စစ်ကော်မရှင် ပြန်လည်သိမ်းပိုက်ထားသည့် သျှမ်းပြည်မြောက်ပိုင်း လားရှိုးမြို့တွင် အမျိုးသားတစ်ဉီးကို သူခိုးဟု စွပ်စွဲဖမ်းဆီး စစ်ဆေးကာ အသက်သေဆုံးထိ ရိုက်နှက်ခဲ့ကြောင်း စုံစမ်းသိရသည်။

ထိုစစ်ဆေးမှုဖြင့် သေဆုံးသွားသည့် ဖြစ်စဉ်သည် ပြီးခဲ့သော နိုဝင်ဘာ ၁၆ရက် တွင် လားရှိုးမြို့တွင်း သူခိုးများသောင်းကျန်းနေသည်ဟုဆိုပြီး သက်ဆိုင်ရာ အုပ်ချုပ်ရေးမှူးများနှင့် ဒေသခံများ ပူးပေါင်း ဖမ်းဆီးရာ အသက် (၃၀)ကျော်အမျိုးသား စိုင်းအိုက်လိတ်ဆိုသည်တစ်ဉီးလည်း အပါအဝင်ဖြစ်သည်။

ဖမ်းဆီးနေချိန်တွင် စိုင်းအိုက်လိတ်သည် နေအိမ်တလုံးတွင် ကျူးကျော်နေစဉ် ဖမ်းဆီးရမိသော်လည်း ခိုးရာပါပစ္စည်းများမတွေ့ရှိကြောင်း၊ ထို့အပြင် ၎င်းသက်ဆိုင်ရာအုပ်ချုပ်ရေးမှူးများနှင် ဒေသခံများက စိုင်းအိုက်လိတ်ကို ရိုက်နှက်စစ်ဆေးရာ နိုဝင်ဘာ ၁၈ရက်တွင် ဒဏ်ရာကြောင့် အသက်သေဆုံးထိ အထိဖြစ်ပွားခဲ့ကြောင်း ဖြစ်စဉ်ကို သိရှိသူ လားရှိုးမြို့ခံ အမျိုးသမီးတစ်ဉီးက သျှမ်းသံတော်ဆင့်ကို ပြောသည်။

လက်လွန်ရိုက်နှက် သေဆုံးသွားမှုနှင့်ပတ်သက်ပြီး နိုဝင်ဘာ ၁၈ရက်တွင် မိသားစုဝင်များကို အသိမပေးဘဲ မြေမြှုပ်သင်္ဂြိုဟ်ခဲ့ကြောင်း ၎င်းအမျိုးသမီးက ပြောပြသည်။

“အစတုန်းကတော့ ဘယ်ရောက်သွားလဲ မေးတာ ဟို စစ်ကော်မရှင်အဖွဲ့ကို အပ်လိုက်သလိုလို MNDAA အဖွဲ့ ကို အပ်လိုက်သလိုလိုနဲ့ အမှု့ဖွင့်ပြီး စစ်မေးမှ သေဆုံးသွားတယ်။ သူတို့ဟာ သူတို့ သွားမြှုပ်လိုက်တာဆိုတာ သိရတာ။ တကယ်ဆို မိသားစုဝင်တွေကို အသိပေးသင့်တယ်။”ဟု ၎င်းအမျိုးသမီးက ဆိုသည်။

အဆိုပါ အသတ်ခံရသူ စိုင်းအိုက်လိတ်သည် နေ့စားအငှားလိုက်ကာ အမျိုးသမီးနှင့် လသားအရွယ် ကလေးတစ်ဦးကို လုပ်ကိုင်ကျွေးမွေးနေသူ ဖြစ်သည်။

လက်ရှိအခြေအနေ အရ လသားအရွယ်ကလေးနှင့် အမျိုးသမီးကို ရှာဖွေကျွေးမွေးမည့်သူမရှိသဖြင့် စားဝတ်နေရေး ခက်ခဲနေကြောင်း သိရသည်။

ထို့အပြင် ငွေကြေးမတတ်နိုင်ခြင်း၊ အချိန်မပေးနိုင်ခြင်းတို့ကြောင့် အမှု့ပိတ်သိမ်းလိုက်ရပြီး ခိုကိုးရာမဲ့ ဖြစ်နေကြောင်း သိရသည်။

“ရှာကျွေးတဲ့ ယောင်္ကျားကလည်းမရှိတော့ ကလေးတစ်ဖက်နဲ့ ရှာစားဖို့ကခက်တယ်။ ပိုက်ဆံမရှိတော့ အမှုလည်း ပိတ်လိုက်ပြီ။ နေ့တိုင်းငိုပဲငိုနေတယ်။ အားငယ်နေတယ်” ဟု သေဆုံးသွားသည့် စိုင်းအိုက်လိတ်နှင့် နီးစပ်သူ တစ်ဉီးက သျှမ်းသံတော်ဆင့်ကိုပြောသည်။

လားရှိုးမြို့ကို စစ်ကော်မရှင်တပ်က ဧပြီလကုန်ပိုင်းတွင် ပြန်လည်ဝင်ရောက်စခန်းချခဲ့သော်လည်း အချို့နယ်မြေများတွင် ကိုးကန့် (MNDAA)တပ်တို့နေရာယူထားဆဲကြောင်း သိရသည်။

စစ်ကော်မရှင် တပ်နေရာပြန်ယူပြီးနောက်ပိုင်း လားရှိုးမြို့တွင် ခိုးဆိုးလုယက်မှုများ မကြာခဏကြုံနေရပြီး ဒေသခံများလည်း စိတ်မလုံခြုံပေ။

“အရင်ကလည်း ခိုးတဲ့သူကို လိုက်ဖမ်းတာမျိုးရှိတယ်။ ဒီလိုမျိုးရိုက်နှက် သတ်တာမျိုးတော့ မရှိဘူး။ အခုက ပစ္စည်းလည်း လက်ဝယ်မတွေ့ပဲနဲ့ ဖမ်းပြီး သတ်လိုက်တယ် ဆိုတာက မဖြစ်သင့်ဘူး။” ဟု စိုင်းအိုက်လိတ်နှင့် နီးစပ်သူကဆိုသည်။

ပြီးခဲ့သည့် ဧပြီ ၁၀ရက်တွင် ကိုးကန့်တပ် (MNDAA) လားရှိုးမြို့ကို ထိန်းချုပ်စဉ်ကာလတွင်လည်း သမီးရင်းကို မုဒိမ်းကျင့်သူတစ်ဉီးနှင့် လူသတ်မှု၊ သူခိုး၊ဓားပြမှုအပါအဝင်(၇)ဉီးကို အများရှေ့မှောက်တွင် သေဒဏ်ပေးခဲ့သည့် ဖြစ်စဉ်ရှိခဲ့ဖူးသည်။