သျှမ်းပြည်တောင်ပိုင်း ဟိုပုံး-တောင်ကြီးလမ်းမကြီးပေါ် စစ်ကော်မရှင်နှင့် ပအိုဝ်းပြည်သူ့စစ် (PNO)တို့ ပူးပေါင်း စစ်ဆေးရေးဂိတ်တွင် ကုန်တင်ကားတစ်စီးလျှင် ငွေကျပ် တစ်သိန်းကျော် အထိ ပေးဆောင်နေရကြောင်း သတင်းရရှိသည်။
ဒီဇင်ဘာလ ပထမပတ်မှ စပြီး ဟိုပုံး-တောင်ကြီးသွားလမ်း တိုးဂိတ်အကျော်ရှိ စစ်ကော်မရှင်တပ်နှင့် ၎င်းလက်အောက်ခံ PNO ပြည်သူ့စစ် ပူးပေါင်းစစ်ဆေးရေးဂိတ်တွင် ကုန်တင်ကားများကို စစ်ဆေးတင်းကြပ်နေပြီး ကုန်စိမ်းတင်ဆောင်သည့် ကားတစ်စီးလျှင် ငွေကျပ် (၈၀၀၀၀) အထိ ကောက်ခံကြောင်း သိရသည်။
အလားတူ ကျောက်မီးသွေး၊ ဘိလပ်မြေ၊ သံသတ္တုနှင့် ဓာတ်မြေဩဇာ တင်ဆောင်သည့် ကားများကို တစ်စီးလျှင် ငွေကျပ် တစ်သိန်း အနည်းဆုံးကောက်ခံနေကြောင်း ကုန်တင်ယာဉ်မောင်းများက ပြောသည်။
“အဓိက ကုန်ကားတွေကို စစ်တာ၊ ကားတန်းဆို အရှည်ကြီးပဲ။ ၆ မိုင်နားအထိ ကားတွေ ရပ်စောင့် ရတာ။ တစ်ချို့ဆို တစ်ရက် နှစ်ရက်လောက် စောင့်ရမယ် ထင်တယ်။ ပိုက်ဆံတောင်းတာပေါ့၊ သူတို့ တောင်းတဲ့ ပမာဏ မပေးနိုင်ရင် ကားပေးမဖြတ်ဘူး။ ကုန်ကားအသေးလေးတောင် (၈၀၀၀၀)ဆို အကြီးဆို ပိုကောက်တာပေါ့”ဟု ကုန်စိမ်းကား မောင်းနှင်သူ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုသို့ ကုန်တင်ကားများကို ငွေတောင်းသည့်အပြင် ကားသမားများကိုလည်း တစ်နာရီကျော် စစ်ဆေးမေးမြန်းပြီး ငွေကြေး အဆမတန် ကောက်ခံသောကြောင့် ကုန်ကားမောင်းသူများမှာ အမြတ်မကျန်ဘဲ ဂိတ်ကြေးများသာ ပေးဆောင်နေရကြောင်း ၎င်းအမျိုးသားက ဆက်ပြောသည်။
ထို့အပြင် တောင်ကြီးမြို့အဝင် စစ်ကော်မရှင်တပ် ဂိတ်တွင်လည်း လိုင်စင်မဲ့ကားများကို ရှောင်တခင် စစ်ဆေးပြီး လိုင်စင်ရှိသည့် ကားများကိုလည်း အတု ဖြစ်နိုင်ကြောင်း စွပ်စွဲ၍ စစ်ဆေးမှုများ လုပ်ဆောင်နေကြောင်း ဒေသခံများထံမှ သိရသည်။
“လိုင်စင်စစ်တဲ့သူက အမြဲတမ်း မရှိဘူး၊ သူတို့ စိတ်ကူးပေါက်တဲ့ အချိန်မှ စစ်တာ။ လိုင်စင်မရှိရင် ဖမ်းတယ်။ လိုင်စင်ရှိရင် အတုဆိုပြီး ရစ်တယ်၊ ငွေတောင်းတယ်။ သူတို့ စိတ်ကျေနပ်မှ ပြန်လွှတ်ပေးတာ။ အရင်လို ခရီးသွားလာရတာ မလွယ်ကူတော့ဘူး”ဟု တောင်ကြီး ဒေသခံ အမျိုးသားတစ်ဦးက ပြောသည်။
တောင်ကြီးနှင့် ဟိုပုံးမြို့ဘက်တွင် ရွေးကောက်ပွဲ နီးလာသောကြောင့် လိုင်စင်မဲ့ကားများကို မထင်မှတ်ချိန်တွင် ရှောင်တခင် စစ်ဆေးပြီး ကျန်သည့်အချိန်များတွင် သွားလာခွင့်ပြုပေးထားသည်ဟု သိရသည်။
တောင်ကြီး-ဟိုပုံးသွားလမ်းတွင် စစ်ကော်မရှင်တပ် စစ်ဆေးရေးဂိတ် ၄ ခုရှိပြီး ၎င်းစစ်တပ်ဂိတ်တိုတွင် စစ်ဆေးတင်းကြပ်ကာ ငွေညှစ်တောင်းခံမှုများ ရှိနေကြောင်း သိရသည်။
ယခုလက်ရှိ တောင်ကြီး-ဟိုပုံးသွားလမ်းတွင် စစ်ကော်မရှင်မှ ခရီးသွားများကိုပါ စစ်ဆေးတင်းကြပ်နေပြီး ကားပေါ်တွင် ပါလာသည့် စားနပ်ရိက္ခာများကို သိမ်းယူ၍ ကုန်စိမ်းများကို သံချောင်းဖြင့် ထိုးကာ စစ်ဆေးနေကြောင်း သိရသည်။
Leave a Comments