သျှမ်းပြည်မြောက်ပိုင်း လားရှိုးမြို့တွင် ကုန်ပစ္စည်းတင်ဆောင်လာသည့် မော်တော်ယာဉ်တစ်စီးကို ရပ်တန့်စစ်ဆေးရန် အမိန့်ပေးရာမှ ယာဉ်မောင်းက မရပ်ဘဲ ဆက်မောင်းခဲ့ခြင်းကြောင့် စစ်ကော်မရှင်တပ်က သေနတ်ဖြင့် ပစ်ခတ်သည်ဟု ဒေသခံများက ပြောသည်။
ယမန်နေ့ (နိုဝင်ဘာလ ၂၄ ရက်) ည ၁၀ နာရီကျော်အချိန် လားရှိုးမြို့ ရပ်ကွက် (၁) နယ်မြေ (၇) ထင်းရှူးမြိုင် အိမ်ယာအနီး မြို့ရှောင်လမ်း၌ ကုန်ပစ္စည်းတင်ဆောင်လာသည့် ကားတစ်စီးအား စစ်ကော်မရှင်တပ်က တားဆီးခဲ့ရာ မရပ်ပေးခြင်းကြောင့်ဟုဆိုကာ သေနတ်ဖြင့် လိုက်လံပစ်ခတ်ခဲ့ကြောင်း လားရှိုးမြို့ခံ အမျိုးသမီး တစ်ဦးက သျှမ်းသံတော်ဆင့်ကို ပြောကြားသည်။
“ကားရပ်ခိုင်းတာ မရပ်လို့ဆိုပြီး သေနတ်နဲ့ ပစ်တာလို့ ကြားတယ်။ သေနတ်သံကတော့ ၁၀ ချက် မကဘူး၊ အသံက တစ်မြို့လုံး ကြားရတယ်။ အဲဒီကားကတော့ လွတ်သွားတယ်” – ဟု လားရှိုးမြို့ခံ အမျိုးသမီးတစ်ဦးက သျှမ်းသံတော်ဆင့်ကို ပြောကြားသည်။
အဆိုပါ သေနတ်ပစ်ခတ်မှုကြောင့် ဒေသခံပြည်သူများ ထိတ်လန့်ခဲ့ရကြောင်းလည်း လားရှိုးမြို့ခံများ ပြောပြချက် အရ သိရသည်။
စစ်ကောင်စီတပ် ပြန်လည်ထိန်းချုပ်ထားသည့် သီပေါမြို့ဘက်တွင်လည်း MNDAA ကိုးကန့်တပ် နှင့် စစ်ရေးတင်းမာမှုများ ဆက်လက်ရှိနေခြင်းကြောင့် သီပေါတံတားကြီးကို နိုဝင်ဘာလ ၁၄ ရက်နေ့မှစ၍ ယနေ့အထိတိုင် ယာဉ်ဖြတ်သန်းသွားလာခွင့် ပိတ်ထားဆဲ ဖြစ်သည်။
ယင်းကြောင့် လားရှိုး-မူဆယ်ဘက်သို့ သွားလိုသည့် ခရီးသွားများနှင့် ကုန်တင်ယာဉ်များသည် ကျောက်မဲမြို့မှတစ်ဆင့် သီပေါကို ရှောင်ကွင်းပြီး တာလုံ-နားမခေါ် လမ်းပိုင်းပေါ်မှ နမ္မတူမြစ်ကို ဇက်ရေယာဉ်ဖြင့် ဖြတ်ကူးကာ နမ့်လန်၊ မိုင်းရယ်မြို့ဘက်မှတစ်ဆင့် လားရှိုးသို့ ခရီးဆက်နေရကြောင်း ခရီးသွားများထံမှ သိရသည်။
ထို့အပြင် သီပေါ-မိုင်းရယ် လမ်းပိုင်းနှင့် နမ့်လန်-ကျောက်ဂူ-ရပ်စောက် လမ်းပိုင်း တို့ကိုလည်း စစ်ကောင်စီတပ်က နိုဝင်ဘာလ ၁၄ ရက်မှစ၍ ပိတ်ထားခြင်းကြောင့် ကုန်စည်စီးဆင်းမှုများ ပြတ်တောက်ကာ ဒေသတွင်း ကုန်ဈေးနှုန်း မြင့်တက်လာမည့်အရေးကို ဒေသခံများက စိုးရိမ်နေကြသည်။
အလားတူ နယ်စပ်ဂိတ်အချို့ကို တော်လှန်ရေးတပ်ဖွဲ့များက ထိန်းချုပ်ထားချိန်တွင် စစ်ကောင်စီဘက်မှ ကုန်စည်ပို့ဆောင်မှုကို တင်းကြပ်စွာ စစ်ဆေးနေကြောင်း ဒေသခံတစ်ဦးက ဖြည့်စွက်ပြောသည်။
“အခု မူဆယ်ဘက်က လာတဲ့ ကုန်ပစ္စည်းတွေ ပေးမဖြတ်ဘူး။ ကိုးကန့်ဘက်က စစ်ဆေးမှု သိပ်မတင်းကြပ်ပေမဲ့၊ စစ်ကောင်စီဘက်ကတော့ စစ်ဆေးမှု အရမ်းတင်းကြပ်တယ်။ တရားမဝင် ကုန်ပစ္စည်းတွေဆို အကုန်ဖမ်းတယ်” – ဟု ၎င်းအမျိုးသမီးက ဆက်ပြောသည်။
နယ်စပ်ဂိတ်များ၌ တော်လှန်ရေးတပ်ဖွဲ့များက အခွန်ကောက်ခံနေခြင်းကို တန်ပြန်ရန်အတွက် ပြီးခဲ့သည့် သြဂုတ်လ ၁၂ ရက်က စစ်ကောင်စီအစည်းအဝေးတွင် တရားမဝင် ကုန်သွယ်မှုများကို ဖမ်းဆီးရန် အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် က ညွှန်ကြားထားခဲ့ဖူးသည်။
Leave a Comments