သျှမ်းပြည်တောင်ပိုင်းရှိ ဟိုပုံး၊ ပင်လောင်း၊ လွိုင်လင်နှင့် ဆီဆိုင်မြို့နယ်တို့တွင် နှစ်စဉ် ဘိန်းစိုက်ခွန် ကောက်ခံနေသည့် စစ်ကော်မရှင်နှင့် ပအိုဝ်းပြည်သူ့စစ် (PNO) တို့က သီးသန့်စိုက်ထားသည့် ဘိန်းခင်းများကို ထပ်မံဟန်ပြ ဖျက်ဆီးသွားခဲ့ကြောင်း သတင်းရရှိသည်။

ပြီးခဲ့သည့် ဒီဇင်ဘာလ ၂၀ ရက်တွင် ဟိုပုံးမြို့နယ်၊ စငေါကျေးရွာအုပ်စု လိုက်ကန်ကျေးရွာ အရှေ့မြောက်ဘက်တွင် စိုက်ပျိုးထားသည့် ဘိန်းစိုက်ခင်း ၂၁ ဧကကို စစ်ကော်မရှင်တပ်သားနှင့် ရဲတပ်ဖွဲ့ အပါအဝင် ၎င်းတို့ နေ့စားခေါ်လာသည့် လူအင်အား (၆၀) ခန့်ဖြင့် လာရောက်ဖျက်ဆီးသွားခဲ့သည်။

ထိုသို့ လာရောက်ဖျက်ဆီးခဲ့သည့် စစ်ကောင်မရှင် လက်အောက်ခံများထဲတွင် PNO တပ်သားဟု ယူဆရသည့် ရဲယူနီဖောင်းဝတ်များလည်း ပါဝင်နေကြောင်း ဒေသခံများက ပြောသည်။

“ဘိန်းခင်းတော့ လာဖျက်သွားတယ်၊ သူတို့နဲ့ ညှိထားတဲ့ အခင်းတော့ မဖျက်သွားဘူး။ ရဲနဲ့ စစ်သား က အယောက် ၂၀ ပါတယ်၊ ကျန်တဲ့ လူတွေက ဘယ်ဒေသကလည်း မသိဘူး နေ့စားလိုက်သမားတွေ။ တချို့ ရဲယူနီဖောင်းနဲ့လည်း ပအိုဝ်းလိုတွေ ပြောတော့ PNO တပ်ဖွဲ့ကလို့ ယူဆရတယ်”ဟု ဟိုပုံးဒေသခံ အမျိုးသားတစ်ဦးက ပြောသည်။

အဆိုပါ ဘိန်းစိုက်ခင်းများကို စစ်ကော်မရှင်တပ်နှင့် PNO တပ်သားများထံ ဒေသခံများက ဧကပေါ် မူတည်၍ ငွေကျပ် ၅ သိန်းမှ ၁၀ သိန်းခန့် စတင်၍ နှစ်စဉ် အခွန်ပေးဆောင်ရပြီး ဟိုပုံးမြို့နယ် နောင်လိုင်ကျေးရွာအုပ်စုတွင် ဘိန်းအဓိကထား စိုက်ပျိုးသောကြောင့် အခွန်ပိုဆောင်ရကြောင်း သိရသည်။

စစ်ကော်မရှင်တပ် အာဏာသိမ်းပြီး ငါးနှစ်အကြာတွင် ဟိုပုံးမြို့နယ်တွင် လူငယ်များ ပြည်ပထွက်ကုန်၍ လူ့စွမ်းအားအရင်းအမြစ် လျော့နည်းကာ ဘိန်းခင်းများသည်လည်း သုံးပုံ နှစ်ပုံလောက်သာ စိုက်ပျိုးကြတော့ကြောင်း ဒေသခံများက ပြောသည်။

“အဓိက နိုင်ငံရေး မကောင်းတာ၊ စစ်မှုထမ်းတွေ ရှိတော့ လူ့အရင်းအမြစ်တွေက ပြည်ပကို ထွက်ကုန်တော့ ဘိန်းစိုက်တာ လျော့နည်းလာတယ်။ ဘိန်းစိုက်ရတဲ့ အကြောင်းကလည်း အဓိက စျေးကောင်းရလို့ရယ်၊ ကျနော်တို့ဘက်က တောင်ကုန်း တောင်တန်းတွေပဲဆိုတော့ ဘိန်းပဲ စိုက်ကြတယ်”ဟု ဘိန်းစိုက်ပျိုးသူ ဒေသခံ အမျိုးသားတစ်ဦးက ပြောသည်။

အခြားတစ်ဖက်တွင် ဟိုပုံးမြို့နယ် စံဖူးကျေးရွာအုပ်စုတွင် ဘိန်းအစားထိုး ကော်ဖီစိုက်ပျိုးမှုများ ရှိနေပြီး ဘိန်းစိုက်ပျိုးသူ နည်းသွားကြောင်း ၎င်းက ဆက်ပြောသည်။

လွိုင်လင်မြို့နယ်၊ ဟိုပုံးမြို့နယ်၊ ဆီဆိုင်မြို့နယ်နှင့် ပင်လောင်းမြို့နယ်တို့တွင် စစ်ကော်မရှင်တပ်နှင့် ရဲတပ်ဖွဲ့က ဘိန်းခင်း ၂၈၆ ဧကကို ဖျက်ဆီးခဲ့ကြောင်း ပြီးခဲ့သည့် ဒီဇင်ဘာလ ၂၀ ရက်တွင် ထုတ်ပြန်ထားသည်။

မြန်မာနိုင်ငံတွင် ယခုနှစ်အတွင်း တရားမဝင် ဘိန်းထုတ်လုပ်မှု တန်ချိန် ၁,၀၁၀ အထိရှိခဲ့ပြီး ဘိန်းစိုက်ပျိုးမှု ဆယ်နှစ်အတွင်း အမြင့်ဆုံးသို့ ရောက်ရှိလာကြောင်း ကုလသမဂ္ဂ မူးယစ်ဆေးဝါးနှင့် ရာဇဝတ်မှုဆိုင်ရာအဖွဲ့ရုံး (UNODC) က ဒီဇင်ဘာလ ၃ ရက်တွင် ထုတ်ပြန်သည်။

ယခုနှစ်အတွင်း မြန်မာနိုင်ငံ၏ ဘိန်းစိုက်ပျိုးမြေသည် ပြီးခဲ့သော ယခင်နှစ်ထက် ၁၇ ရာခိုင်နှုန်း တိုးလာပြီး ၅၃,၁၀၀ ဟက်တာအထိ ရှိလာပြီး အဆိုပါ ဘိန်းစိုက်ပျိုးမှုများအနက် သျှမ်းပြည်သည် တစ်နိုင်ငံလုံး အတိုင်းအတာ၏ ၈၀ ရာခိုင်နှုန်းအထိ ရှိလာကာ အဓိက ဘိန်းစိုက်ပျိုး နယ်မြေတစ်ခု ဖြစ်နေကြောင်း UNODC ဆိုထားသည်။