သျှမ်းပြည်တောင်ပိုင်း၊ တောင်ကြီးမြို့နယ်တွင် စစ်ကော်မရှင်လက်အောက်ခံ ရဲနှင့်စစ်သား များသည် နှစ်ကုန်ခါနီး လိုင်စင်မဲ့ ကားများကို ထပ်မံဖမ်းဆီးနေကြောင်း သတင်းရရှိသည်။

ပြီးခဲ့သည့် ဒီဇင်ဘာလ ၁၃ ရက်နေ့တွင် တောင်ကြီးမြို့ အဝင်၊အထွက် နှင့် မြို့ထဲလမ်းဆုံ လမ်းခွများတွင် ရဲနှင့် စစ်သားများက လိုင်စင်မဲ့ ကားများကို ရှောင်တခင် စစ်ဆေး ဖမ်းဆီး ငွေညှစ်နေကြောင်း သိရသည်။

ထိုသို့ ဖမ်းဆီးရမိသည့် ကားများသည် နယ်မှ ဆေးရုံလာတက်သူများနှင့် ဘွဲ့လာယူသည့် မိသားစု ကားများ ဖြစ်ကြပြီး၊ ပြန်ရွေးခွင့်မရှိကြောင်းသိရသည်။

“နှစ်ကုန်ခါနီးဆိုတော့ လိုင်စင်မဲ့ကားတွေ ပြန်ဖမ်းတာဖြစ်မယ်။ သူတို့အိတ်ထဲရသမျှ ထည့်နေကြတာ။ ပြီးခဲ့တဲ့ ဒီဇင်ဘာ ၁၃ ရက်တုန်းကတောင် ကားအစီးရေ ၈၀ ကျော် ဖမ်းခံလိုက်ရတယ်။ ဘယ်မှာ သွားရွေးထုတ်လို့ရလဲ ဆိုတာတော့ မသိဘူး။ ပြန်မပေးဘူးလို့လည်း ကြားတယ်။” ဟု တောင်ကြီးမြို့ခံ အမျိုးသားတစ်ဦးက ပြောသည်။

တောင်ကြီးမြို့ ခိုင်မေတ္တာဆေးရုံ လမ်းဆုံနှင့် ဝါးပြားလမ်းဆုံဘက်တွင် စစ်ကော်မရှင်လက်အောက်ခံ ရဲနှင့် စစ်သား အပါဝင် ယာဉ်ထိန်းရဲများက လိုက်လံ ဖမ်းဆီးခဲ့ကြောင်း ၎င်းက ဆက်ပြောသည်။

ထို့အပြင် ပြီးခဲ့သည့် ဒီဇင်ဘာလ ၁၀ရက်တွင်လည်း တောင်ကြီးတက္ကသိုလ်တွင် လာရောက်ဘွဲ့ယူသည့် မိုင်းဆတ်၊ ကျိုင်းတောင်း၊ လင်းခေး လွိုင်လင် နှင့် ပင်လုံ ဘက်မှ လိုင်စင်မဲ့ကားများကို တောင်ကြီး-ဟိုပုံးသွားလမ်း မိုင်းပွန်ဂိတ်တွင် စစ်ကော်မရှင်တပ်နှင့် ရဲများက ဖမ်းဆီးခဲ့ကြောင်း သိရသည်။

“မိုင်းပွန်ဂိတ်မှာလည်းဖမ်းသွားတယ်၊ ဒီနေ့(ဒီဇင်ဘာလ ၁၅ ရက်) မနက်မှာပဲ ဟိုပုံးမြို့ တရားရုံးမှာ လိုင်စင်မဲ့ ကားမောင်းနင်းလို့ဆိုတဲ့ ပုဒ်မတွေနဲ့ ကားမောင်းတဲ့သူတွေအပြင် တခြားသူတွေကိုပါ တရားဆွဲဆိုထားတယ်လို့ သိရတယ်။ လူကတော့ လွတ်ချင်ရင် သိန်း ၃၀ ကျပ်ပေးရမယ်တဲ့၊ ကားတော့ မလွတ်တော့ဘူး အပြီးသိမ်းလိုက်ပြီတဲ့။”ဟု ခရီးသွားအမျိုးသမီးတစ်ဦးက ပြောသည်။

စစ်ကော်မရှင်က ကားများကို သိမ်းဆည်းသွားသည့်အပြင် ကားရွေးထုတ်ရန် ရဲစခန်းသို့ လာလျှင်လည်း ထပ်မံဖမ်းခံရမည်ကြောင်း စစ်ကော်မရှင်တပ်က ခြိမ်းခြောက်လိုက်သည်ဟု အဆိုပါ အမျိုးသမီးက ထပ်လောင်းပြောသည်။

အလားတူ ရွာငံမြို့နယ်မှ တောင်ကြီးမြို့သို့ ဘွဲ့ယူသွားသော မိသားစုသည် လိုင်စင်မဲ့ကားများကို ဖမ်းဆီးနေသည်ဆိုသောကြောင့် လိုင်စင်ရှိကားများကို ငှားရမ်းရာတွင် ငွေကြေး နှစ်ဆပိုပေး၍ ငှားရမ်းခဲ့ရကြောင်း သိရသည်။

ယခုလက်ရှိ တောင်ကြီးမြို့တွင် စစ်ကော်မရှင်တပ်နှင့် ရဲများက အရပ်ဝတ်သား ဝတ်စုံဖြင့် ညအချိန်တွင် ကင်းလှည့်ကာ မြို့ခံများကို စောင့်ကြည့်နေသဖြင့် ပေါ်တာဆွဲခံရမည်ကို စိုးရိမ်နေကြောင်း မြိုခံများက ပြောသည်။

ပြီးခဲ့သည့် မေလ (၂)ရက်တွင် စစ်ခေါင်းဆောင်က လိုင်စင်မဲ့မော်တော်ယာဉ်နှင့် ဆိုင်ကယ်များကို ထိထိရောက်ရောက် ဖမ်းဆီးအရေးယူရန် ညွှန်ကြားခဲ့ပြီး ထိုအချိန်မှစ၍ ယခု ဒီဇင်ဘာလအထိ( ၇ )လတာကြာမြင့်စွာ ဖမ်းဆီးမှုများလုပ်ဆောင်နေသည်။