သျှမ်းပြည် ဖယ်ခုံမြို့နယ်ရှိ စစ်ကော်မရှင်တပ်ဖွဲ့ တပ်စွဲထားသည့်နေရာကို ကရင်နီတော်လှန်ရေး တပ်ပေါင်းစုတို့ ပြန်လည်ထိုးစစ်ဆင် တိုက်ခိုက်ခဲ့ကြောင်း သတင်းရရှိသည်။
ဖယ်ခုံမြို့နယ် အနောက်ဘက်ခြမ်း တောင်စလုံးကျေးရွာနှင့် မြောက်စလုံးကျေးရွာအနီး အထိုင်ချ တပ်စွဲထားသည့် စစ်ကော်မရှင်တပ်ဖွဲ့တို့ကို ကရင်နီတော်လှန်ရေး တပ်ပေါင်းစုတို့က ပြီးခဲ့သည့် ဒီဇင်ဘာလ ၆ ရက်တွင် ပြန်လည်ထိုးစစ်ဆင် တိုက်ခိုက်ခဲ့ကြောင်း စစ်မြေပြင်ရှိ တော်လှန်ရေး တပ်သားတစ်ဦးက သျှမ်းသံတော်ဆင့်ကို ပြောသည်။
“တိုက်ပွဲကတော့ ဒီနေ့ (ဒီဇင်ဘာ ၈ ရက်) မနက်အထိ ဖြစ်နေတုန်းပါ။ (ဒီဇင်ဘာ ၆ ရက်) မနက်က ကျနော်တို့ဘက်က တပ်ဖွဲ့တွေစုပြီး ပြန်ထိုးစစ်ဆင်တာ။ သူတို့ ရွာနားမှာ အထိုင်ချ တပ်စွဲထားတဲ့ နေရာကို ပြန်ဝင်တိုက်တာပေါ့။ သူတို့ တပ်စွဲထားတဲ့ နေရာကလည်း အသေအချာကြီးကို မြေတွေတူးပြီး ပြင်ဆင်ထားတာ”ဟု စစ်မြေပြင်ရှိ တော်လှန်ရေး တပ်သားတစ်ဦးက ပြောသည်။
လက်ရှိ ၃ ရက်တာ တိုက်ပွဲအတွင်း စစ်ကော်မရှင်တပ်ဖွဲ့မှ အရာရှိအပါအဝင် တပ်သားအချို့လည်း သေဆုံးခဲ့ပြီး၊ ကရင်နီတော်လှန်ရေး တပ်ပေါင်းစုဘက်မှလည်း ထိခိုက်ကျဆုံးမှု အနည်းငယ် ရှိခဲ့ကြောင်း စစ်မြေပြင်ရှိ ၎င်းတော်လှန်ရေး တပ်သားက ဆက်ပြောသည်။
“သေတာက တော်တော် သေတယ်၊ ကျနော်နဲ့ နီးလာတဲ့ စစ်ကောင်စီက ၅ ယောက်လောက် မကဘူး သေတာ။ လက်နက်ကတွေလည်း အနည်းငယ် သိမ်းနိုင်တာပေါ့။ တိုက်ပွဲကတော့ တော်တော်ပြင်းတယ်၊ အလောင်းတွေကတော့ တစ်ဘက်နဲ့ တစ်ဘက် ပြန်မရသေးတာမျိုး ရှိတယ်”ဟု ၎င်းက ဆက်ပြောသည်။
တောင်စလုံးကျေးရွာနှင့် မြောက်စလုံးကျေးရွာကြားတွင် တပ်စွဲထားသည့် စစ်ကော်မရှင်ဘက်မှ နေ့စဉ်နီးပါး လက်နက်ကြီး၊ ဒရုန်းများဖြင့် ပစ်ခတ်နေခြင်းကြောင့် ကရင်နီတော်လှန်ရေး တပ်ပေါင်းစုဘက်မှ ပြန်လည် ထိုးစစ်ဆင် တိုက်ခိုက်ခဲ့ရကြောင်း စစ်မြေပြင်ရှိ တော်လှန်ရေး တပ်သားတစ်ဦးက ဆက်ပြောသည်။
“ဒီဇင်ဘာလ အစကတော့ တိုက်ပွဲတွေ နည်းနည်းငြိမ်သွားသေးတယ်။ ဒါပေမဲ့ သူတို့ဘက်က ညည ဆိုရင်လည်း လက်နက်ကြီးတွေနဲ့ ဒရုန်းတွေနဲ့ ချတယ်။ ကျနော်တို့ဘက်က အချင်းချင်း ပြန်တိုင်ပင်ပြီးတော့ ထိုးစစ်ဆင်တဲ့ ပုံစံပါ။ တိုက်ပွဲငြိမ်လည်း မြေပြင်ပဲမှာ ငြိမ်တာ၊ ဒါပေမဲ့ နေ့တိုင်း သူတို့ဘက်ကော ကိုယ့်ဘက်ကကော ဒရုန်းတွေနဲ့ အပြန်အလှန် တိုက်နေတာမျိုးတော့ ရှိနေတယ်”ဟု ၎င်းတော်လှန်ရေးတပ်သားက ဆက်ပြောသည်။
လက်ရှိတွင် စစ်ကော်မရှင်တပ်၊ ၎င်းလက်အောက်ခံ ပအိုဝ်းပြည်သူ့စစ် PNO နှင့် ကရင်နီတော်လှန်ရေး တပ်ပေါင်းစုတို့ကြား ၂ လကျော်ကြာ တိုက်ပွဲအတွင်း နှစ်ဘက် ထိခိုက်သေဆုံးမှုများ ရှိခဲ့ပြီး၊ စစ်ကော်မရှင်တပ်၏ လက်နက်ကြီးကျည် ရမ်းသမ်းပစ်ခတ်မှုကြောင့် သေဆုံးခဲ့ရသည့် ဒေသခံများလည်း ရှိသည်။
ပြီးခဲ့သည့် စက်တင်ဘာလ ဒုတိယပတ်တွင် ဖယ်ခုံမြို့နယ် အနောက်ဘက်ခြမ်း ဘောရန်ကျေးရွာ၊ တောင်စလုံးကျေးရွာနှင့် မြောက်စလုံးကျေးရွာ တကြောကို စစ်ကော်မရှင်တပ်နှင့် ပအိုဝ်းပြည်သူ့စစ် (PNO) ပူးပေါင်း စစ်ကြောင်းထိုး သွားလာမှုကြောင့် ကျေးရွာ (၁၀) ရွာမှ ဒေသခံ ၅၀၀၀ ဝန်းကျင် ဘေးလွတ်ရာနှင့် နီးစပ်ရာ ကျေးရွာ၊ တောတောင်အတွင်းသို့ ထွက်ပြေးတိမ်းရှောင်ခဲ့ရသည်။
Leave a Comments