သျှမ်းပြည်တောင်ပိုင်း၊ ပင်လောင်းမြို့နယ်၊ ဟိုပုံးမြို့နယ်နှင့် ဆီဆိုင်မြို့နယ်များတွင် လက်နက်ကိုင်များ အတွက် ဟန်ပြ ဘိန်းခင်းဖျက်ရန် ဒေသခံများက သပ်သပ် စိုက်ပျိုးပေးထားရကြောင်း သတင်းရရှိသည်။

ပြီးခဲ့သည့် ဒီဇင်ဘာလ ပထမ ပတ်တွင် ပင်လောင်းမြို့နယ်၊ ထီပေါင်ကျေးရွာအုပ်စု၊ ထာငိုကျေးရွာအရှေ့တောင်ဘက်က ဘိန်းစိုက်ခင်းများကို စစ်ကော်မရှင် လက်အောက်ခံ ရဲတပ်သားများက ဟန်ပြ ဖျက်ဆီးသွားခဲ့သည်။

ထိုသို့ စစ်ကော်မရှင်တပ်မှ လာရောက်ဖျက်ဆီးခဲ့သောကြောင့် ထိခိုက်မှု များများ မရှိသော်လည်း အခွန်ပေးနေရသောကြောင့် ရသည့်ဘိန်းဈေးနှင့် အမြတ်မကျန်တော့ကြောင်း ဒေသခံများက ပြောသည်။

“ဘိန်းခင်း ဖျက်ပြတာက ဟန်ပြတာပဲရှိတယ်။ စိုက်ထားတဲ့ ခြံတိုင်း ဖျက်တာမဟုတ်ဘူး။ ဘိန်းစိုက်ရင် သူတို့လာရင် ဖျက်ဖို့ ခြံသပ်သပ် စုပြီး လုပ်ထားကြတာ။ ဖျက်ရင် အဲဒီခြံပဲ ဖျက်သွားတာ။ စစ်တပ်ကိုရော PNOဘက်ကိုရော တစ်အိမ်ကို ငါးသိန်း နီးပါး အခွန်ဆောင်ရတာ။ မဆောင်ရင် အကုန်လာဖျက်တယ်။”ဟု ပင်လောင်း ဒေသခံ အမျိုးသမီးတစ်ဦးက ပြောသည်။

ဘိန်းမဲ တစ်ပိဿလျှင် ငွေကျပ် (၆သိန်း)သာ ရရှိပြီး ဓာတ်မြေဩဇာဈေးနှုန်းနှင့် လူငှားခ ဈေးနူန်းမြင့်တက်သည့်အပြင် လက်နက်ကိုင်တပ်ဖွဲများကို အခွန်ဆောင်ရသောကြောင့် စားသောက်နိုင်ရုံမျှသာ ကျန်ကြောင်း ၎င်းက ဆက်ပြောသည်။

ဘိန်းကို တစ်နှစ်လျှင် နှစ်ကြိမ်စိုက်ပျိုးနိုင်ပြီး ဝေးလံသည့် တောင်ကုန်းပေါ်တွင် အများအားဖြင့် စိုက်ပျိုးကြပြီး ကျေးရွာအနီးရှိ ဘိန်းစိုက်ခင်းများကို စစ်တပ်နှင့် PNOက လာရောက်ဖျက်ဆီးလေ့ ရှိသောကြောင့် အနီးနားတွင် မစိုက်ပျိုးကြကြောင်း သိရသည်။

“အာဏာသိမ်းပြီးနောက်ပိုင်းမှာ ဘိန်းမစိုက်တဲ့သူလို့ မရှိဘူး။ အကုန်စိုက်လာကြတယ်။ ကုန်ဈေးနှုန်းက မြင့်လေ ဘိန်းစိုက်မှပဲ စားဝတ်နေရေး ပြေလည်မှာ။ တချို့ တောင်ပေါ်မှာ စိုက်တာဆို မိုးရာသီဆို ရေကြီးတာနဲ့ အကုန်အခင်းပျက်ကုန်တာ။ အရင်းတောင် မကျန်ကြဘူး။ စိုက်သာစိုက်တာ စားရတာက နည်းတယ် ပင်ပန်းတာက များများ။”ဟု ဟိုပုံးဒေသခံ အမျိုးသားတစ်ဦးက ပြောသည်။

ကမ္ဘာ့ ဘိန်းစိုက်ပျိုးမှု အများဆုံးနိုင်ငံအဖြစ် မြန်မာနိုင်ငံသည် နံပါတ်တစ် အဖြစ်ဖော်ပြခံရပြီး မြန်မာနိုင်ငံထဲမှ သျှမ်းတောင်တွင် ဘိန်းစိုက်ပျိုးမှု ပိုမို မြင့်တက်လာကြောင်း ကုလသမဂ္ဂမူးယစ်ဆေးဝါးနှင့် ရာဇဝတ်မှုဆိုင်ရာ ရုံး (UNODC) က ပြီးခဲ့သည့် ဒီဇင်ဘာလ (၄)ရက်နေ့က ထုတ်ပြန်လိုက်သည်။

ပြီးခဲ့သည့် နိုဝင်ဘာလ (၂၉)ရက်မှ ဒီဇင်ဘာလ (၅)ရက်အတွင်း ဆီဆိုင်မြို့နယ် ထီဒေးကျေးရွာ ၊ နားခိုက်ကျေးရွာအုပ်စု နှင့် ဟိုပုံးမြို့နယ် နောင်လိုင်မူဖိတ် ကျေးရွာ အုပ်စု၊ ပန်ကလားကျေးရွာဘက်နှင့် ပင်လောင်းမြို့နယ် ဘက်မှ ဘိန်းစိုက်ခင်း ဧက ၁၄၀ ကျော်ဖျက်ဆီးခဲ့ကြောင်း မြန်မာနိုင်ငံ ရဲတပ်ဖွဲ့က ထုတ်ပြန်ထားသည်။