သျှမ်းပြည်တောင်ပိုင်း၊ ညောင်ရွှေမြို့ မြို့မ မင်္ဂလာဈေးတွင် ဆန္ဒမဲပေးရန် စိတ်မဝင်စားဘဲ ဝမ်းရေးအတွက် ရုန်းကန်နေရသည့် စျေးသည်များကို စစ်ကောင်စီက မဲပေးရန် လက်ကမ်းစာစောင်များ ဖြန့်ဝေပေးနေကြောင်း သတင်းရရှိသည်။

ပြီးခဲ့သည့် ဒီဇင်ဘာလ ၁၃ ရက်တွင် ညောင်ရွှေမြို့မ မင်္ဂလာဈေးတွင် လက်ကမ်းစာစောင်များကို စစ်ကော်မရှင် လက်အောက်ခံ ရဲနှင့် ဝန်ထမ်းများက ယူနီဖောင်းအပြည်ဝတ်ဆင်လာပြီး လိုက်လံဖြန့်ဝေနေသည်။

“ဈေးထဲမှာ ယူနီးဖောင်းအပြည့်နဲ့ ရဲတွေ ဝန်ထမ်းတွေ တွေ့တော့ ဘာလဲပေါ့။ဘာများ ဖမ်းနေလဲ၊ စစ်ဆေးနေလဲ။ လက်ကမ်းစာစောင် ဝေပြီး ပုံရိုက်နေတာ။ အဲယူနီဖောင်းနဲ့ဆို မယူချင်လည်း ယူရတာပဲ။ ယူပြီး ဈေးထဲချခဲ့တာလည်း ရှိတယ်။”ဟု ဈေးလာဝယ်သူ အမျိုးသမီးတစ်ဦးက ပြောသည်။

အဆိုပါ လက်ကမ်းစာစောင်ထဲတွင် “ဒို့အတူမဲပေးကြမည်” ရွေးကောက်ပွဲမှ “ပိုကောင်းမွန်သော အနာဂတ်ဆီသို့ “ စသဖြင့် စာသားများပါဝင်ပြီး ရွေးကောက်ပွဲတွင် လူတိုင်းမဲထည့်ကြရန် စစ်ကော်မရှင်က လိုက်လံစည်းရုံးနေသည်။

စစ်ကော်မရှင်တပ်က ရွေးကောက်ပွဲကျင်းပနိုင်ရေး အတွက် ပြည်သူများကို ဖိအားပေးနေသော်လည်း ပြည်သူများသည် ရွေးကောက်ပွဲထက် ဝမ်းရေးအတွက် ရုန်းကန်နေရသောကြောင့် စိတ်ဝင်စားမှုမရှိဘဲ ခြမ်းခြောက်မှုကြောင့် မဲထည့်ရမည်ဖြစ်ကြောင်း ညောင်ရွှေဒေသခံအမျိုးသမီးတစ်ဉီးက ပြောသည်။

“ရွေးကောက်ပွဲလုပ်လည်း ဘာမှပြောင်းလဲသွားဖို့လည်း မမျှော်လင့်ဘူး။ ကြံ့ခိုင်ရေးနိုင်မယ်ဆိုတာလည်း သိနေတာကို ဘာလို့ရွေးကောက်ပွဲလုပ်နေလဲ မသိဘူး။ မဲမထည့်ရင် ဘာဖြစ်မယ် ညာဖြစ်မယ်နဲ့ တော့ပြောကြတယ်။ ကြောက်တော့လည်း ထည့်ရင် ရမှာ၊ ရွေးကောက်ပွဲထက် မငတ်အောင်ရုန်းကန်နေရလို့ စိတ်မဝင်စားအားဘူး။” ဟု ၎င်းက ပြောသည်။

အလားတူ ပင်းတယမြို့ ဈေးတန်းတွင်လည်း မဲပေးရန် လက်ကမ်းစာစောင်များလိုက်ဝေနေသော်လည်း ပြည်သူများ စိတ်ဝင်စားမှုမရှိကြောင်း သိရသည်။

လာမည့် ဒီဇင်ဘာလ ၂၈ ရက်နေ့တွင် ကျင်းပပြုလုပ်မည့် စစ်ကော်မရှင်၏ ရွေးကောက်ပွဲ ပထမသုတ်ကို သျှမ်းပြည်နယ်အတွင်း ပင်းတယ၊ ဟိုပုံး၊ နောင်ချို၊ ကျိုင်းတုံ၊ တာချီလိတ်၊ တောင်ကြီး၊ နမ့်စန်၊ မူဆယ်၊ မိုင်းဆတ်၊ လားရှိုး၊ လင်းခေးနှင့် လွိုင်လင်စသည့် ( ၁၂) မြို့နယ်တွင် ကျင်းပပြုလုပ်သွားမည်ဖြစ်သည်။