပြန်ခဲ့သည့် ရွေးကောက်ပွဲ ကျင်းပခြင်းမပြုမည့် နယ်မြေစာရင်းတွင် လားရှိုးမြို့နယ်မှ ကျေးရွာအုပ်စုပေါင်း (၆၄) အုပ်စုအထိ ပါရှိသည်။

စစ်ကော်မရှင် ကျင်းပမည့် ရွေးကောက်ပွဲ ပထမပိုင်း ရက်သတ္တပတ်အလို ဒီဇင်ဘာလ (၂၁) ရက်၌ လားရှိုးမြို့ပေါ် (၃) နေရာတွင် ပေါက်ကွဲမှု ဖြစ်ပွားပြီးနောက် မြို့တွင်း စစ်ဆေးရေးဂိတ်များ စစ်ဆေးမှု တင်းကြပ်နေကြောင်း ဒေသခံများထံမှ သိရသည်။