မြန်မာစစ်တပ်အတွက် သွင်းလာသော တရုတ်နိုင်ငံလုပ် ဒရုန်း ၁၀ စီးနှင့် မြန်မာနိုင်ငံသား ၄ ဦးကို ထိုင်းနိုင်ငံ သုဝဏ္ဏဘူမိလေဆိပ်အနီးရှိ ဟိုတယ်အခန်းတွင် သိမ်းဆည်းရမိကြောင်း ဘန်ကောက်ပို့စ်သတင်းက ဒီဇင်ဘာလ ၂၃ ရက်တွင် ဖော်ပြသည်။

ဖြစ်စဉ်မှာ ဒီဇင်ဘာလ ၂၁ ရက်က လေဆိပ်အနီးတွင် ဒရုန်းများ ပျံသန်းနေသည်ဟူသော သတင်းများ ထွက်ပေါ်ပြီးနောက် အမျိုးသားလုံခြုံရေးကောင်စီ (NSC) က ခြေရာခံလိုက်စုံစမ်းရာ ဒရုန်းလွှတ်သည့် နေရာအား အတည်ပြုနိုင်ခဲ့ပြီး ဒီဇင်ဘာလ ၂၂ ရက်က ရှာဖွေစီးနင်းမှုများ ပြုလုပ်ခဲ့ခြင်း ဖြစ်ကြောင်း ဘန်ကောက်ပို့စ်သတင်းက ဆိုသည်။

ထို့နောက် လေဆိပ်နှင့် ၃ ကိလိုမီတာခန့်အကွာ လတ်ကရာဘန် Soi 30/4 ၊ Grand BS Airport Hotel Suvarnabhumi ရှိ အခန်းတစ်ခန်းကို ရဲများက ဝင်ရောက်ဖမ်းဆီးခဲ့ရာ သံသယရှိသူ အသက် ၃၂ နှစ်အရွယ် ဇွဲထက်အောင်၊ ၂၄ နှစ်အရွယ် စနေလင်းထက်၊ ၂၁ နှစ်အရွယ် ကျော်ဇင်ဟိန်းနှင့် ၃၄ နှစ်အရွယ် သိန်းဇော်တို့ကို ဖမ်းဆီးရမိခဲ့ခြင်း ဖြစ်သည်။

၎င်းတို့ ၄ ဦးသည် အဆိုပါဟိုတယ်သို့ ဒီဇင်ဘာလ ၂၁ ရက်က David အမည်ဖြင့် အွန်လိုင်းမှ ကြိုတင်ဘွတ်ကင်လုပ်ကာ ဝင်ရောက်ခဲ့ပြီး၊ စစ်ဆေးချက်များအရ သံသယရှိများက ၎င်းတို့အား ထိုင်းနိုင်ငံတွင် ဒရုန်းများလာယူရန် အမည်မသိ မြန်မာနိုင်ငံသား ၁ ဦးက ဌားရမ်းခဲ့ကြောင်း ထွက်ဆိုခဲ့သည်ဟု ဘန်ကောက်ပို့စ်သတင်းက ဖော်ပြထားသည်။

တရုတ်နိုင်ငံ DJI မှ ထုတ်လုပ်သော ဒရုန်း ၁၀ စင်းကို အခန်းထဲမှ သိမ်းဆည်းခဲ့ပြီး အဆိုပါဒရုန်းများကို ၎င်းတို့ ၄ ဦးက မြန်မာနိုင်ငံရှိ Kevin Zo အမည်ရှိ သူဌေးထံ ယူဆောင်လာရန် ခိုင်းစေခံရကြောင်း၊ အဆိုပါသူဌေးက မြန်မာစစ်တပ်သို့ ရောင်းချပေးမည်ဟု ပြောကြားခဲ့ကြောင်း သိရသည်။

လက်ရှိတွင် သံသယရှိသူများ၏ ဗီဇာများကို ပယ်ဖျက်ခဲ့ပြီး ဆက်လက်စုံစမ်းမြန်းမှုများ ပြုလုပ်ရန် လူဝင်မှုကြီးကြပ်ရေး ဗျူရိုမှ ဖမ်းဆီးထိန်းသိမ်းထားကြောင်း ဘန်ကောက်ပို့စ်သတင်းက ဆိုသည်။

