သျှမ်းပြည်တောင်ပိုင်း အင်းလေးဒေသသို့ စစ်ဘေးရှောင်လာသည့် အမျိုးသားတစ်ဉီးသည် ၎င်း၏ နေရပ်ဖြစ်သည့် ဖယ်ခုံမြို့နယ်အတွင်းသို့ ပြောင်းချိုးရန် သွားစဉ် ပျောက်ဆုံးသွားကြောင်း သတင်းရရှိသည်။
ပြီးခဲ့သည့် ဒီဇင်ဘာ ၁၁ရက်တွင် အသက် ၂၄နှစ်အရွယ်ရှိ ကိုအောင်ကိုကို(ခ)ဖိုးနီသည် ဖယ်ခုံမြို့နယ် နောင်လိုင်ကျေးရွာသို့ ပြောင်းဖူးချိုးရန် နေရပ်ပြန်သွားခဲ့သည်။ ဒီဇင်ဘာ ၁၈ရက်တွင် အင်းလေးဒေသ စံကားကျေးရွာအုပ်စု ကုန်သာကျေးရွာသို့ပြန်လာပြီး အဒေါ်အိမ်တွင် ညအိပ်ခဲ့သည်။
ထို့နောက် ဒီဇင်ဘာ ၁၉ရက် မနက်ပိုင်းတွင် ကိုအောင်ကိုကို(ခ) ဖိုးနီသည် ဇနီးနှင့် ကလေး ၂ယောက်ရှိရာ စစ်ဘေးရှောင်နေရာသို့ ပြန်လာရာလမ်းတွင် ရုတ်တရက်ပျောက်ဆုံးသွားခဲ့ရာမှ ယနေ့(ဒီဇင်ဘာ ၂၃)ရက်ထိ မတွေ့ရှိသေးကာ မိသားစုဝင်များက စိုးရိမ်ပူပန်နေကြသည်။
“ပျောက်နေတာက ၄ ရက်လောက်ရှိပြီ၊ခုထိ အဆက်သွယ် စကားမပြောရသေးဘူး။ ပျောက်သွားတော့ စိတ်ပူတာပေါ့ တစ်ခုခုများ ဖြစ်နေမလား မသိဘူး၊ သွားတုန်းကတော့ သူ့သူငယ်ချင်းတွေပါတယ် ပြန်လာတော့ မပါဘူး တစ်ယောက်တည်းလို့ ပြောတယ်။ တစ်ခုခု မဖြစ်နေဖို့ပဲ ဆုတောင်းနေရတယ်။”ဟု အောက်ကိုကို၏ မိသားစုဝင် တစ်ဦးက သျှမ်းသံတောင်ဆင့်ကို ပြောသည်။
ကိုအောင်ကိုကိုတို့မိသားစုသည် ၂၀၂၃ခုနစ် နိုဝင်ဘာ ၁၁ရက်တွင် သျှမ်း-ကရင်နီနယ်စပ် ၌ စစ်ကော်မရှင်တပ်၊ ပအိုဝ်းပြည်သူ့စစ် (PNO)နှင့် တော်လှန်ရေးတပ်ပေါင်းစုတို့ တိုက်ပွဲဖြစ်ပွားမှုကြောင့် အင်းလေးဒေသသို့ ထွက်ပြေး တိမ်းရှောင်လာကြသူများ ဖြစ်သည်။
ထိုအချိန်မှစပြီး ယနေ့ထိတိုင် ကိုအောင်ကိုကိုတို့ မိသားစုသည် နေရပ်ပြန်နိုင်ခြင်းမရှိပေ။ သို့သော်လည်း ဝမ်းရေးအတွက် ပြောင်းချိုးရန်အတွက် သွားရာမှ ပျောက်ဆုံးခဲ့ခြင်းဖြစ်သည်။
ကိုအောင်ကိုကို ပျောက်ဆုံးမှုနှင့်ပတ်သက်ပြီး မိသားစုဝင်များလည်း လူမှုကွန်ရက်စာမျက်နှာပေါ် လူပျောက် ကြေညာခဲ့သည်။
ထို့နောက် အမည်မသိ အမျိုးသားတစ်ဉီးက ဖုန်းခေါ်ဆိုလာပြီး ကိုအောင်ကိုကိုသည် မိတ္ထီလာမြို့မရဲစခန်းတွင် ဖမ်းဆီးထားကြောင်း ငွေကျပ်(၇)သိန်းဖြင့် လာရောက် ညှိနှိုင်းရန်ပြောဆိုလာသေးသည်။
“မိတ္ထီလာမှာ ဖမ်းထားတယ်ဆိုပြီး ဖုန်းခေါ်လာတာ၊ ဖုန်းခေါ်တဲ့ သူက သူ့ကိုယ်သူ ဗိုလ်မှူးလို့ပြောတယ်။ ပိုက်ဆံ ငွေကျပ် (၇)သိန်းနဲ့ လာညှိနိူင်းလို့ရတယ်ပြောတယ်။ အဲဒါနဲ့ ဒီဖက်ကလည်း သေချာအောင် စုံစမ်းပြီး လိုက်သွားဖို့ ပြင်ဆင်နေတယ်။”ဟု မိသားစုဝင် အမျိုးသမီးတစ်ဦးက ဆက်ပြောသည်။
သို့သော်လည်း ငွေလိမ်လည်မှုဖြစ်မည်ကို စိုးရိမ်နေရသဖြင့် သေချာအောင်စုံစမ်းနေရကြောင်းလည်း ၎င်းက ဆက်ပြောသည်။
ပြီးခဲ့သည့် အောက်တိုဘာလ (၁၂) ရက်နေ့တွင် တောင်ကြီးမြို့နယ် ကျောင်းကြီးစုရပ်ကွက်တွင် နေထိုသည့် အသက် (၂၈)နှစ်အရွယ် ကိုရဲသီဟအောင် သည် နေအိမ်အပြင် ခဏသွားမည်ဟုဆို၍ ပျောက်ဆုံးသွားသည်မှာ နှစ်လရှိပြီ ဖြစ်ပြီး ယနေ့အထိ မတွေ့သေးကြောင်း သိရသည်။
Leave a Comments