သျှမ်းပြည်တောင်ပိုင်း ဆီဆိုင်မြို့နယ်ရှိ ပြောင်းစိုက်တောင်သူများသည် ပြောင်းဈေးနှုန်း အဆမတန် ကျဆင်းခြင်းကြောင့် နှစ်နှစ်ဆက်တိုက် အရင်းပြန်မရဘဲ အရှုံးပေါ်နေကြောင်း သတင်းရရှိသည်။

ပြီးခဲ့သည့် ၂၀၂၁-၂၀၂၂ ခုနှစ်တွင် ပြောင်းစိုက်တောင်သူများ ဈေးကောင်းရရှိခဲ့သော်လည်း ၂၀၂၃ ခုနှစ်မှ ၂၀၂၄ ခုနှစ်အထိ အရှုံးပေါ်ခဲ့သည်။ သို့သော် ယခုနှစ် ၂၀၂၅ တွင် ပြောင်းဈေးကောင်းမည်ဟု ယူဆကာ ပြောင်းစိုက်ခင်းများကို တိုးချဲ့စိုက်ပျိုးခဲ့ကြသော်လည်း ပြောင်းဈေးနှုန်း ဆက်လက်ကျဆင်းနေသဖြင့် ဆီဆိုင်မြို့နယ်မှ တောင်သူများ အရှုံးနှင့် ရင်ဆိုင်နေရခြင်း ဖြစ်သည်။

ယခင် ၂၀၂၁-၂၀၂၂ ခုနှစ်တွင် ပြောင်းအစို တစ်ပိဿာလျှင် ငွေကျပ် ၆၀၀ (ခြောက်ရာ) ဝန်းကျင်နှင့် ပြောင်းအခြောက် တစ်ပိဿာလျှင် ကျပ် ၁,၀၀၀ (တစ်ထောင်) ဝန်းကျင် ရရှိခဲ့သော်လည်း ၂၀၂၃ မှ ၂၀၂၅ ခုနှစ်အထိ လက်ရှိကာလတွင်မူ ပြောင်းအစို တစ်ပိဿာလျှင် ငွေကျပ် ၈၀၀ သာ ရရှိပြီး၊ ပြောင်းအခြောက်လည်း တစ်ပိဿာလျှင် ကျပ် ၁,၂၀၀ (တစ်ထောင့်နှစ်ရာ) သာ ရရှိတော့ကြောင်း တောင်သူများထံမှ သိရသည်။

“ပြောင်းစိုက်ခ၊ ပြောင်းမျိုးစေ့၊ မြေဩဇာတွေက ဈေးကြီးတယ်။ ဒီနှစ်က ပြောင်းဈေးကလည်း မရှိဘူး။ တစ်ချို့ဆို အရင်းတောင် ပြန်မရဘူး။ ဒီနှစ်က အရင်းပြန်ရရင်တောင် ကံကောင်းလို့ပဲ။ ဒီနှစ်လည်း တောင်သူတွေ ဘဝပျက်တဲ့နှစ်ပဲ” – ဟု ဆီဆိုင်မြို့မှ ပြောင်းစိုက်တောင်သူတစ်ဦးက ပြောသည်။

ပြောင်းမျိုးစေ့ကို တစ်အိတ်လျှင် ကျပ် နှစ်သိန်းအထိ ပေး၍ ဝယ်ယူရပြီး၊ အချို့သော စိုက်ခင်းများတွင် ရေမရရှိခြင်းကြောင့် အပင်မပေါက်ခြင်း၊ မျိုးစေ့ထုတ်လုပ်မှုကြောင့် မျိုးအောင်မှုနည်းခြင်း စသည့် ပြဿနာများကြောင့် နောက်တစ်ကြိမ် ချေးငွေယူပြီး ပြန်လည်စိုက်ပျိုးခဲ့ရသည်။

ထိုသို့ ချေးငွေယူရာတွင် ကျပ်တစ်ရာအတွက် တစ်လလျှင် ငါးကျပ်တိုးနှုန်းဖြင့် ချေးယူခဲ့ရသော်လည်း ပြောင်းဈေးနှုန်း အဆမတန် ကျဆင်းသောကြောင့် ပြောင်းစိုက်တောင်သူများ အကြွေးပြန်ဆပ်ရန် ခက်ခဲနေပြီး အကြွေးနွံနစ်နေကြောင်း သိရသည်။

“ပြောင်းစိုက်ဖို့ အရင်းပဲကို သိန်း ၅၀ လောက်ရှိတယ်။ ပြန်ရတာက ကျပ်သိန်း ၄၀ တောင် မပြည့်ဘူး။ အကြွေးကလည်း အတိုးနဲ့ဆို မြုပ်နေပြီ ဘာမှကို မကျန်တာ ဒီနှစ်က။ ဈေးကောင်းမလားဆိုပြီး စိုက်ထားတာ၊ နောက်နှစ်ဆို တခြားသီးနှံ စိုက်မှရမယ်” – ဟု ပြောင်းစိုက်တောင်သူ အမျိုးသားတစ်ဦးက ပြောသည်။

ဆီဆိုင်မြို့နယ်မှ ပြောင်းစိုက်တောင်သူများသည် အများအားဖြင့် ပွဲစားများနှင့်သာ ပြောင်းအရောင်း အဝယ် ပြုလုပ်ကြပြီး မြန်မာနိုင်ငံမှ ပြောင်းများကို တရုတ်နှင့် ထိုင်းနိုင်ငံဘက်သို့ အဓိက တင်ပို့နေခြင်း ဖြစ်သည်။

သျှမ်းပြည်တောင်ပိုင်းရှိ တောင်ကြီး၊ ဟိုပုံး၊ ညောင်ရွှေ၊ ပင်းတယ၊ အောင်ပန်း ဘက်မှ ပြောင်းစိုက် တောင်သူများသည်လည်း ပြောင်းဈေးနှုန်း အဆမတန် ကျဆင်းမှုကြောင့် အရင်းပြန်မရဘဲ အကြွေးနွံ နစ်နေကြောင်း သိရသည်။

ထိုသို့ ပြောင်းစိုက်တောင်သူများ အရှုံးပေါ်သောကြောင့် ပြောင်းအစားထိုး သီးနှံအဖြစ် ပဲစင်းငုံ များကို တိုးချဲ့ စိုက်ပျိုးလာကြကြောင်း သိရသည်။

ပြီးခဲ့သည့် ၂၀၂၄ ခုနှစ်၊ မေလတွင်လည်း သျှမ်းပြည်တောင်ပိုင်း နမ့်စန်မြို့နယ်၊ ကာလေကျေးရွာမှ ပြောင်းစိုက်တောင်သူများသည် ပြောင်းဖူး တစ်ပိဿာလျှင် ငွေကျပ် ၆၀၀ သာ ရရှိခဲ့ပြီး အရှုံးပေါ်ခဲ့ကြောင်း သိရသည်။