ထိုင်းနိုင်ငံ ဘန်ကောက်မြို့ သုဝဏ္ဏဘူမိလေဆိပ်အနီးတွင် သံသယရှိသော ဒရုန်းပျံသန်းမှုများကို တွေ့ရှိခြင်းကြောင့် လုံခြုံရေး အေဂျင်စီများ၊ အမျိုးသားအသံလွှင့်ဌာနနှင့် ဆက်သွယ်ရေးကော်မရှင် (NBTC) က လုံခြုံရေးအဖွဲ့များနှင့် ပူးပေါင်း၍ ထပ်မံရှာဖွေရာ သံသယဖြစ်ဖွယ် ဒရုန်းအစင်းရေ ၂,၅၀၀ ကျော်ကို သိမ်ဆည်းရမိခဲ့ကြောင်း ထိုင်းအမှတ် (၂) စစ်ဒေသက ဒီဇင်ဘာလ ၂၃ ရက်နေ့တွင် နောက်ဆက်တွဲ သတင်းထုတ်ပြန်သည်။

ထိုင်းနိုင်ငံ အရပ်ဘက်လေကြောင်း အာဏာပိုင်အဖွဲ့ (CAAT) နှင့် အမျိုးသားအသံလွှင့်ဌာနနှင့် ဆက်သွယ်ရေး ကော်မရှင် (NBTC) တို့၏ ကြေညာချက်များအရ ထိုင်းနိုင်ငံတွင် ဒရုန်းပျံသန်းရန်အတွက် ဒရုန်းရရှိပြီး ၃၀ ရက်အတွင်း မှတ်ပုံတင်ရမည်ဖြစ်ကြောင်း သိရသည်။

ထိုင်းဥပဒေအရ ကင်မရာတပ်ဆင်ထားသည့် ဒရုန်းများ အားလုံးသည် NBTC နှင့် CAAT တွင် မှတ်ပုံတင်ရမည် ဖြစ်ပြီး၊ အကယ်၍ ကင်မရာ တပ်ဆင်ထားခြင်းမရှိသည့် (အလေးချိန် ၂ ကီလိုထက်ပိုသော) ဒရုန်းများမှာလည်း NBTC နှင့် CAAT တွင် မှတ်ပုံတင်ရမည် ဖြစ်သည်။

ကင်မရာတပ်ဆင်ထားခြင်းမရှိသည့် (အလေးချိန် ၂ ကီလိုထက်နည်းသော) ဒရုန်းများမှာမူ NBTC တွင် မှတ်ပုံတင်ရန် လိုအပ်ပြီး CAAT တွင် မှတ်ပုံတင်ရန် မလိုအပ်ပေ။ အလားတူ (အလေးချိန် ၂၅ ကီလိုထက်ပိုသော) ဒရုန်းများ အားလုံးသည် NBTC နှင့် CAAT တွင် မှတ်ပုံတင်ရမည် ဖြစ်သည်။

နယ်စပ်လုံခြုံရေး အခြေအနေများကြောင့် အထူးခွင့်ပြုချက်မရှိဘဲ ဒရုန်းပျံသန်းခြင်းမရသကဲ့သို့ လေဆိပ်နှင့် လေယာဉ်ပျံ တက်/ ဆင်း နေရာများ၊ တော်ဝင်နန်းတော်၊ စစ်ဘက်နယ်မြေများနှင့် လုံခြုံရေးအေဂျင်စီလို နေရာများတွင် ပျံ့သန်း၍ မရကြောင်း ထိုင်းဥပဒေအရ သတ်မှတ်ထားသည်။

ထို့အပြင် ဒရုန်းပျံသန်းချိန်ကိုလည်း နံနက် ၆ နာရီမှ ညနေ ၆ နာရီအတွင်း သတ်မှတ်ထားပြီး အမြင့် ၉၀ မီတာ (ပေ ၃၀၀) ထက် မပိုစေရကြောင်း သတ်မှတ်ထားသည်။ အကယ်၍ ခွင့်ပြုချက်မရှိဘဲ ဒရုန်းပျံသန်းခြင်း (သို့မဟုတ်) ကန့်သတ်နေရာများတွင် ဒရုန်းပျံသန်းပါက ထိုင်းဥပဒေအရ ထောင်ဒဏ် ၁ နှစ် (သို့မဟုတ်) ဒဏ်ငွေ ၄၀,၀၀၀ (သို့မဟုတ်) နှစ်မျိုးစလုံး ချမှတ်ခံရနိုင်သည်။