သျှမ်းပြည် မိုးမိတ်မြို့နယ်ရှိ မြစ်ဆုံကျေးရွာအနီးသို့ စစ်ကော်မရှင်တပ်က လေကြောင်းဗုံးကြဲ တိုက်ခိုက်ခဲ့ရာ စစ်ဘေးတိမ်းရှောင်နေသည့် ကိုယ်ဝန်ဆောင်မိခင်နှင့် ကလေးအပါအဝင် (၁၁) ဦး သေဆုံးခဲ့ကြောင်း စုံစမ်းသိရသည်။

ဒီဇင်ဘာလ (၆) ရက် နံနက် ၉ နာရီကျော်တွင် စစ်ကော်မရှင်တပ် ပြန်လည်တပ်စွဲထားသည့် မိုးမိတ်မြို့နယ်နှင့် ကချင်လွတ်လပ်ရေးတပ် KIA ထိန်းချုပ်ထားသည့် မဘိမ်းမြို့နယ်ကြား မြစ်ဆုံကျေးရွာရှိ မိဘမေတ္တာ စက်သုံးဆီဆိုင်အနီးသို့ စစ်ကော်မရှင်တပ်မှ လေကြောင်းဖြင့် ဗုံးကြဲတိုက်ခိုက်ခဲ့သည်။

အဆိုပါ လေကြောင်းတိုက်ခိုက်မှုအတွင်း မိုးကုတ်မြို့မှ စစ်ဘေးတိမ်းရှောင်သွားသည့် ကိုယ်ဝန်ဆောင်မိခင်တစ်ဦးနှင့် ကလေးနှစ်ဦး အပါအဝင် အရပ်သား စုစုပေါင်း (၁၁) ဦး လေကြောင်းဗုံး ထိမှန်သေဆုံးခဲ့ကြောင်း မိုးမိတ်ဒေသခံများက ပြောသည်။

“အားလုံးပေါင်း ၁၁ ယောက် ဆုံးသွားတယ်။ အမျိုးသမီးက ၉ ယောက်နဲ့ အမျိုးသား ၂ ယောက်၊ အဲ့ထဲမှာ ကိုယ်ဝန်ဆောင်တစ်ယောက်နဲ့ ကလေး ၂ ယောက်ပါတယ်။ နောက်ပြီးတော့ မိုးကုတ်ကနေ စစ်ရှောင်သွားတဲ့လူတွေလည်း သေသွားတဲ့ထဲ ပါတယ်။ လေယာဉ်နဲ့ ၈ လုံးကြဲသွားတာကို ၇ လုံး ပေါက်ကွဲတယ်။ မနေ့ကလည်း ထပ်လာကြဲသေးတယ်” ဟု မိုးမိတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

မြစ်ဆုံကျေးရွာသည် မိုးမိတ်မြို့နှင့် (၁၈) မိုင်ခန့် ကွာဝေးပြီး တိုက်ပွဲတစုံတရာ ဖြစ်ပွားခဲ့ခြင်း မရှိဘဲ နှစ်ရက်ဆက်တိုက် လေကြောင်းဗုံးကြဲခံခဲ့ရကြောင်း ဒေသခံများထံမှ သိရသည်။

ထို့အပြင် မိုးမိတ်မြို့ထဲ ဝင်ရောက်နေရာယူ တပ်စွဲထားသည့် စစ်ကော်မရှင်တပ်များသည် ကချင်လွတ်လပ်ရေးတပ် (KIA) ၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) နှင့် တော်လှန်ရေးအင်အားစု PDF တပ်များ တပ်စွဲထားသည့် နေရာများအထိ တပ်စခန်းအခြေစိုက်ရန် လုပ်ဆောင်လာခြင်းကြောင့် နေ့စဉ်နီးပါး ထိတွေ့တိုက်ပွဲ ဖြစ်ပွားနေကြောင်း မိုးမိတ်ဒေသခံများက ပြောသည်။

“PDF နဲ့ KIA က မိုးမိတ်မြို့ မြောက်ဘက်တစ်လျှောက်မှာ လှုပ်ရှားနေတာ။ စစ်တပ်ကလည်း အဲ့ဘက်ကို စစ်ကြောင်းထိုးနေတော့ တိုက်ပွဲနေ့တိုင်း ဖြစ်တယ်။ တောထဲပြေးကြတဲ့ စစ်ရှောင်တွေကို မပြန်နဲ့ဦး တိုက်ပွဲထပ်ဖြစ်မယ်လို့ PDF ကပြောတာ။ စစ်တပ်ကလည်း ပြန်လာလို့ရပြီ ဆိုပြီး ပြောလို့ စစ်ရှောင်တွေ ကြားညှပ်နေတယ်”ဟု မိုးမိတ်မြို့နယ်မှ ၎င်းဒေသခံ အမျိုးသားက ဆက်ပြောသည်။

ဒီဇင်ဘာလ ၁ ရက်နေ့မှ စတင်ပြီး မိုးကုတ်မြို့နှင့် မိုးမိတ်မြို့မှ TNLA တပ်ဆုတ်ပြီးနောက် တော်လှန်ရေးအင်အားစု PDF တပ်များ ထိန်းချုပ်ထားသည့် နေရာအထိ စစ်ကော်မရှင်တပ်ဘက်မှ မြေပြင် စစ်ကြောင်းထိုး အင်အားတိုးချဲ့နေသည့်အပြင် တစ်ပတ်အတွင်း လေကြောင်းတိုက်ခိုက်မှု (၃) ကြိမ်ထက်မနည်း ရှိလာကြောင်း ဒေသခံများထံမှ သိရသည်။

ပြီးခဲ့သည့် နိုဝင်ဘာလ ၃၀ ရက် ညပိုင်းတွင် မိုးကုတ်မြို့ထဲသို့ စစ်ကော်မရှင်တပ်များ အင်အားထောင်နှင့်ချီ ပြန်လည်ဝင်ရောက်ခဲ့ပြီးနောက် မိုးမိတ်မြို့ဘက်သို့ ဆက်လက်ထွက်ခွာသွားစဉ် KIA နှင့် PDF ပူးပေါင်းတပ်ဖွဲ့များက ကြားဖြတ်တိုက်ခိုက်ခဲ့ကြောင်း KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက အတည်ပြုသည်။

ကချင်လွတ်လပ်ရေးတပ် KIA ထိန်းချုပ်ထားသည့် မဘိမ်းမြို့နယ်နှင့် စစ်ကော်မရှင်တပ် ပြန်လည်ဝင်ရောက်လာသည့် မိုးမိတ်မြို့နယ်တို့မှာ နယ်နိမိတ်ချင်း ထိစပ်နေခြင်းကြောင့် စစ်ကောင်မရှင်တပ်နှင့် PDF များ တိုက်ပွဲဖြစ်ပွားပါက စစ်ရေးအရ PDF ဘက် ဝင်ရောက်ကူညီမည်ဟု ဗိုလ်မှူးကြီး နော်ဘူ က ပြောဆိုထားသည်။

မိုးမိတ်မြို့နယ်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA အပြင် ကချင်လွတ်လပ်ရေးတပ် (KIA) ၊ ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) နှင့် ပြည်သူ့ကာကွယ်ရေးတပ်ဖွဲ့ PDF များလည်း သွားလာလှုပ်ရှားနေသည်။